ខេត្តប៉ៃលិន ៖ រហូតមកដល់ថ្ងៃទី២៧ ខែវិច្ឆិកា ឆ្នាំ២០២៥នេះ គេសង្កេតឃើញកសិករមួយចំនួន បានប្រកបមុខរបរដាំបន្លែត្រសក់ទ្រើង ឬត្រសក់ផ្អ និងបន្លែសណ្តែកកួរជាច្រើនរង ដើម្បីប្រមូលផលលក់…
ខេត្តប៉ៃលិន ៖ រហូតមកដល់ថ្ងៃទី២៧ ខែវិច្ឆិកា ឆ្នាំ២០២៥នេះ គេសង្កេតឃើញកសិករមួយចំនួន បានប្រកបមុខរបរដាំបន្លែត្រសក់ទ្រើង ឬត្រសក់ផ្អ និងបន្លែសណ្តែកកួរជាច្រើនរង ដើម្បីប្រមូលផលលក់ យកថវិកាផ្គត់ផ្គង់ជីវភាពប្រចាំថ្ងៃ និងសងជំពាក់បំណុលគេ។ តែដោយពួកគាត់ គិតគូរអំពីផលប៉ះពាល់ដល់សុខភាពប្រជាពលរដ្ឋខ្មែរនៅតាមភូមិនានា ដែលទិញបន្លែយកទៅទទួលទានជួបជុំគ្រួសារ ទើបពួកគាត់មិនប្រើថ្នាំពុល និងដាក់ជីគីមី ស្រោចទៅលើដំណាំបន្លែរបស់ខ្លួន ដើម្បីឱ្យឆាប់ធំលឿននោះឡើយ គឺប្រើតែជីធម្មជាតិ ដូចជាលាមកសត្វគោ សត្វមាន់ ឬអង្កាម ហើយនឹងជីកំប៉ុស ដាក់នៅលើគល់ដំណាំប៉ុណ្ណោះ ។
បើតាមប្រភពព័ត៌មានពីស្ត្រីម្នាក់ ឈ្មោះ ហាក់ នី អាយុ៥៧ឆ្នាំ រស់នៅក្នុងភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានរៀបរាប់ឱ្យភ្នាក់ងារយើងដឹងថា គាត់បានដាំបន្លែត្រសក់ទ្រើងចំនួន៣០រង និងបន្លែសណ្តែកកួរចំនួន១៤រង នៅលើដីចំការក្បែរផ្ទះរបស់ខ្លួន ។
គាត់បន្តទៀតថា ការដាំបន្លែទាំងអស់នេះ មិនប្រើជីគីមី ឬប្រើថ្នាំពុល បាញ់ស្រោចទៅលើបន្លែរបស់ខ្លួនឡើយ ដើម្បីជៀសវាងផលប៉ះពាល់ដល់សុខភាពខ្លួនឯងផង និងប៉ះពាល់ដល់សុខភាពបងប្អូនប្រជាពលរដ្ឋ ដែលទិញយកទៅទទួលទានប្រចាំថ្ងៃថែមទៀត។ ម្យ៉ាងវិញទៀត ការដាំបន្លែខ្លួនឯង គាត់ក៏មិនសូវចំណាយថវិកាទៅទិញបន្លែអន្លក់នៅឯទីផ្សារ ពោលគឺទិញតែត្រី ឬសាច់ប៉ុណ្ណោះយកមកធ្វើម្ហូប។ ដូច្នេះហើយ ទើបគាត់មិនប្រើជីគីមី ដែលធ្វើឱ្យប៉ះពាល់ដល់សុខភាព ព្រោះគាត់សង្កេតឃើញបច្ចុប្បន្នប្រជាពលរដ្ឋទទួលរងការរលាកក្រពះ ពោះវៀន និងកើតជំងឺលើសឈាម ក៏ដូចជាជាជំងឺផ្សេងៗ ដោយសារតែបញ្ហាម្ហូបអាហារមួយចំនួន ឬបន្លែដែលទិញយកទៅទទួលទានមានសារធាតុគីមី ដែលគេប្រើច្រើន ហើយយើងមិនដឹង ។
ចំណែកកសិករម្នាក់ ឈ្មោះ យ៉ន់ ភេទប្រុស ប្រពន្ធឈ្មោះ នួន រស់នៅក្នុងភូមិខាងលើ ក៏បានប្រាប់ភ្នាក់ងារយើងឱ្យដឹងដែរថា ពួកគាត់បានដាំបន្លែត្រសក់ទ្រើង និងបន្លែសណ្តែកកួរជិតកន្លះហិកតា ដោយដាំឆ្លាស់គ្នា ហើយក៏ប្រមូលផលជាបន្តបន្ទាប់ ខណៈដែលប៉ុន្មានខែនេះ គាត់ប្រមូលផលលក់បានសរុបជាង៧លានរៀល ហើយក៏បានយកទៅសងជំពាក់បំណុលគេជាបណ្តើរៗ។ ចំណែកឯបន្លែរបស់ពួកគាត់ ក៏មិនប្រើជីគីមី ឬថ្នាំពុលដែលធ្វើឱ្យប៉ះពាល់ដល់សុខភាពប្រជាពលរដ្ឋនោះឡើយ។ ពួកគាត់ក៏ធានាចំពោះបន្លែរបស់ខ្លួន ព្រោះពួកគាត់សព្វថ្ងៃនេះ មិនសូវហ៊ានទិញបន្លែ ដែលឈ្មួញលក់ដូរនៅតាមទីផ្សារនោះឡើយ ដោយព្រួយបារម្ភក្រែងលោគេប្រើថ្នាំពុល ឬជីគីមីខ្ពស់ អាចប៉ះពាល់ដល់សុខភាព ទើបគាត់សុខចិត្តបេះបន្លែនៅក្នុងចំការរបស់ខ្លួនយកទៅទទួលទានជួបជុំក្រុមគ្រួសារ។ លើសពីនេះ ពួកគាត់ដាំបន្លែបន្តបន្ទាប់គ្នា ដោយបេះអស់ផ្នែកម្ខាង មិនយូរប៉ុន្មាន នៅផ្នែកម្ខាងទៀតក៏ប្រមូលផលដែរ។ ដូច្នេះហើយ ទើបធ្វើឱ្យបន្លែនៅក្នុងដីចំការបស់ខ្លួនមានជាប់ជាប្រចាំមិនខ្វះខាត ក្នុងការយកទៅទទួលទានជាមួយក្រុមគ្រួសារ និងបេះលក់ដូរនោះទេ ។
ប្រភពដដែលបញ្ជាក់បន្ថែមថា បន្លែត្រសក់ និងសណ្តែកកួរបច្ចុប្បន្ននេះ ឈ្មួញទិញត្រឹមតែ១គីឡូក្រាម តម្លៃ៥០០ទៅ៦០០រៀលប៉ុណ្ណោះ។ តែបើសិនជានៅពេលណាមានការខ្វះខាតបន្លែខ្លាំង បន្លែរបស់ពួកគាត់ អាចលក់បានក្នុង១គីឡូក្រាមចាប់ពី២៥០០ទៅ៣០០០រៀលឯណោះ។ ជាក់ស្តែង បើសិនជាបន្លែរបស់ខ្លួនលក់បានតម្លៃត្រឹមនេះជាប់ជាប្រចាំ នោះនឹងមិនខ្វះខាតថវិកាសម្រាប់ចំណាយប្រចាំថ្ងៃ និងយកទៅសងជំពាក់គេបានគ្រប់គ្រាន់ផងដែរ៕
ចែករំលែកព័តមាននេះ