ADផ្ទាំងផ្សព្វផ្សាយពាណិជ្ជកម្ម

សូមអញ្ជើញមកលេងកម្សាន្ត! ស្ពានឫស្សីកោះប៉ែន ស្ថាបនាបានប្រមាណ៨០%ហើយ

4 ម៉ោង មុន

កំពង់ចាម
១៩ ខែ ធ្នូ ឆ្នាំ ២០២៥ ម៉ោង ១៦:០៥

ខេត្តកំពង់ចាម ៖ ស្ពានឬស្សីសង់ដោយផ្ទាល់ដៃចាប់ពីមាត់ទន្លេក្រុងកំពង់ចាមដល់ឆ្នេរខ្សាច់កោះប៉ែន ក្នុងឃុំកោះមិត្តស្រុកកំពង់សៀម គិតរហូតមកដល់រសៀលថ្ងៃទី១៩ធ្នូ ឆ្នាំ២០២៥គឺដំណើរការសាងសង់បានប្រមាណ៨០% ហើយ។ជាមួយនោះភ្ញៀវជាតិនិងអន្តរជាតិអាចអញ្ជើញដើរឆ្លងកាត់បានមុនឆ្លងឆ្នាំសកល អាចនាំគ្នាមកបោះតង់សម្រាកជាលក្ខណៈគ្រួសារនិងមានកម្លាំងសន្តិសុខពង្រឹងសណ្ដាប់ធ្នាប់ហើយនៅពេលយប់មិនមានការបាញ់កាំជ្រួចអបអរសាទរដូចឆ្នាំកន្លងទៅទេ។ អ្នកលក់ដូរម្នាក់ឈ្មោះស្រី អន…

អ្នកលក់ដូរម្នាក់ឈ្មោះស្រី អន អាយុ២៨ឆ្នាំបានរៀបរាប់ឲ្យដឹងថា: នាងបានមកលក់ដូរនៅមាត់ទន្លេក្បាលស្ពានឬស្សីត្រើយក្រុងកំពង់ចាម រយៈពេលជាង២ឆ្នាំមកហើយ។ដោយក្នុងនោះមានលក់មីឆា បុកល្ហុង ពងទាកូន ដូងក្រអូប ពេលដែលឆ្លងឆ្នាំសាកលម្ដងៗ នាពេលកន្លងទៅគឺមានភ្ញៀវមកពីតាមគ្រប់ទិសទីនាំគ្នាមកលេងនៅឆ្នេរខ្សាច់កោះប៉ែនដោយសប្បាយរីករាយ ព្រោះថាមើលពីលើច្រាំងទៅឃើញកាំជ្រួចចម្រុះពណ៌បាញ់អបអរសាទរឆ្លងឆ្នាំថ្មីពេលរាត្រី។

លោកប៊ុន ដារា ម្ចាស់រមណីយដ្ឋានឆ្នេរខ្សាច់កោះប៉ែន មានប្រសាសន៍ឲ្យដឹងដែរថា ដោយទឹកទន្លេបានចាប់ផ្ដើមស្រកជាបណ្ដើរៗគឺរូបលោកបានជួលក្រុមកម្មករដែលមានជំនាញខាងធ្វើស្ពានឬស្សី ដោយបាននាំគ្នាសម្រុកសាងសង់គិតមកដល់រសៀលថ្ងៃទី១៩ធ្នូ ឆ្នាំ២០២៥ គឺមានរយៈពេល ១៥ថ្ងៃហើយ។ចំពោះការស្ថាបនាវិញបានប្រមាណ៨០% ហើយមានប្រវែង ៩២០ម៉ែត្រ ។ លោកថា កាលពីឆ្នាំកន្លងទៅមានប្រវែងជាង ១០០០ ម៉ែត្រ កត្តានេះដោយសារនៅឆ្នាំនេះទឹកស្រករាងលឿន។

ម្ចាស់រមណីយដ្ឋានឆ្នេរខ្សាច់កោះប៉ែនបានបញ្ជាក់ថា ស្ពានឬស្សីបានស្ថាបនារួចរាល់នៅផ្នែកសង្ខាងដោយនៅភ្ជាប់ត្រង់ផ្នែកកណ្ដាលទន្លេ តាមគម្រោងនៅថ្ងៃទី២៤ធ្នូគឺរួចរាល់ជាស្ថាពរ។ដូច្នេះអាចបើកឱ្យភ្ញៀវជាតិនិងអន្តរជាតិធ្វើដំណើរដោយថ្មើយើងឆ្លងកាត់ពីត្រើយកំពង់ចាមមកលេងឆ្នេរខ្សាច់កោះប៉ែនលំហែកាយបាននៅថ្ងៃទី២៥ធ្នូ។ជាមួយនោះរូបលោកសូមឱ្យអ្នកដែលដើរឆ្លងកាត់ស្ពានឬស្សីសូមកុំប្រលែងគ្នា ដែលអាចមានគ្រោះថ្នាក់។

ពេលទទួលទានអាហារនៅឆ្នេរខ្សាច់កោះប៉ែន ត្រូវរក្សាអនាម័យទុកដាក់សំរាមឲ្យបានត្រឹមត្រូវ ពេលភ្ញៀវចុះងូតទឹកមិនថាក្មេងឬចាស់ត្រូវតែពាក់អាវពោងដើម្បីរក្សាសុវត្ថិភាព។ ក្នុងឱកាសបុណ្យឆ្លងឆ្នាំសកល២០២៥ ចូល២០២៦ ដោយសារតែមានបញ្ហាជម្លោះព្រំដែនកម្ពុជា-ថៃ កម្មវិធីនេះមិនបានធ្វើអ្វីឲ្យធំដុំដូចឆ្នាំកន្លងទៅទេ ។

ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕