រាជធានីភ្នំពេញ ៖ មានករណីឆេះទីតាំងកែច្នៃឈើធ្វើទ្វារ រាលដាលដល់ផ្ទះប្រជាពលរដ្ឋសរុប៩ខ្នង បង្កការភ្ញាក់ផ្អើលកាលពីវេលាម៉ោង១១និង៥២យប់ ថ្ងៃទី២៧ ខែវិច្ឆិកា ឆ្នាំ២០២៥ នៅលើកំណាត់ផ្លូវ៥៩៨ ក្បែរស្តុបត្រឡោកបែក…
រាជធានីភ្នំពេញ ៖ មានករណីឆេះទីតាំងកែច្នៃឈើធ្វើទ្វារ រាលដាលដល់ផ្ទះប្រជាពលរដ្ឋសរុប៩ខ្នង បង្កការភ្ញាក់ផ្អើលកាលពីវេលាម៉ោង១១និង៥២យប់ ថ្ងៃទី២៧ ខែវិច្ឆិកា ឆ្នាំ២០២៥ នៅលើកំណាត់ផ្លូវ៥៩៨ ក្បែរស្តុបត្រឡោកបែក សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ រហូតមកដល់ព្រឹកថ្ងៃទី២៨ វិច្ឆិកា ឆ្នាំ២០២៥ នេះ គេឃើញរថយន្តពន្លត់អគ្គិភ័យនៅតែបន្តបាញ់ពន្លត់ទីតាំងកើតហេតុ ។
ប្រភពព័ត៌មានបានឲ្យដឹងថា មុនពេលកើតហេតុ មានភ្លើងឆាបឆេះចេញពីទីតាំងកែច្នៃឈើធ្វើទ្វារ ខាងលើ បង្កជាផ្សែងខ្មៅយ៉ាងខ្លាំង ផ្អើលដល់អ្នកភូមិនាំគ្នាស្រែកឆោឡោ រត់យកបំពង់ពន្លត់អគ្គិភ័យបាញ់ពន្លត់ និងខ្លះទៀតយកទឹកជះ ប៉ុន្តែភ្លើងមិនថមថយនោះទេ ។
អ្នកឃើញហេតុការណ៍បានបន្តថា ដោយសារភ្លើងឆេះខ្លាំងឡើងៗ អ្នកភូមិក៏នាំគ្នារាយការណ៍ទៅសមត្ថកិច្ចមូលដ្ឋាន ដើម្បីស្នើរសុំរថយន្តពន្លត់អគ្គិភ័យ ជួយអន្តរាគមន៍ជាបន្ទាន់ ។
បន្ទាប់ពីទទួលដំណឹងខាងលើនេះ ការិយាល័យនគរបាលបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យជាច្រើនគ្រឿង ចេញពីគ្រប់គោលដៅការិយាល័យ ឆ្ពោះទៅកាន់ទីតាំងកើតហេតុ ដើម្បីអន្តរាគមន៍ភ្លាមៗ ។
ក្នុងការគ្រប់គ្រងស្ថានការណ៍អគ្គិភ័យខាងលើនេះបាន ប្រើប្រាស់រថយន្តពន្លត់អគ្គិភ័យជាច្រើនគ្រឿង សមត្ថកិច្ចជំនាញបានឲ្យដឹងថា អគ្គិភ័យនេះបានលេបត្របាក់ផ្ទះប្រជាពលរដ្ឋសរុបចំនួន៩ខ្នងដែលសង់ពីឈើប្រក់សង្ក័សី និងបង្កការខូចខាតទ្រព្យសម្បត្តិស្ទើរទាំងស្រុង ប៉ុន្តែមិនបង្កអោយមានមនុស្សរងរបួសក្នុងហេតុការណ៍ខាងលើនេះទេ។
មន្ត្រីជំនាញបានបន្ថែមថា ចំពោះមូលហេតុដែលបង្កអោយឆាបឆេះ មន្រីជំនាញកំពុងធ្វើការស្រាវជ្រាវ ៕
ចែករំលែកព័តមាននេះ