ទីក្រុងប៉េកាំង៖ ក្រសួងការពារជាតិចិនថ្លែងនៅថ្ងៃនេះថាជប៉ុននឹងបង់នូវតម្លៃដ៏ខ្ពស់បើសិនពួកគេដើរនយោបាយខុសពាក់ព័ន្ធនឹងបញ្ហាតៃវ៉ាន់។ ការថ្លែងដូច្នេះដើម្បីឆ្លើយតបទៅនឹងព័ត៌មានដែលថាជប៉ុនត្រៀមដាក់ពង្រាយជើងទម្របាញ់មីស៊ីលរយៈចម្ងាយមធ្យមនៅលើកោះដាច់ស្រយាលមួយស្ថិតចម្ងាយ១១០គីឡូម៉ែត្រពីដែនសមុទ្រតៃវ៉ាន់។ ជប៉ុនអះអាងថាមីស៊ីលនេះទុកសម្រាប់ការពារខ្លួនតែប៉ុណ្ណោះ ពោលគឺទុកសម្រាប់បាញ់នាវា ឬយន្តហោះដែលបំពានដែនអាកាសជប៉ុន។ ប៉ុន្តែចិនព្រមានថានេះជាទង្វើដ៏គ្រោះថ្នាក់បំផុត។
ការថ្លែងរបស់ក្រសួងការពារជាតិចិនដូចខាងលើនេះស្របពេលដែលប្រទេសទាំង២មានជម្លោះការទូតយ៉ាងល្វីងជូរចត់នឹងគ្នាបន្ទាប់ពីនាយករដ្ឋមន្ត្រីជប៉ុន លោកស្រីតាកាអ៊ីឈិ ប្រកាសអំពីផែនការបញ្ជូនកងទ័ពទៅជួយតៃវ៉ាន់បើសិនកោះនេះរងការវាយប្រហារពីកងទ័ពចិន។ រដ្ឋមន្ត្រីការពារជាតិជប៉ុនបានថ្លែងកាលពីថ្ងៃអាទិត្យថាជប៉ុននឹងដាក់ពង្រាយជើងទម្របាញ់មីស៊ីលពីគោកទៅអាកាសនោះនៅលើកោះយ៉ូណាគូនី (Yonaguni)។
ប្រទេសចិនថ្លែងថាការដោះស្រាយបញ្ហាតៃវ៉ាន់ជាកិច្ចការរបស់ប្រទេសចិន និងគ្មានពាក់ព័ន្ធនឹងប្រទេសជប៉ុនទេ។ អ្នកនាំពាក្យក្រសួងការពារជាតិចិន លោកជាំងពីន (Jiang Bin) ថ្លែងថាប្រទេសជប៉ុនមិនត្រឹមតែមិនចងចាំទង្វើឈ្លានពានដ៏ឃោរឃៅរបស់ខ្លួនកាលពីអតីតកាល និងការដាក់អាណានិគមទៅលើកោះតៃវ៉ាន់ប៉ុណ្ណោះទេ ប៉ុន្តែជប៉ុននៅតែធ្វើផ្គើននឹងទស្សនៈពិភពលោក និងចង់ធ្វើអន្តរាគមន៍យោធានៅច្រកសមុទ្រតៃវ៉ាន់ថែមទៀត។
អ្នកនាំពាក្យរូបនេះថ្លែងបន្តទៀតថាកងទ័ពរំដោះប្រជាជនចិនមានឥទ្ធិពលខ្លាំងក្លា និងមានមធ្យោបាយដ៏គួរឱ្យជឿទុកចិត្តក្នុងការយកឈ្នះពួកបច្ចាមិត្តឈ្លានពាន។ បើជប៉ុនហ៊ានដើរជ្រុលជ្រួសសូម្បីតែពាក់កណ្ដាលជំហានក៏អាចនឹងនាំទុក្ខដាក់ខ្លួនដែរ។ ជប៉ុននឹងបង់នូវតម្លៃដ៏ខ្ពស់ចំពោះទង្វើរបស់ពួកគេ។
នៅសប្ដាហ៍នេះ ប្រធានាធិបតីតៃវ៉ាន់ទើបតែប្រកាសឱ្យដឹងអំពីគម្រោងចំណាយថវិកា៤០ពាន់លានដុល្លារទៅលើវិស័យការពារជាតិរយៈពេល៨ឆ្នាំ។ ប្រទេសចិនរិះគន់ខ្ទង់ចំណាយនេះ និងចាត់ទុកថាវាជាការប្រើប្រាស់ថវិកាខ្ជះខ្ជាយដែលបានត្រឹមតែធ្វើឱ្យតៃវ៉ាន់ជួបនឹងវិនាសកម្មតែប៉ុណ្ណោះ។ ប៉ុន្តែអ្នកនាំពាក្យតៃវ៉ាន់យល់ថាខ្ទង់ចំណាយរបស់ចិនច្រើនជាងនេះឆ្ងាយណាស់ (ចង់មានន័យថាម្ដេចក៏មិននិយាយថាខ្ជះខ្ជាយផងដែរទៅ?) បើពួកគេ (ប្រទេសចិន) ឱ្យតម្លៃខ្ពស់ទៅលើការថែរក្សាសន្តិភាពនៅច្រកសមុទ្រតៃវ៉ាន់ ទឹកប្រាក់ទាំងនេះអាចយកទៅអភិវឌ្ឍសេដ្ឋកិច្ច និងជីវភាពរស់នៅរបស់ប្រជាជនវិញប្រសើរជាង។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ