ទីក្រុងវ៉ាស៊ីនតោន៖ អាមេរិកប្រកាសថាខ្លួននឹងស្ថិតនៅជាមួយក្រុមសម្ព័ន្ធមិត្តរបស់ខ្លួននៅទ្វីបអឺរ៉ុបដើម្បីរួមគ្នាការពារបណ្ដាប្រទេសនៅតំបន់បាល់ទិច។ នេះបើយោងតាមការអះអាងរបស់មេបញ្ជាការយោធាអាមេរិកនៃកងអង្គភាពទ័ពជើងគោករបស់អង្គការណតូប្រចាំនៅទ្វីបអឺរ៉ុប។ ការថ្លែងដូច្នេះចំពេលដែលអង្គការណាតូបង្កើតបញ្ជាការដ្ឋានថ្មីមួយទៀតនៅតំបន់បាល់ទិច (ឡាតវី អេស្តូនី និងលីទុយអានី)។ ឧត្ដមសេនីយ៍គ្រីស ដូណាហ៊ូ (Chris Donahue) ថ្លែងថាអ្នកត្រៀមខ្លួនធ្វើកិច្ចការជាច្រើនទៀត ហើយនឹងអនុវត្តដូចពាក្យសន្យារបស់ខ្លួន។ ចំណែកអាមេរិកនឹងស្ថិតនៅជាមួយអ្នកជានិច្ច។
លោកថ្លែងថាយុទ្ធសាស្ត្រទប់ទល់នឹងសត្រូវគេធ្វើបែបនេះ។ ពោលគឺមិនមែនជាការនិយាយបានតែពាក្យសម្ដីចេញពីតុថ្លែងសុន្ទរកថានោះទេ។ ប៉ុន្តែជាការសន្យា ហើយត្រូវតែហ៊ានប្រឡូកជាក់ស្ដែងទោះបីត្រូវដើរលុយភក់ក៏ដោយ។ លោកដូណាហ៊ូនឹងបញ្ចប់តំណែងនៅថ្ងៃព្រហស្បតិ៍សប្ដាហ៍នេះ។ លោកកាន់មុខនាទីត្រួតគ្នាជាមេបញ្ជាការកងទ័ពអាមេរិកប្រចាំទ្វីបអឺរ៉ុបផង និងជាមេបញ្ជាការប្រចាំទ្វីបអាហ្វ្រិកផង។ កងទ័ពរបស់អង្គការណាតូនៅតំបន់បាល់ទិច និងនៅប៉ូឡូញភាគខាងជើងគិតត្រឹមវេលានេះស្ថិតក្រោមការគ្រប់គ្រងរបស់បញ្ជាការដ្ឋានតែមួយដែលចម្រុះជាតិសាសន៍។
នៅពេលបង្កើតបញ្ជាការដ្ឋានយោធាថ្មីនេះ អង្គការណាតូនឹងបញ្ជូនកងទ័ពបន្ថែមទៀតទៅឈរជើងនៅតំបន់បាល់ទិច។ សម្រាប់ពេលនេះ កងវរសេនាធំចំនួន២នៅអេស្តូនី និងឡាតវីស្ថិតក្រោមការគ្រប់គ្រងរបស់កងអង្គភាពហូឡង់ និងអាល្លឺម៉ង់ដែលមានទីស្នាក់ការនៅទីក្រុងមូអឹនស្ទើ (Muenster) ប្រទេសអាល្លឺម៉ង់។ អង្គការណាតូប្រមើលឃើញថារុស្ស៊ីអាចនឹងវាយប្រហាររដ្ឋជាសមាជិករបស់ខ្លួននៅឆ្នាំ២០២៩ ប្រសិនបើប្រទេសនេះ (រុស្ស៊ី) នៅតែបន្តពង្រីកកម្លាំងយោធាដូចសព្វថ្ងៃនេះ។
រដ្ឋមន្ត្រីការពារជាតិអាល្លឺម៉ង់ លោកបូរីស ពីស្តូរាស (Boris Pistorius) ថ្លែងថាការបង្កើតបញ្ជាការដ្ឋានយោធាថ្មីនេះជាសក្ខីភាពបង្ហាញពីការប្ដេជ្ញាចិត្តរបស់អង្គការណាតូក្នុងការការពារទឹកដីរបស់សម្ព័ន្ធមិត្តខ្លួនមិនឱ្យបាត់បង់សូម្បីតែមួយអ៊ីញ។ លោកថាវាគឺជាការឆ្លុះបញ្ចាំងប្រកបដោយភាពរឹងមាំដែលយើងអាចមើលឃើញទាំងអស់គ្នាថាណាតូមានឯកភាពផ្ទៃក្នុង, មានការត្រៀមលក្ខណៈសម្បត្តិគ្រប់គ្រាន់ និងមានការប្ដេជ្ញាចិត្តរួមគ្នាការពារទឹកដីគ្រប់អ៊ីញរបស់សម្ព័ន្ធមិត្តយើង។ នៅពេលដាក់ឱ្យដំណើរការពេញលេញ កងអង្គភាពទ័ពអាចបញ្ជាកងវរសេនាធំចំនួនបីដែលមានកងទ័ពចន្លោះពី៤ម៉ឺនទៅ៦ម៉ឺននាក់៕ ប្រភព៖ Reuters
ចែករំលែកព័តមាននេះ