ខេត្តកំពង់ចាម ៖ បើតាមការបញ្ជាក់ពីមន្ត្រីសាលាដំបូងខេត្តមួយរូប នារសៀលថ្ងៃទី២៨ វិច្ឆិកា ឆ្នាំ២០២៥ ថា ជនឈ្មោះសុបិន្ទ វិនា ភេទប្រុស…
ខេត្តកំពង់ចាម ៖ បើតាមការបញ្ជាក់ពីមន្ត្រីសាលាដំបូងខេត្តមួយរូប នារសៀលថ្ងៃទី២៨ វិច្ឆិកា ឆ្នាំ២០២៥ ថា ជនឈ្មោះសុបិន្ទ វិនា ភេទប្រុស អាយុ២១ឆ្នាំ នៅភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម ត្រូវបានចៅក្រមស៊ើបសួរឈ្មោះហាស់ ពុទ្ធីចេញដីកាឃុំខ្លួនជាបណ្ដាះអាសន្ន ដោយចោទពីបទឃាតកម្ម និងឃាតកម្មគិតទុកជាមុនតាមមាត្រា១៩៩ និង២០០នៃក្រមព្រហ្មទណ្ឌ ។ ហើយត្រូវបានកម្លាំងនគរបាលនៃស្នងការដ្ឋាននគរបាលខេត្តយកទៅដាក់ពន្ធនាគារខេត្ត ដែលមានទីតាំងស្ថិតនៅក្នុងឃុំមៀន ស្រុកព្រៃឈរ រួចរាល់ហើយដែរ ។
គួររំលឹកថា ពិតជាគួរឱ្យអាសូរណាស់ ដោយសមាជិកក្រុមគ្រួសារមួយត្រូវបានបុរសជាប្ដីប្រើអំពើហិង្សាកាប់ប្រពន្ធនិងក្មួយៗព្រមទាំងម្ដាយក្មេក ហើយអូសគដាក់លើគ្នាចាក់សាំងដុតឆេះសន្ធោសន្ធៅសរុបរហូតដល់១០នាក់ឯណោះ ។ ហេតុការណ៍នេះកើតឡើងនៅផ្ទះចាំចំការភូមិពោន ឃុំទួលសំបួរ ស្រុកស្ទឹងត្រង់ នៅយប់ទៀបភ្លឺម៉ោង៥ឈានចូលព្រឹកថ្ងៃទី២៣ វិច្ឆិកា ឆ្នាំ២០២៥។
ក្រោយហេតុការណ៍កើតឡើង កម្លាំងសមត្ថកិច្ចបានសហការជាមួយដៃគូអង្គការ CPU អូរស្ត្រាលី បានចុះពិនិត្យផ្ទាល់ដល់កន្លែងកើតហេតុ ដើម្បីធ្វើកោសល្យវិច្ច័យ ។
លោកវ៉ា ស្រេង មេឃុំទួលសំបួរ បានប្រាប់ឲ្យដឹងថា ដើមហេតុដំបូង ប្រពន្ធជាជនរងគ្រោះនិងប្ដីបានឈ្លោះគ្នាដោយទ្រាំមិនបាន ស្ត្រីជាប្រពន្ធក៏បានរត់មកផ្ទះម្ដាយ នៅភូមិទួលសំបួរ ដែលមានចម្ងាយប្រមាណជាង៥គីឡូម៉ែត្រពីផ្ទះរបស់ខ្លួន ។ បន្ទាប់មក ប្ដីដែលមានអាយុជាង២០ឆ្នាំខឹងសម្បារនិងប្រពន្ធ ក៏ជិះម៉ូតូមកតាមរករឿងប្រពន្ធដល់ផ្ទះម្ដាយក្មេកទៀត ។ គ្រាហ៍នោះ ប្ដីបានប្រព្រឹត្តនូវអំពើឃាតកម្មដ៏សាហាវដោយសម្លាប់ក្មួយៗនៅផ្ទះនោះទាំងអស់ មានប្រពន្ធពោះធំកូនក្នុងផ្ទៃ និងម្ដាយក្មេក ដោយបានលើកគរដាក់លើគ្នា រួចចាក់សាំងដុតកំទេចចោល ដើម្បីបំបាត់ភស្តុតាង ។
ក្រោយពីកើតហេតុ វត្ថុតាងដែលនៅសល់ គឺមានប្រេងសាំងជិតមួយប៊ីដុងទៀត ដែលបុរសជាប្ដីបានទិញយកមក ដើម្បីប្រព្រឹត្តនៅអំពើឃាតកម្មដែលពុំដែលកើតមានទាល់តែសោះនៅក្នុងឃុំមួយនេះ ។ លោកមេឃុំបានបន្តឲ្យដឹងទៀតថា រួមទាំងក្មួយដែលរត់មកក្រៅផ្ទះ ក៏ត្រូវបានបុរសនេះតាមសម្លាប់កាប់ទាំងពូជតែម្ដង សរុបទៅកើនដល់១០នាក់ ។ ក្រោយពីសម្លាប់មនុស្សជាសមាជិកក្រុមគ្រួសាររបស់ខ្លួនច្រើនបែបនេះ ក៏បានជិះម៉ូតូគេចមកផ្ទះរបស់ខ្លួនវិញ និងព្យាយាមជិះម៉ូតូរត់គេចតែត្រូវបានកម្លាំងនគរបាលមូលដ្ឋានតាមស្ទាក់ចាប់បាន ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ