រាជធានីភ្នំពេញ ៖ គណៈកម្មការរៀបចំពិព័រណ៌សៀវភៅកម្ពុជាលើកទី១២បានដាក់ក្តីរំពឹងថា ក្នុងពិព័រណ៍សៀវភៅនាឆ្នាំនេះអាចនឹងទាក់ទាញអ្នកចូលរួមកើនឡើងដល់ទៅ២០ម៉ឺននាក់ ខណះពេលដែលនាឆ្នាំកន្លងទៅពិព័រណ៍នេះក៏ទទួលបានការគាំទ្រពីមហាជនរាប់ច្រើនគួរឲ្យកត់សម្គាល់ផងដែរ ។
ថ្លែងក្នុងសន្និសីទសារព័ត៌មានដែលបានធ្វើឡើងនៅព្រឹកថ្ងៃទី២៦ ខែវិច្ឆិកា ឆ្នាំ២០២៥នៅសមាគមអ្នកនិពន្ធខ្មែរលោក គឹម ពីនន់ អនុរដ្ឋលេខាធិការក្រសួងវប្បធម៌និងវិចិត្រសិល្បៈបានលើកឡើងថា ពិព័រណ៍សៀវភៅថ្នាក់ជាតិលើទី១២នេះ នឹងធ្វើឡើងចាប់ពីថ្ងៃទី១១-១៤ ខែធ្នូ ឆ្នាំ២០២៥ នៅសាលសន្និបាត និងពិព័រណ៍កោះពេជ្រ ក្រោមប្រធានបទ «សៀវភៅជាជំនួយបញ្ញា ជាអាហារគំនិត» ។
លោកបញ្ជាក់ថា ឆ្នាំនេះគឺជាឆ្នាំទី១២ហើយដែលក្រសួងវប្បធម៌និងវិចិត្រសិល្បៈរួមជាមួយក្រសួងអប់រំយុវជន និងកីឡា និងក្រសួងព័ត៌មានបានរៀបចំពិព័រណ៍សៀវភៅថ្នាក់ជាតិឆ្នាំ២០២៥ នៅកម្ពុជា ។ កម្មវិធីនេះដំណើរការទៅបានយ៉ាងរលូនដោយមានការចូលរួមឧបត្ថម្ភគាំទ្រ និងកិច្ចសហការយ៉ាងល្អពីសំណាក់អ្នកធ្វើការពាក់ព័ន្ធវិស័យសៀវភៅសមាគម អង្គការ សង្គមស៊ីវិល ក្រុមហ៊ុន សាកលវិទ្យាល័យ អាជ្ញាធរដែនដី និងអ្នកសារព័ត៌មានផងដែរ ។
លោកបន្តថា សម្រាប់កម្មវិធីពិព័រណ៍សៀវភៅឆ្នាំ២០២៥ នាពេលនេះគឺយើងមានការដាក់តាំងបង្ហាញសៀវភៅដែលចូលរួមពីអ្នកនិពន្ធ គ្រឹះស្ថានបោះពុម្ភផ្សាយ និងបណ្ណាគារនានាក្នុងព្រះរាជាណាចក្រកម្ពុជា វេទិកាស្តីពីការបោះពុម្ភផ្សាយតាមប្រព័ន្ធអេឡិកត្រូនិច ការធ្វើបទបង្ហាញនានាទាក់ទងទៅនឹងអក្សរសាស្ត្រ អក្សរសិល្ប៍ខ្មែរ និងវិទ្យាសាស្ត្រ ការនិពន្ធសៀវភៅទៅជាខ្សែភាពយន្ត និងការអភិវឌ្ឍជំនាញការអាន ចាប់ផ្តើមអំណានពីដំណាក់កាលដំបូងនៃជីវិត ការជួបពិភាក្សា និងទទួលយកបទពិសោធន៍ពីអ្នកនិពន្ធល្បីៗ និងមានការចុះហត្ថលេខាពីអ្នកនិពន្ធ ។
លោកបន្ថែមថា នាឆ្នាំនេះយើងក៏មានរៀបចំជាវេទិកាអ្នកនិពន្ធ ដោយមានការប្រគល់រង្វាន់ទៅកាន់អ្នកដែលមានស្នាដៃឆ្នើមផងដែរ ។
បើតាមលោក គឹម ពីនន់ គិតពីមួយឆ្នាំទៅមួយឆ្នាំការតាំងពិព័រណ៍សៀវភៅកម្ពុជាបានទទួលការគាំទ្រពីសាធារណជន ពិសេសយុវវ័យ កាន់តែច្រើនឡើងៗហើយបានក្លាយជាព្រឹត្តការណ៍វប្បធម៌មួយដ៏សំខាន់ក្នុងការផ្សព្វផ្សាយ និងជម្រុញលើទឹកចិត្តឲ្យប្រជាជនខ្មែរមានទម្លាប់ក្នុងការអានសៀវភៅ និងស្គាល់ពីគុណតម្លៃនៃការអាន ដើម្បីភិវឌ្ឍន៍ចំណេះដឹង និងការងារ ។ដោយឡែកលោក សុខ ប្ញទ្ធី តំណាងគណៈកម្មការពិព័រណ៍សៀវភៅកម្ពុជា បានគូសបញ្ជាក់ថា នាឆ្នាំនេះកម្មវិធីបានរៀបចំស្តង់រហូតប្រមាណជិត៣០០ស្តង់ដែលចំនួននេះមានការកើនឡើងពីបណ្តាឆ្នាំមកន្លងទៅ ។
លោកបន្ថែមថា សៀវភៅរាប់ម៉ឺនចំណងជើងនឹងមានវត្តមាននៅស្តង់ពិព័រណ៍ជិត៣០០ស្តង់មកពីសា្ថប័នផ្សេងៗជាច្រើន ហើយអ្វីដែលកាន់តែពិសេស អ្នកស្រឡាញ់សៀវភៅដែលមានបំណងចង់ជួបអ្នកនិពន្ធក្នុងដួងចិត្ត នេះជាឱកាសដ៏ល្អតែមួយគត់ដែលបងប្អូនមិនគួររំលង។ លើសពីនេះទៅទៀត នឹងមានសកម្មភាពជាច្រើន កន្លែងថតរូបស្អាតៗ ការលេងល្បែងកម្សាន្តសប្បាយៗ ការលេងហ្គេមដើម្បីឈ្នះរង្វាន់ ការគូរគំនូរ ផាត់ពណ៌សម្រាប់កុមារតូចៗនៅសួនកុមារ ការប្រគំតន្ត្រី និងការបង្ហាញសមត្ថភាពសម្តែងផងដែរ ៕
ចែករំលែកព័តមាននេះ