ទីក្រុងហុងកុង៖ ចំនួនអ្នកស្លាប់ដោយសារហេតុការណ៍ឆេះអគារស្នាក់នៅនៅទីក្រុងហុងកុងនោះបានកើនឡើងដល់៩៤នាក់ហើយបន្ទាប់ពីក្រុមអ្នកជួយសង្គ្រោះរកឃើញសាកសពជនរងគ្រោះជាបន្តបន្ទាប់។ ភ្នាក់ងារអគ្គិភ័យបានខិតខំបំពេញការងារឈានចូលដល់ថ្ងៃទីពីរដើម្បីពន្លត់ភ្លើងដែលនៅសេសសល់នៃអគារដ៏ខ្ពស់ស្កឹមស្កៃ។
កាលពីយប់មិញ ក្រុមអ្នកជួយសង្គ្រោះបានឆ្លុះពិលនៅក្នុងខ្មោចអគារដើម្បីពិនិត្យសភាពការណ៍ក្រោយពេលឆេះ។ ទីនេះជាបណ្ដុះអគារដែលមានផ្ទះជាង២ពាន់ល្វែង និងមានប្រជាជនរស់នៅជាង៤ពាន់នាក់នៅសង្កាត់ថៃប៉ូ (Tai Po)។ មន្ត្រីថ្នាក់មូលដ្ឋានប្រាប់ថាក្រុមសង្គ្រោះបន្តធ្វើការនៅក្នុងអគារដែលឆេះទាំងនោះ និងដើរឆ្លងពីបន្ទប់មួយទៅបន្ទប់មួយទៀតធ្វើម៉េចឱ្យគ្រប់បន្ទប់ទាំងអស់នៃបណ្ដុំអគារទាំង៧ខ្នង។ ធ្វើដូច្នេះដើម្បីធានាថាពួកគេនឹងរកឃើញចំនួនអ្នកស្លាប់គ្រប់ចំនួន។
អនុប្រធានផ្នែកអគ្គិភ័យប្រចាំទីក្រុងហុងកុងថ្លែងថាប្រតិបត្តិការពន្លត់ភ្លើងសឹងតែឈានចូលដល់ទីបញ្ចប់ហើយ។ ភ្នាក់ងារអគ្គិភ័យខិតខំធ្វើយ៉ាងណាទប់ស្កាត់មិនឱ្យកម្ទេចកម្ទី និងរងើកភ្លើងបង្កជាភ្លើងឆេះសាជាថ្មី។ កិច្ចការជាបន្តទៅទៀតគឺស្វែងរក និងជួយសង្គ្រោះ។ រហូតមកដល់ពេលនេះ មិនទាន់មានតួលេខជាក់លាក់ណាមួយបង្ហាញថាមនុស្សបាត់ខ្លួន ឬជាប់ផុងនៅក្នុងអគារមានប៉ុន្មាននាក់ទេ។ អភិបាលក្រុងហុងកុង លោកចនលី ថ្លែងថាគេបានដាច់ការទាក់ទងទាំងស្រុងជាមួយមនុស្ស២៧៩នាក់។
អាជ្ញាធរមិនបានធ្វើបច្ចុប្បន្នភាពទៅលើចំនួនអ្នកបាត់ខ្លួន ឬអ្នកដែលជាប់ផុងនៅក្នុងអគារទេ។ តាមរយៈវីឌីអូដែលគេថតបាន គេឃើញក្រុមជួយសង្គ្រោះដើរស្រាវជ្រាវមើលនៅតាមបន្ទប់អគារនៅក្នុងសភាពងងឹតសូន្យ។ មើលពីខាងក្រៅបង្អួចទៅក្នុងបន្ទប់ខ្លះ គេឃើញពន្លឺភ្លើងប្លុងៗពណ៌ទឹកក្រូច។ ភ្នាក់ងារអគ្គិភ័យបាន និងកំពុងបន្តការងាររបស់ខ្លួនចាប់តាំងពីរសៀលថ្ងៃពុធនៅពេលភ្លើងចាប់ផ្ដើមឆេះចេញពីរន្ធាឫស្សី និងសំណាញ់កៅស៊ូដែលគេប្រើប្រាស់សម្រាប់ជួសជុលអគារ។
អគ្គិភ័យនេះឆាបឆេះហាក់ដូចជាឆាប់រហ័សពេកហើយ។ ត្រឹមតែមួយប៉ប្រិចភ្នែកប៉ុណ្ណោះ ភ្លើងចាប់ផ្ដើមឆេះរាលដាលទៅអគារដែលនៅជិតៗនោះ។ ចំណែកភ្នាក់ងារសង្គ្រោះក៏ពិបាកចូលទៅក្នុងអគារដើម្បីជម្លៀសអ្នកជាប់ផុងនៅក្នុងអគារផងដែរ។ នៅពេលកំពុងឆេះនោះ មានកម្ទេចកម្ទី និងរន្ទាឫស្សីធ្លាក់មកប្រាវៗពីជាន់ខាងលើ។ មានមូលហេតុដទៃទៀតដែលធ្វើឱ្យមានមនុស្សស្លាប់ច្រើនដល់ថ្នាក់នេះដូចជាអាកាសធាតុក្ដៅ, ភ្លើងឆេះនៅក្នុងពេលយប់ងងឹត, រថយន្តសង្គ្រោះត្រូវបានស្កាត់ផ្លូវដោយរន្ទា និងកម្ទេចកម្ទីដែលធ្លាក់រាយប៉ាយនៅលើដី។
ជារួម នាយកដ្ឋានអគ្គិភ័យប្រកាសថាមនុស្សជាង៧០នាក់រងរបួស ក្នុងនោះ១១នាក់ជាភ្នាក់ងារអគ្គិភ័យ, ៩៤នាក់ស្លាប់ និង៩រយនាក់ជម្លៀសខ្លួនចេញពីអគារទាន់ពេលវេលា ហើយដឹកទៅស្នាក់នៅក្នុងទីជម្រកបណ្ដោះអាសន្នទាំងកណ្ដាលយប់។ នេះបើយោងតាមប្រភពពីអេភី (AP) និងប្រភពដទៃទៀត៕
ចែករំលែកព័តមាននេះ