ខេត្តស្ទឹងត្រែង ៖ ដើម្បីពង្រឹងសណ្តាប់ធ្នាប់ វិន័យ និងកែប្រែឥរិយាបថរបស់ជនជាប់ឃុំឱ្យក្លាយជាពលរដ្ឋល្អឡើងវិញនោះ នៅថ្ងៃទី២៥ ខែវិច្ឆិកា ឆ្នាំ២០២៥ ថ្នាក់ដឹកនាំនៃពន្ធនាគារខេត្តស្ទឹងត្រែង បានរៀបចំកម្មវិធីអប់រំផ្សព្វផ្សាយពិសេសមួយ…
ខេត្តស្ទឹងត្រែង ៖ ដើម្បីពង្រឹងសណ្តាប់ធ្នាប់ វិន័យ និងកែប្រែឥរិយាបថរបស់ជនជាប់ឃុំឱ្យក្លាយជាពលរដ្ឋល្អឡើងវិញនោះ នៅថ្ងៃទី២៥ ខែវិច្ឆិកា ឆ្នាំ២០២៥ ថ្នាក់ដឹកនាំនៃពន្ធនាគារខេត្តស្ទឹងត្រែង បានរៀបចំកម្មវិធីអប់រំផ្សព្វផ្សាយពិសេសមួយ ដោយផ្តោតលើបទបញ្ជាផ្ទៃក្នុង និងការអប់រំផ្លូវចិត្ត ជូនដល់ជនជាប់ឃុំចំនួន ១២៣នាក់ ។
ជាក់ស្តែងអគ្គនាយកដ្ឋានពន្ធនាគារ បានប្រកាស នាថ្ងៃទី២៥ ខែវិច្ឆិកា ឆ្នាំ២០២៥នេះថា ៖ លោកឧត្តមអគ្គានុរក្សថ្នាក់លេខ២ លីម វាសនា បានរៀបចំកម្មវិធីអប់រំបទបញ្ជាផ្ទៃក្នុង ដល់ជនជាប់ឃុំចំនួន១២៣នាក់ ។
អគ្គនាយកដ្ឋានពន្ធនាគារ បានបញ្ជាក់ថាបន្ថែមថា ដោយទទួលបានការអនុញ្ញាត ពីលោកឧត្តមអគ្គានុរក្សថ្នាក់លេខ២ លីម វាសនា ប្រធានពន្ធនាគារ លោកវរអគ្គានុរក្ស ថ្នាក់លេខ២ ម៉ា គឹមសៀង ប្រធានការិយាល័យអប់រំកែប្រែ បានសហការជាមួយការិយាល័យជំនាញ ធ្វើការអប់រំដល់ជនជាប់ឃុំ នៅអគារ (ខ) ចំនួន ១២៣នាក់ ។
នៅក្នុងបេសកកម្មអប់រំកែប្រែនេះ ក្រុមការងារជំនាញបានលើកយកនូវប្រធានបទស្នូលចំនួន ៤ យ៉ាងសំខាន់ៗ ដើម្បីធ្វើបទបង្ហាញ និងណែនាំដល់ជនជាប់ឃុំទាំង១២៣នាក់ នោះរួមមាន៖
១. អប់រំបទបទបញ្ជាផ្ទៃក្នុង១៨ ប្រការ
២. អប់រំផលប៉ះពាល់ នៃឥទ្ធិពលគ្រឿងញៀន
៣. អប់រំសុខភាព និងបង្ការជំងឺឆ្លង
៤. ប្រធានពន្ធនាគារអប់រំសីលធម៌សង្គម។
សូមបញ្ជាក់ថា សកម្មភាពនេះ បានបង្ហាញពីការប្តេជ្ញាចិត្តរបស់អង្គភាពពន្ធនាគារខេត្តស្ទឹងត្រែង ក្នុងការអនុវត្តតួនាទីមិនត្រឹមតែជាកន្លែងឃុំឃាំងប៉ុណ្ណោះទេ ប៉ុន្តែជាមណ្ឌលអប់រំកែប្រែ ដើម្បីប្រែក្លាយជនដែលធ្លាប់ដើរផ្លូវខុស ឱ្យមានឱកាសកសាងជីវិតថ្មីបានល្អប្រសើរនៅថ្ងៃអនាគត ៕
ចែករំលែកព័តមាននេះ