រាជធានីភ្នំពេញ ៖ ស្ត្រីម្នាក់ រួមនិងអ្នកទទួលផលចោរកម្មម្នាក់ទៀត ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល សហការជាមួយអធិការដ្ឋាននគរបាលខណ្ឌច្បារអំពៅ ស្រាវជ្រាវហើយឈានទៅឃាត់ខ្លួន បន្ទាប់ពីធ្វើសកម្មភាពលួចគ្រឿងអលង្ការពីជនជាតិចិន សរុបជាទឹកប្រាក់ ប្រមាណ…
រាជធានីភ្នំពេញ ៖ ស្ត្រីម្នាក់ រួមនិងអ្នកទទួលផលចោរកម្មម្នាក់ទៀត ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល សហការជាមួយអធិការដ្ឋាននគរបាលខណ្ឌច្បារអំពៅ ស្រាវជ្រាវហើយឈានទៅឃាត់ខ្លួន បន្ទាប់ពីធ្វើសកម្មភាពលួចគ្រឿងអលង្ការពីជនជាតិចិន សរុបជាទឹកប្រាក់ ប្រមាណ ៧ម៉ឺនដុល្លារ ហើយគេចខ្លួនបានប្រមាណជា១០ថ្ងៃ ទៅលាក់ខ្លួននៅសង្កាត់ជ្រោយចង្វារ ។
ការឃាត់ខ្លួនស្ត្រីសង្ស័យខាងលើនេះ ធ្វើឡើងនៅវេលាម៉ោង០៥និង២០នាទីល្ងាចថ្ងៃទី២៥ ខែវិច្ឆិកា ឆ្នាំ២០២៥ នៅចំណុចបន្ទប់ជួល ផ្លូវវត្តចាស់ ភូមិ២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ជនសង្ស័យរូបនោះឈ្មោះ ឡូស អៃស៊ះ ភេទស្រី អាយុ៣៨ឆ្នាំ ជនជាតិខ្មែរអ៊ិស្លាម ស្នាក់នៅបន្ទប់ជួល កន្លែងឃាត់ខ្លួនខាងលើ។ ចំណែកអ្នកទទួលផលចោរកម្ម ពុំស្គាល់អត្តសញ្ញាណឡើយ។
តាមសមត្ថកិច្ចបានឲ្យដឹងថា ដោយមានការអាណិតអាសូរពីស្ត្រីជនជាតិចិន ឈ្មោះ Dao Guilin អាយុ២៧ឆ្នាំ មានទីលំនៅផ្ទះលេខ១៩ ផ្លូវ១១ ភូមិស្វាយតាអុក សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ក៏បានហៅស្ត្រីរូបនោះ ទៅធ្វើជាចុងភៅ និងមើលការខុសត្រូវក្នុងផ្ទះបានតែមួយថ្ងៃ នៅថ្ងៃទី១៦ ខែវិច្ឆិកា ឆ្នាំ២០២៥ វេលាម៉ោង២១:០០នាទីយប់ ក៏បានធ្វើសកម្មភាពលួចយកគ្រឿងអលង្ការ គិតជាទឹកប្រាក់ប្រមាណ ៧ម៉ឺនដុល្លារ រួចគេចខ្លួនបាត់។ លុះក្រោយមក នារីរងគ្រោះ ក៏បានទៅដាក់ពាក្យបណ្តឹងសមត្ថកិច្ចតាមស្រាវជ្រាវឃាត់ខ្លួនបានជនសង្ស័យនៅសង្កាត់ជ្រោយចង្វារ រួមទាំងស្រាវជ្រាវ និងឃាត់ខ្លួនបានអ្នកទទួលផលចោលកម្មម្នាក់ទៀតផង ។
បច្ចុប្បន្ន ជនសង្ស័យ សមត្ថកិច្ចកំពុងកសាងសំណុំរឿងតាមនិតិវិធីច្បាប់ ៕
ចែករំលែកព័តមាននេះ