ខេត្តបាត់ដំបង ៖ ក្លិបហាត់ប្រាណ «មនោរម្យ២» ដែលសាងសង់ស្ទើរទាំងស្រុងអំពីដែក ត្រូវបានជនមិនស្គាល់មុខលួចចាក់សាំងដុតពីខាងក្រៅរបង និងលើដំបូល នៅចំហៀងខាងត្បូង តែមិនឆេះ កាលពីវេលាម៉ោង៣រំលងអធ្រាត្រឈានចូលថ្ងៃទី២៦…
ខេត្តបាត់ដំបង ៖ ក្លិបហាត់ប្រាណ «មនោរម្យ២» ដែលសាងសង់ស្ទើរទាំងស្រុងអំពីដែក ត្រូវបានជនមិនស្គាល់មុខលួចចាក់សាំងដុតពីខាងក្រៅរបង និងលើដំបូល នៅចំហៀងខាងត្បូង តែមិនឆេះ កាលពីវេលាម៉ោង៣រំលងអធ្រាត្រឈានចូលថ្ងៃទី២៦ វិច្ឆិកា នេះ ដែលមានទីតាំងនៅជាប់ជញ្ជាំងប៉ុស្ដិ៍នគរបាល និងសាលាសង្កាត់ស្វាយប៉ោ ក្រុងបាត់ដំបង ដែលគេសង្ស័យអាចមានអ្នកនៅពីក្រោយខ្នងនៃអំពើទុច្ចរិតនេះ ។
ក្លិបហាត់ប្រាណ «មនោរម្យ២» នេះ ជាកម្មសិទ្ធិរបស់លោកចាន់ សូវង្ស អាយុ៦៩ឆ្នាំ ដែលស្ថិតនៅជាប់ជញ្ជាំងប៉ុស្ដិ៍នគរបាល និងសាលាសង្កាត់ស្វាយប៉ោតែម្ដង ។ របាយការណ៍សមត្ថកិច្ចបានឲ្យដឹងថា ជនមិនស្គាល់មុខបានប្រើប្រាស់សាំងប្រហែល០៤លីត្រ ចាក់លើអេប៉ុង (ពូក) បោះឡើងទៅលើដំបូល រួចដុតតែម្ដង ។ ប៉ុន្តែមិនឆេះសន្ធោសន្ធៅ ធ្វើឲ្យខូចខាតធ្ងន់ធ្ងរទេ ព្រោះមានគេឃើញទាន់ ។ ម្យ៉ាងក្លិបហាត់ប្រាណនេះ សាងសង់ពីដែកសុទ្ធ ទើបមិនខូចខាត គ្រាន់តែឆេះរោលៗពីខាងក្រៅ និងឆេះរោលដើមពោធិ៍នៅជ្រុងខាងត្បូង ។
សមត្ថកិច្ចបាននិយាយថា នៅកន្លែងកើតហេតុ ជនដៃដល់បានបន្សល់ទុកសាំង០១ដបចំណុះប្រហែល០២លីត្រ តែ០១ដបទៀតបានចាក់ដុតអស់ហើយ និងសំណល់អេប៉ុងដែលឆេះមិនទាន់អស់ ។ ដបសាំងទាំងនេះ ត្រូវបានច្រកចូលក្នុងកេះក្រដាស ហើយមន្ត្រីប៉ុស្ដិ៍រដ្ឋបាលស្វាយប៉ោបានប្រមូលទុកជាវត្ថុតាងហើយ ។
លោក ចាន់ សូវង្ស ដែលជាម្ចាស់ក្លិបបានប្រាប់កោះសន្តិភាពនៅទីតាំងកើតហេតុថា នៅក្នុងហេតុការណ៍នេះ ដំបូងមានស្ត្រីម្នាក់ ដែលគាត់កំពុងបោសសំរាមនៅម្ដុំអាហារដ្ឋានរាត្រីបាត់ដំបង ចម្ងាយប្រហែល៥០ម៉ែត្រ ជាអ្នកបានឃើញអគ្គិភ័យនោះ តែគាត់មិនបានឃើញជនបង្កទេ ។
លោកចាន់ សូវង្ស បាននិយាយថា ពេលនោះ គាត់បានរត់មកជួយពន្លត់ ស្រែកហៅគាត់ឲ្យដឹង ។ ភ្លើងមិនបានឆេះរាលដាលទេ វាឆេះអេប៉ុងដែលជនល្មើសចាក់សាំងដុតរួចបោះទៅលើដំបូល ហើយនៅផ្នែកខាងក្រោមដែលមានរបងដែកជាប់នឹងដើមពោធិ៍ធំភ្លើងបានឆេះស្លឹកឈើ ហើយរាលចូលខាងក្នុងឆេះទុយោទឹកបន្តិច ធ្វើឲ្យធ្លាយបាញ់ពន្លត់ភ្លើងនោះវិញ តែមិនខូចខាតដល់សំណង់ ឬឧបករណ៍កីឡាទេ ។
ចំពោះទីតាំងក្លិបហាត់ប្រាណនេះ បើតាមលោកចាន់ សូវង្ស បាននិយាយពីប្រវត្តិថា ទីតាំងក្លិបហាត់ប្រាណនេះ គាត់បានជួលដីមួយផ្នែកនៃផ្ទៃដីសាលាសង្កាត់ស្វាយប៉ោ ដើម្បីសាងសង់ក្លិបហាត់ប្រាណ ។ តំលៃជួលក្នុងមួយខែថ្លៃ៤០០ដុល្លារ ដោយមានចុះកុងត្រាត្រឹមត្រូវ ហើយរហូតមកទល់សព្វថ្ងៃនេះ មិនទាន់ចប់កុងត្រាទេ គឺនៅជាង០៣ឆ្នាំទៀត ទើបផុតកុងត្រា ។ ប៉ុន្តែលោកបានបញ្ជាក់ថា កាលពីអំឡុងខែមេសា ឆ្នាំ២០២៥ (ចូលឆ្នាំខ្មែរ) បែរជាអាជ្ញាធរខេត្តចេញលិខិតមួយច្បាប់ បញ្ជូនតាមតាមរយៈលោកចៅសង្កាត់ស្វាយប៉ោ យកមកឲ្យលោកក្នុងកម្មវត្ថុ «ស្នើឲ្យលោករុះរើក្លិបចេញ» ដោយសំអាងថា រដ្ឋត្រូវការដី ទាំងដែលកិច្ចសន្យាជួលដីមិនទាន់ផុតកំណត់ ។
ម្ចាស់ក្លិបហាត់ប្រាណបានឱ្យដឹងដែរថា ខ្លិមសារនៃលិខិតបណ្ដេញឲ្យរុះរើក្លិបហាត់ប្រាណរបស់លោក ដែលលោកចៅហ្វាយខេត្ត បញ្ជូនតាមរយៈលោកចៅសង្កាត់នោះបានទុកពេលឲ្យលោកចំនួន០៣ខែ គិតចាប់ពីថ្ងៃជូនដំណឹង ត្រូវរុះរើចេញពីលើទីតាំងដីសាលាសង្កាត់នោះឲ្យរួចរាល់ តែលោកមិនបានរុះរើទេ បើទោះជាសាលាសង្កាត់ជូនដំណឹងមកលោកម្ដងជាពីរដងក្ដី ។ ពីព្រោះនៅក្នុងកិច្ចសន្យានៅសល់ជាង០៣ឆ្នាំទៀត ទើបផុតកុងត្រាជួលដី ។ ហើយបើឲ្យលោករុះរើមុនចប់កុងត្រា ក៏ត្រូវសងសំណងមកលោកវិញខ្លះដែរ ។
ដោយឡែក រឿងជនមិនស្គាល់មុខលួចដុតក្លិបរបស់លោកនេះ លោកមិនទាន់ដឹងថា មានជាប់ពាក់ព័ន្ធនឹងរឿងនេះ ឬក្នុងរឿងអ្វីផ្សេងៗនោះទេ ទើបមានជនមិនស្គាល់មុខលួចចាក់សាំងដុតក្លិបហាត់ប្រាណរបស់លោកបែបនេះ ។ មួយរយៈចុងក្រោយនេះ កោះសន្តិភាពបានព្យាយាមស៊ើបសួរអំពីព័ត៌មាននានានៃទីតាំងដីសាលាសង្កាត់ស្វាយប៉ោ ក្រោយពីមានលិខិតរដ្ឋបាលខេត្តជូនដំណឹងទៅលោក ចាន់ សូវង្ស ម្ចាស់ក្លិបហាត់ប្រាណ ឲ្យធ្វើការរុះរើចេញពីលើដីសាលាសង្កាត់ទាំងមិនទាន់ចប់កុងត្រា តែពុំទទួលបានព័ត៌មានជាក់លាក់ទេ ។
គ្មានមន្ត្រីណាម្នាក់ហ៊ានផ្ដល់ព័ត៌មានរឿងដ៏រសើបនេះទេ ។ នៅពេលសួរថា តើដីនៅសាលាសង្កាត់ និងអគារប៉ុស្ដិ៍រដ្ឋបាល ត្រូវបានគេលក់មែនទេ ? មន្ត្រីខ្លះ បានត្រឹមប្រើពាក្យ «បែប អាច ឬទំនង» តែក៏សុំមិនឱ្យបញ្ចេញឈ្មោះដែរ ព្រោះថ្នាក់លើជាន់.ក ។ ប្រភពភាគច្រើនមិនថា មន្ត្រី ឬប្រជាពលរដ្ឋនៅក្បែរសាលាសង្កាត់ សុទ្ធតែបានបង្ហើបឲ្យដឹងប្រហាក់ប្រហែលគ្នាថា ដីសាលាសង្កាត់ស្វាយប៉ោទាំងមូលត្រូវបានគេលក់ ជ្រកក្រោមការដោះដូរទៅឲ្យលោកឧកញ៉ាម្នាក់នៅក្នុងខេត្តបាត់ដំបង ។
ប្រភពដដែលនេះបានប្រាប់ទៀតថា មិនមែនត្រឹមតែទំហំផ្ទៃដីសាលាសង្កាត់ទេ សូម្បីអគារប៉ុស្ដិ៍រដ្ឋបាល ដែលនៅជាប់ជញ្ជាំងសាលាសង្កាត់ ក៏ត្រូវបានគេវ៉ៃចេញព្រមៗគ្នាដែរ។ មិនតែប៉ុណ្ណោះ លំនៅឋានរបស់ប្រជាពលរដ្ឋប៉ុន្មានគ្រួសារទៀត ដែលស្ថិតនៅខាងក្រោយ (ខាងជើង) ជាប់នឹងរបងសាលាសង្កាត់ ក៏ត្រូវអ្នកមានលុយប្រមូលទិញយកទាំងដែរ តែរហូតមកដល់ថ្ងៃនេះ ទំនងមិនទាន់ត្រូវថ្លៃគ្នា ទើបប្រជាពលរដ្ឋប៉ុន្មានគ្រួសារនោះមិនទាន់ចាកចេញ ។ ប៉ុន្តែយ៉ាងណា នេះចាត់ទុកជាប្រភពក្រៅផ្លូវការប៉ុណ្ណោះ តែវាហាក់ដូចជាស៊ីសង្វាក់គ្នាទៅនឹងលិខិតអាជ្ញាធរខេត្ត ដែលបង្ខំឲ្យលោកចាន់ សូវង្ស ប្រញាប់ប់រុះរើក្លិបហាត់ប្រាណមុនបញ្ចប់កុងត្រា ។
កោះសន្តិភាពមិនទាន់អាចទំនាក់ទំនងសុំការបំភ្លឺពីមន្ត្រីរដ្ឋបាលខេត្ត ដែលពាក់ព័ន្ធក្នុងរឿងដោះដូរ ឬលក់ដីសាលាសង្កាត់ស្វាយប៉ោ ឬលោកអភិបាលខេត្តបានភ្លាមៗទេ នៅរសៀលថ្ងៃទី២៦ វិច្ឆកា នេះ ។ ដោយឡែក ពាក់ព័ន្ធនឹងករណីជនមិនស្គាល់មុខ លួចដុតក្លិបហាត់ប្រាណរបស់លោកចាន់ សូវង្ស ខាងលើនេះ អធិការក្រុងបាត់ដំបង លោក ពេជ្រ សារ៉ែន បានប្រាប់ថា ក្រោយទទូលព័ត៌មានមន្ត្រីជំនាញបានចុះទៅដល់ទីតាំងកើតហេតុភ្លាមៗ ដើម្បីពិនិត្យ និង ធ្វើកំណត់ហេតុ ។
លោកអធិការបានប្រាប់ថា អគ្គិភ័យដែលបង្កឡើងដោយជនមិនស្គាល់មុខនោះ ពុំបានធ្វើឲ្យខូចខាតដល់ទ្រព្យសម្បត្តិ ឬឧបករណ៍ហាត់ប្រាណទេ ។ ពេលនេះ មន្ត្រីជំនាញ របស់លោកបាននិងកំពុងធ្វើការស៊ើបអង្កេត និងតាមត្រូតពិនិត្យលើកាមេរ៉ាសុវត្ថិភាពនានា ដែលគេបំពាក់តាមដងផ្លូវ ។ យ៉ាងណាក៏ដោយ ជុំវិញករណីនេះ បើតាមមតិនានាបានលើកឡើងថា ករណីមាន «ជនមិនស្គាល់មុខលួចដុតក្លិបហាត់ប្រាណ» ខាងលើនេះ គេសង្ស័យអាចមានអ្នកនៅពីក្រោយខ្នង ។ ពីព្រោះបើតាមប្រវត្តិម្ចាស់ក្លិបនេះ គ្មានគំនុំ គ្មានទំនាស់ ឬធ្លាប់មានជម្លោះជាមួយបុគ្គលណាទេ មានតែរឿងមួយគត់ គឺ«មិនព្រមរុះរើសំណង់ក្លិបហាត់ប្រាណចេញពីលើដីរដ្ឋ ដែលគាត់ជួលមិនទាន់ចប់កុងត្រា» ៕
ចែករំលែកព័តមាននេះ