រាជធានីភ្នំពេញ ៖ នៅវិមានសាមគ្គីភាព នៃព្រឹទ្ធសភា នារសៀលថ្ងៃទី៣០ ខែមិថុនា ឆ្នាំ២០២៦ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម នាយឧត្តមសេនីយ៍ លឿង តាមក្វាង (Lương Tam Quang) រដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម ចូលជួបសម្ដែងការគួរសម និងពិភាក្សាការងារ។
ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបថា នៅក្នុងជំនួបនោះ សម្ដេចតេជោ ហ៊ុន សែន បានសម្ដែងនូវការស្វាគមន៍ចំពោះឯកឧត្តម លឿង តាមក្វាង និងគណៈប្រតិភូក្នុងដំណើរមកកាន់ប្រទេសកម្ពុជាដើម្បីចូលរួមនៅក្នុងកិច្ចប្រជុំថ្នាក់រដ្ឋមន្ត្រីលើកទី២ រវាងរដ្ឋមន្ត្រីក្រសួងមហាផ្ទៃកម្ពុជា រដ្ឋមន្ត្រីក្រសួងសន្តិសុខឡាវ និងរដ្ឋមន្ត្រីក្រសួងនគរបាលវៀតណាម ដែលធ្វើឡើងនៅក្នុងប្រទេសកម្ពុជា។ សម្ដេចក៏បានអបអរសាទរចំពោះលទ្ធផលនៃកិច្ចប្រជុំរដ្ឋមន្ត្រីលើកទី២ដែលបានបញ្ចប់ប្រកបដោយផ្លែផ្កា។
នៅក្នុងឱកាសនោះ ឯកឧត្តម លឿង តាមក្វាង បានសម្ដែងនូវការអរគុណចំពោះសម្ដេចតេជោដែលបានអនុញ្ញាតឱ្យឯកឧត្តម និងប្រតិភូបានជួបសម្ដែងការគួរសមនៅក្នុងឱកាសនេះ។ ឯកឧត្តមបានលើកឡើងថា លទ្ធផលនៃកិច្ចប្រជុំថ្នាក់រដ្ឋមន្ត្រីលើកទីពីរដែលធ្វើឡើងនៅក្នុងប្រទេសកម្ពុជានេះ បានបង្ហាញយ៉ាងច្បាស់អំពីចំណងមិត្តភាពរវាងប្រទេសទាំងបី កម្ពុជា ឡាវ និងវៀតណាម ហើយជាពិសេសគឺមិត្តភាពរវាងកម្ពុជា និងវៀតណាម និងបានលើកឡើងថា កម្ពុជា និងវៀតណាម មានទំនាក់ទំនងជាប្រពៃណីនឹងគ្នាជាយូរមកហើយ ដូច្នេះបញ្ហាទាក់ទងទៅនឹងសន្តិសុខប្រទេសទាំងពីរត្រូវតែជួយគាំទ្រគ្នាទៅវិញទៅមក ដែលជាកត្តាដ៏សំខាន់ក្នុងការធានាបាននូវសន្តិសុខរវាងប្រទេសទាំងពីរ ។
បន្ថែមពីនោះ ឯកឧត្តមក៏បានលើកឡើងថា ចំពោះសន្តិសុខក្នុងការប្រយុទ្ធប្រឆាំងទៅនឹងកម្លាំងណាមួយដែលប្រើប្រាស់ទឹកដីម្ខាង ហើយប្រឆាំងទៅនឹងប្រទេសមួយទៀត ជាចំណុចដែលប្រទេសកម្ពុជា និងវៀតណាមក៏ដូចជាឡាវ បានរួមសាមគ្គីគ្នាក្នុងការធ្វើកិច្ចការងារនេះដើម្បីកុំឱ្យមានភាពអសន្តិសុខកើតឡើង ។
ត្រង់ចំណុចនេះសម្ដេចតេជោបានសម្ដែងការពេញចិត្ត និងគាំទ្រចំពោះការលើកឡើងរបស់ឯកឧត្តមរដ្ឋមន្ត្រីក្រសួងនគរបាលវៀតណាម ដោយសម្ដេចបានសង្កត់ធ្ងន់ថា ចំណុចដែលជៀសវាងឱ្យបាននោះ គឺជៀសវាងកុំឲ្យមានការប្រើប្រាស់កម្លាំងនៅក្នុងប្រទេសណាមួយប្រឆាំងប្រទេសណាមួយទៀត ឧទាហរណ៍ដូចជាការប្រើប្រាស់កម្លាំងលើទឹកដីនៅក្នុងប្រទេសវៀតណាម ហើយប្រឆាំងទៅនឹងកម្ពុជា ឬក៏ប្រើប្រាស់ទឹកដីកម្ពុជា ប្រឆាំងទៅនឹងវៀតណាម ដែលចំណុចនេះយើងត្រូវសហការគ្នាធ្វើយ៉ាងណាកុំឲ្យមានករណីបែបនេះកើតឡើង ។
បន្ថែមលើសពីនេះ សម្ដេចតេជោក៏បានជំរុញឱ្យប្រទេសទាំងពីរ ជាពិសេសអាជ្ញាធរនៅតាមមូលដ្ឋាន តាមបណ្ដាព្រំដែនរវាងកម្ពុជា និងវៀតណាម ត្រូវសហការគ្នាជាប្រចាំ ដើម្បីធានាឱ្យបាននូវសន្តិសុខនៅតាមព្រំដែន ពោលគឺរក្សាឱ្យបាននូវព្រំដែនមិត្តភាព សន្តិភាព និងកិច្ចសហប្រតិបត្តិការ និងការអភិវឌ្ឍ រួមជាមួយគ្នា ដែលជាអំណោយផលដល់ការធ្វើពាណិជ្ជកម្មរវាងប្រទេសទាំងពីរ។ សម្ដេចតេជោក៏បានសង្កត់ធ្ងន់ទៅលើការរួមគ្នាប្រឆាំងទៅនឹងព័ត៌មានក្លែងក្លាយក្នុងចេតនាបំបែកបំបាក់នូវទំនាក់ទំនងរវាងកម្ពុជា និងវៀតណាម ផងដែរ។
ចុងក្រោយ សម្ដេចតេជោ ហ៊ុន សែន បានជូនពរ ឯកឧត្តមលឿង តាមក្វាង និងគណៈប្រតិភូធ្វើដំណើរត្រឡប់ទៅកាន់ប្រទេសវៀតណាមវិញប្រកបដោយសេចក្តីសុខ សុវត្ថិភាព៕
ចែករំលែកព័តមាននេះ