ទីក្រុងការ៉ាកាស់៖ ភាពតានតឹងរវាងអាមេរិក និងវេណេហ្ស៊ូអេឡាឡើងកម្ដៅកាន់តែខ្លាំងនៅដំណាក់កាលចុងក្រោយនេះនៅពេលលោកត្រាំបញ្ជាឱ្យបញ្ជូននាវាចម្បាំង និងយន្តហោះកាន់តែច្រើនឡើងៗទៅឈប់សំចតនៅលើដែនសមុទ្រការីប៊ីនដែលស្ថិតមិនឆ្ងាយប៉ុន្មានពីដែនសមុទ្រវេណេហ្ស៊ូអេឡា។ កាលពីយប់មិញ លោកបង្ហើបឱ្យដឹងថាអាមេរិកនឹងចាប់ផ្ដើមយុទ្ធនាការតាមកម្ចាត់ក្រុមជួញដូរគ្រឿងញៀនតាមផ្លូវគោកវិញម្ដង។ លោកថ្លែងដូច្នេះបន្ទាប់ពីអាមេរិកបាញ់ប្រហារអូប័រដែលសង្ស័យដឹកគ្រឿងញៀនជាហូរហែតាមផ្លូវទឹក។ ប៉ុន្តែនៅតែមិនអាចបញ្ឈប់សកម្មភាពរបស់ពួកគេទាំងស្រុងបានឡើយ។
លោកត្រាំថ្លែងថាអ្នកប្រហែលជាបានកត់សម្គាល់រួចហើយថាប្រជាជនមិនចង់ឃើញ (ក្រុមជួញដូរគ្រឿងញៀន) ដឹកជញ្ជូនតាមសមុទ្រទេ។ យើងក៏ត្រៀមបញ្ឈប់សកម្មភាពរបស់ពួកគេតាមផ្លូវគោកផងដែរ។ ផ្លូវគោកងាយស្រួលបង្ក្រាបជាង ហើយនឹងចាប់ផ្ដើមនៅក្នុងពេលឆាប់ៗបំផុត។ លោកត្រាំថ្លែងដូចខាងលើនេះនៅក្នុងការសន្ទនាតាមប្រព័ន្ធវីឌីអូជាមួយបុគ្គលិកយោធា។ លោកថ្លែងដូចនេះត្រឹមតែប៉ុន្មានម៉ោងប៉ុណ្ណោះបន្ទាប់ពីលោកម៉ាឌូរ៉ូប្រកាសថាលោកត្រៀមខ្លួនរួចហើយដើម្បីទប់ទល់នឹងការវាយប្រហារ។
ឥឡូវនេះ គេឃើញថានាវាពិឃាតអាមេរិកឈ្មោះយូអែសអែស ក្រេវលី (USS Gravely) បានចូលចតនៅកំពង់ផែប្រទេសព័រតូរីកូ (Puerto Rico) រួមជាមួយនាវាចម្បាំងជាច្រើនទៀត។ លោកត្រាំចោទប្រកាន់ថាប្រធានាធិបតីវេណេហ្ស៊ូអេឡា លោកម៉ាឌូរ៉ូ ជាមេខ្លោងធំជាងគេនៅក្នុងការជួញដូរគ្រឿងញៀន។ លោកថាលោកចង់ផ្ដោតសំខាន់ទៅលើការការកម្ចាត់គ្រឿងញៀន មិនមែនចង់ផ្ដូររបបដឹកនាំនៅវេណេហ្ស៊ូអេឡាទេ។
ប៉ុន្តែលោកម៉ាឌូរ៉ូមិនគិតដូច្នេះទេ ម៉ាឌូរ៉ូយល់ថាលោកត្រាំចង់ផ្ដួលរំលំរបបដឹកនាំរបស់គាត់ក្រោមលេសថាកម្ចាត់គ្រឿងញៀន។ តាមពិត ករណីអាមេរិកបញ្ជូនទ័ពទៅផ្ដួលរំលំរដ្ឋាភិបាលនៅអាមេរិកខាងត្បូងក្រោមហេតុផលគ្រឿងញៀនវាមិនមែនជារឿងថ្មីទេ។ កាលពីឆ្នាំ១៩៨៩ អាមេរិកក្រោមការដឹកនាំរបស់លោកចចប៊ូសក៏ធ្លាប់បញ្ជូនទ័ពទៅផ្ដួលរំលំរដ្ឋាភិបាលប្រទេសប៉ាណាម៉ាម្ដងហើយក្រោមហេតុផលថាប្រធានាធិបតីប្រទេសនេះជួញដូរគ្រឿងញៀន។
សេតវិមានធ្លាប់ប្រកាសថាលោកម៉ាឌូរ៉ូនៅពីក្រោយការរត់ពន្ធគ្រឿងញៀនចូលប្រទេសអាមេរិកបណ្ដាលឱ្យពលរដ្ឋអាមេរិកស្លាប់ជាច្រើននាក់ក្នុងមួយឆ្នាំៗ។ នៅក្នុងស្ថានភាពប្រឈមមុខគ្នាកាន់តែខ្លាំងបែបនេះ រដ្ឋាភិបាលវេណេហ្ស៊ូអេឡាប្រកាសបិទខ្ទប់ក្រុមហ៊ុនអាកាសចរណ៍ចំនួន៦មិនឱ្យបើកចូលដែនអាកាសរបស់វេណេហ្ស៊ូអេឡាទេ។ ក្រុមហ៊ុនទាំងនោះត្រូវវេណេហ្ស៊ូអេឡាចោទប្រកាន់ពីបទប្រព្រឹត្ត «អំពើភេរវកម្មកម្រិតរដ្ឋាភិបាល» បន្ទាប់ពីក្រុមហ៊ុនទាំងនោះផ្អាកជើងហោះហើរចូលវេណេហ្ស៊ូអេឡាក្រោមការព្រមានពីអាជ្ញាធរអាកាសចរណ៍ស៊ីវិលសហព័ន្ធរបស់អាមេរិកហៅកាត់ថាអែហ្វអេអេ (FAA)។
អាជ្ញាធរអាកាសចរស៊ីវិលនៃប្រទេសវេណេហ្ស៊ូអេឡាប្រកាសថាក្រុមហ៊ុនអាកាសចរណ៍អ៊ីប៊ែរីយ៉ា (Iberia) របស់អេស្ប៉ាញ, ក្រុមហ៊ុនតាប (Tap) របស់ព័រទុយហ្កាល់, ក្រុមហ៊ុនអាវីយ៉ាន់កា (Avianca) របស់កូឡុំប៊ី និងក្រុមហ៊ុនឡាតាម (Latam) របស់ឈីលី និងប្រេស៊ីល និងក្រុមហ៊ុនអាកាសចរណ៍តួកគីនឹងត្រូវវេណេហ្ស៊ូអេឡាដកអាជ្ញាប័ណ្ណពីបទរួមគំនិតប្រព្រឹត្តអំពើភេរវកម្ម និងពីបទផ្អាកជើងហោះហើរដោយចិត្តឯង។ សូមរំលឹកថាកាលពីសប្ដាហ៍មុន អែហ្វអេអេបានចេញសេចក្ដីព្រមានទៅក្រុមហ៊ុនអាកាសចរណ៍នានាប្រយ័ត្នជួបនឹងគ្រោះថ្នាក់ធ្ងន់ធ្ងរបើសិនពួកគេនៅតែបន្តហោះហើរកាត់ដែនអាកាសវេណេហ្ស៊ូអេឡាព្រោះស្ថានការណ៍សន្តិសុខកាន់តែមិនស្រួលមែនទែនហើយ ហើយអាមេរិក និងវេណេហ្ស៊ូអេឡាអាចនឹងប៉ះទង្គិចគ្នាដោយយោធា។ នេះបើយោងតាមប្រភពពីរ៉យទ័រ អេប៊ីស៊ី និងប្រភពដទៃទៀត៕
ចែករំលែកព័តមាននេះ