ទីក្រុងតូក្យូ៖ ប្រទេសជប៉ុនច្រានចោលព័ត៌មានដែលចុះផ្សាយនៅលើទំព័រសារព័ត៌មានអាមេរិកវ៉លស្ទ្រីតជើណល (Wall Street Journal) ត្រង់ចំណុចដែលថា «លោកត្រាំបានផ្ដល់ដំបូន្មានឱ្យនាយករដ្ឋមន្ត្រីជប៉ុនកុំបង្កបញ្ហាជាមួយប្រទេសចិនពាក់ព័ន្ធនឹងអធិបតេយ្យភាពរបស់កោះតៃវ៉ាន់»។ ជម្លោះការទូតរវាងចិន និងជប៉ុនចាប់ផ្ដើមឡើងកម្ដៅខ្លាំងបន្ទាប់ពីលោកស្រីតាកាអ៊ីឈិថ្លែងនៅក្នុងរដ្ឋសភាកាលពីថ្ងៃទី៧ ខែវិច្ឆិកាថាជប៉ុនអាចនឹងធ្វើអន្តរាគមន៍យោធាបើសិនចិនវាយប្រហារតៃវ៉ាន់។
យោងតាមក្រសួងការបរទេសចិន នៅក្នុងការសន្ទនាគ្នាជាមួយលោកត្រាំកាលពីថ្ងៃចន្ទ ប្រធានាធិបតីចិន លោកស៊ីជីនពីង បានលើកឡើងអំពីបញ្ហានេះ (ការថ្លែងរបស់លោកស្រីតាកាអ៊ីឈិពាក់ព័ន្ធនឹងបញ្ហាតៃវ៉ាន់)។ លោកស៊ីជីនពីងបញ្ជាក់ប្រាប់លោកត្រាំថាបញ្ហាយកកោះតៃវ៉ាន់មកដាក់ក្រោមការគ្រប់គ្រងរបស់ប្រទេសចិនគឺជាផ្នែកមួយនៃការរៀបចំសណ្ដាប់ពិភពលោកក្រោយសង្គ្រាម (លោកលើកទីពីរ)។
វ៉លស្ទ្រីតជើណលចុះផ្សាយកាលពីថ្ងៃព្រហស្បតិ៍ថាបន្ទាប់ពីសន្ទនាគ្នាតាមទូរស័ព្ទរួច លោកត្រាំមិននៅរង់ចាំយូរទេបានហៅទូរស័ព្ទទៅលោកស្រីតាកាអ៊ីឈីជាបន្ទាន់ និងបានផ្ដល់ដំបូន្មានឱ្យលោកស្រីជៀសវាងកុំបង្កភាពតានតឹងជាមួយប្រទេសចិនដោយសារបញ្ហាកោះតៃវ៉ាន់។ សារព័ត៌មានដដែលនេះចុះផ្សាយអត្ថបទដូចខាងលើដោយដកស្រង់ប្រភពពីមន្ត្រីរដ្ឋាភិបាលជប៉ុនដែលស្នើសុំមិនបញ្ចេញឈ្មោះ និងមន្ត្រីរដ្ឋាភិបាលអាមេរិកដែលស្នើសុំមិនបញ្ចេញឈ្មោះដូចគ្នា។
ដូច្នេះ អ្នកនាំពាក្យរដ្ឋាភិបាលជប៉ុន លោកគីហារ៉ា (Minoru Kihara) បានច្រានចោលអត្ថបទដែលចុះផ្សាយនោះ។ អ្នកនាំពាក្យរូបនេះថ្លែងថាការពិតមិនដូចអ្វីដែលបានចុះផ្សាយឡើយ។ លោកនិយាយដោយសង្ខេបតែត្រឹមនេះដោយមិនធ្វើអត្ថាធិប្បាយលម្អិតទេ។ លោកស្រីតាកាអ៊ីឈិថ្លែងថានៅក្នុងការសន្ទនាគ្នានោះ លោកស្រី និងលោកត្រាំបានពិភាក្សាគ្នាអំពីលទ្ធផលនៃការសន្ទនាគ្នារវាងលោកត្រាំ និងលោកស៊ីជីនពីង ហើយពិភាក្សាអំពីទំនាក់ទំនងទ្វេភាគី (រវាងជប៉ុន និងអាមេរិក)។
លោកស្រីថ្លែងថា «លោកប្រធានាធិបតីត្រាំថ្លែងថាប្រទេសយើងជាមិត្តដ៏ជិតស្និទ្ធនឹងគ្នា និងថាលោកស្រីអាចហៅទូរស័ព្ទទៅលោកពេលណាក៏បាន»។ ប៉ុន្តែបើតាមការចុះផ្សាយរបស់វ៉លស្ទ្រីតជើណល មន្ត្រីរដ្ឋាភិបាលជប៉ុនដែលស្នើសុំមិនបញ្ចេញឈ្មោះចាត់ទុកសារនយោបាយរបស់លោកត្រាំនៅពេលនោះជាការគួរឱ្យព្រួយបារម្ភ។ ប្រភពដដែលនេះអះអាងថានៅក្នុងពេលនេះប្រទេសចិន និងអាមេរិកកំពុងតែមានជម្លោះពាណិជ្ជកម្មជាមួយគ្នា។ គ្រាន់តែថាប្រទេសទាំង២យល់ព្រមព្យួរទុកការដំឡើងពន្ធគ្នាទៅវិញទៅមក។
បញ្ហាមួយដែលនៅជាប់ជំពាក់មុខគ្នាដោះស្រាយមិនទាន់ចេញផង ថែមរឿងតៃវ៉ាន់មួយទៀតវាធ្វើឱ្យសាំញ៉ាំកាន់តែខ្លាំង។ ដូច្នេះ លោកត្រាំមិនចង់ឱ្យបញ្ហាតៃវ៉ាន់ក្លាយជាផ្ទាំងពពកខ្មៅតាមរំខានទំនាក់ទំនងពាណិជ្ជកម្មចិន និងអាមេរិកទេ។ នៅក្នុងការព្រមព្រៀងគ្នាបន្ធូរបន្ថយភាពតានតឹងរវាងចិន និងអាមេរិកកាលពីខែតុលា លោកស៊ីជីនពីងសន្យាទិញផលិតផលកសិកម្មច្រើនៗពីកសិករអាមេរិកដែលកំពុងរងគ្រោះយ៉ាងដំណំដោយសារសង្គ្រាមពាណិជ្ជកម្ម។ នេះបើយោងតាមការដកស្រង់ប្រភពពីឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ