ទីក្រុងហុងកុង៖ នៅទីបំផុត ភ្នាក់ងារអគ្គិភ័យនៅទីក្រុងហុងកុងអាចពន្លត់ភ្លើងឆេះអគារស្នាក់នៅរបស់ប្រជាជនជាច្រើនខ្នងដែលឆេះតាំងពីល្ងាចថ្ងៃពុធនោះបានជោគជ័យហើយ។ ហេតុការណ៍នេះបានឆក់យកជីវិតមនុស្សយ៉ាងតិច៦៥នាក់ ខណៈដែលមនុស្សជិត៣រយនាក់ទៀតនៅតែបន្តបាត់ខ្លួន។ នគរបាលក៏ចាប់ផ្ដើមស៊ើបអង្កេតសំណុំរឿងនេះជាបណ្ដើរៗផងដែរ។
នគរបាលនិយាយថាមូលហេតុនៃការឆេះនេះអាចបណ្ដាលមកពីការធ្វេសប្រហែសដែលក្រុមហ៊ុនម៉ៅការខាងសាងសង់ប្រើប្រាស់សម្ភារៈគ្មានសុវត្ថិភាព។ ក្រុមអ្នកជួយសង្គ្រោះត្រូវតស៊ូនឹងភ្លើងឆេះយ៉ាងក្ដៅគគុក និងមានផ្សែងហុយយ៉ាងខ្មៅងងឹតអស់រយៈពេលជាងមួយថ្ងៃ។ ពួកគេព្យាយាមស្វែងរកមនុស្សដែលអាចនឹងជាប់ផុងនៅក្នុងអគារនៅជាន់ខាងលើនៃបណ្ដុំអគារវ៉ាងហ្វុកកួ (Wang Fuk Court) នៅសង្កាត់ថៃប៉ូ (Tai Po)។
អភិបាលក្រុងហុងកុង លោកចនលី ថ្លែងថារដ្ឋាភិបាលនឹងបង្កើតមូលនិធិមានទឹកប្រាក់៣រយលានដុល្លារហុងកុង ឬស្មើនឹងជាង៣៨លានដុល្លារអាមេរិកដើម្បីជួយប្រជាជនរងគ្រោះដោយសារការឆេះអគារលើកនេះ។ មន្ទីរគ្រប់គ្រងដែនដីនៃទីក្រុងហុងកុងក៏កំពុងពិភាក្សាគ្នាថាគួរចាប់ផ្ដើមប្រើប្រាស់រន្ធាសម្រាប់ជួសជុល ឬសាងសង់អគារធ្វើអំពីដែកជំនួសឱ្យការប្រើរន្ធាឫស្សីដែលនាំឱ្យឆេះឆ្លងពីអគារមួយទៅអគារមួយទៀតដូចករណីនេះអីចឹង។
អគារទាំង៨ខ្នងនៃប្លុកនេះមានផ្ទះ២ពាន់ល្វែង និងមានប្រជាជនរស់នៅជាង៤៦០០នាក់។ គេឃើញនារីម្នាក់ដើររកកូនរបស់គាត់ដែលកំពុងបាត់ខ្លួន។ នៅក្នុងដៃរបស់គាត់មានកាន់រូបថតកូនស្រីនៅពេលទទួលសញ្ញាប័ត្រ។ ស្ត្រីវ័យ៥២ឆ្នាំរូបនេះយំខ្សឹកខ្សួលអួលដើមកថាគាត់មិនទាន់ទទួលដំណឹងពីស្វាមីរបស់គាត់ និងកូនស្រីនៅឡើយទេ។ គាត់ប្រាប់ថាគាត់ឈ្មោះង៉។
នគរបាលបានចុះស្រាវជ្រាវក្រុមហ៊ុនផ្ដល់សេវាខាងជួសជុលអគារដែលឆេះទាំងនោះព្រមទាំងរឹបអូសបានឯកសារមួយចំនួន។ រដ្ឋាភិបាលកំណត់អត្តសញ្ញាណក្រុមហ៊ុននោះឈ្មោះប្រេះស្ទីស ខន់ស្ត្រាក់សិន អេន អឹនជីននារីង ខំផេនី លីមីតធីត (Prestige Construction and Engineering Company)។ ក្រុមហ៊ុនខាងលើនេះមិនព្រមលើកទូរស័ព្ទទាល់តែសោះទោះបីអ្នកសារព័ត៌មានព្យាយាមទាក់ទងជាច្រើនលើកច្រើនសាក៏ដោយ។
មន្ត្រីនគរបាលមួយរូបថ្លែងថាយើងមានហេតុផលគ្រប់គ្រាន់ដើម្បីនិយាយថាក្រុមហ៊ុនខាងលើនេះធ្វេសប្រហែសនៅក្នុងការងាររបស់ខ្លួន។ ហេតុនេះហើយបានជាឈានដល់ការឆេះរាលដាលយ៉ាងខ្លាំងដល់ថ្នាក់គ្រប់គ្រងសភាពការណ៍លែងបាន។ នៅទីបំផុត មនុស្សស្លាប់គរជើងគ្នា។ ប្រធានាធិបតីចិនបានអំពាវនាវឱ្យអាជ្ញាធរប្រើប្រាស់គ្រប់មធ្យោបាយដើម្បីកាត់បន្ថយជាអតិមានូវការខាតបង់ទ្រព្យសម្បត្តិ និងអាយុជីវិតរបស់មនុស្ស។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ