ទីក្រុងវ៉ាស៊ីនតោន៖ លោកត្រាំប្រកាសអំពីគម្រោងបញ្ជូនបេសកជនពិសេសទៅជួបលោកពូទីននៅម៉ូស្គូដើម្បីដោះស្រាយបញ្ហាអ៊ុយក្រែន។ លោកត្រាំបង្ហោះសារនៅលើបណ្ដាញសង្គមទ្រូសសូសល (Truth Social) ថាដំណើរការចរចាគ្នាជាមួយរុស្ស៊ីដើម្បីបញ្ចប់សង្គ្រាមអ៊ុយក្រែននោះជិតនិយាយត្រូវរ៉ូវគ្នាហើយ នៅប្រទាំងប្រទើសត្រឹមតែប៉ុន្មានចំណុចប៉ុណ្ណោះ។ ប្រភពខ្លះបង្ហើបឱ្យដឹងថាក្រោយពេលជួបគ្នារវាងគណៈប្រតិភូអាមេរិក និងអ៊ុយក្រែន នៅទីក្រុងហ្សឺណែវ ប្រទេសស្វីសរួចមក ផែនការសន្តិភាពដែលផ្ដួចផ្ដើមឡើងដោយលោកត្រាំមាន២៨ចំណុចត្រូវបានបញ្ចុះមកនៅត្រឹម១៩ចំណុចវិញ។
លោកត្រាំសរសេររៀបរាប់បន្តទៀតថាលោកបានណែនាំបេសកជនពិសេសរបស់លោកគឺលោកស្ទីវវីតខូស (Steve Witkoff) ដើម្បីទៅជួបលោកពូទីនដោយផ្ទាល់នៅវិមានក្រឹមឡាំងដើម្បីចរចាគ្នាជាកិច្ចបង្ហើយនូវផែនការសន្តិភាព។ ក្រោយមក លោកថ្លែងប្រាប់អ្នកសារព័ត៌មានថាលោកវីតខូសនឹងធ្វើដំណើរទៅរុស្ស៊ីនៅសប្ដាហ៍ក្រោយ។ ទោះជាយ៉ាងណាក្ដី រដ្ឋមន្ត្រីការបរទេសរុស្ស៊ីបាននិយាយបង្ការទុកមុនថាបើសិនផែនការសន្តិភាពនោះត្រូវបានកែតម្រូវឡើងវិញផ្ទុយពីការទាមទាររបស់រុស្ស៊ី ពេលនោះវានឹងបង្កើតបរិយាកាសនៃការប្រកាន់ជំហរផ្សេងគ្នា។
ផែនការសន្តិភាពនោះពីដំបូងដៃតម្រូវឱ្យអ៊ុយក្រែនកាត់ទឹកដីរបស់ខ្លួននៅភាគខាងកើតដូចជាតំបន់ដូញែត (Donetsk) ទៅឱ្យរុស្ស៊ី។ ជារួម ផែនការនោះទាមទារឱ្យអ៊ុយក្រែនធ្វើសម្បទានយ៉ាងច្រើនសន្ធឹកសន្ធាប់សម្រាប់រុស្ស៊ី។ ក្រៅពីកាត់ដីឱ្យរុស្ស៊ីដើម្បីសន្តិភាព អ៊ុយក្រែនត្រូវបញ្ចុះកម្លាំងយោធា ហើយត្រូវបោះបង់ចោលផែនការចង់ចូលជាសមាជិកអង្គការណាតូ។
គេជឿជាក់ថាអ៊ុយក្រែន និងអឺរ៉ុបទំនងជាបានស្នើសុំឱ្យអាមេរិកកែសម្រួលចំណុចខ្លះនៅក្នុងផែនការសន្តិភាព។ ប្រធានាធិបតីអ៊ុយក្រែន លោកហ្សេឡិនស្គី បានបង្ហោះវីឌីអូនៅលើបណ្ដាញសង្គមថារដ្ឋាភិបាលរបស់លោកបានពិនិត្យមើលផែនការសន្តិភាពនោះរួចហើយ។ វាឆ្លុះបញ្ចាំងពីស្មារតីនៃកិច្ចពិភាក្សានៅទីក្រុងហ្សឺណែវ។ ពាក្យសម្ដីនេះឆ្លុះបញ្ចាំងថាលោកមានគំនិតវិជ្ជមានចំពោះកិច្ចព្រមព្រៀងនោះ។
អ្នកនាំពាក្យវិមានក្រឹមឡាំងបញ្ជាក់ថាវាជាព័ត៌មានពិតដែលថាប្រេសិតពិសេសរបស់លោកត្រាំនឹងធ្វើដំណើរទៅទីក្រុងម៉ូស្គូនាសប្ដាហ៍ក្រោយដើម្បីស្វះស្វែងរកសហមតិកុងសង់ស៊ីស (consensus) ដើម្បីបិទបញ្ចប់សង្គ្រាមដែលអូសបន្លាយជិត៤ឆ្នាំ។ ប៉ុន្តែទីប្រឹក្សារបស់លោកពូទីនគឺលោកអ៊ូសាកូស (Yuri Ushakov) ថ្លែងថារហូតមកដល់ពេលនេះ រុស្ស៊ីមិនទាន់ទទួលបានផែនការសន្តិភាពជាផ្លូវការពីទីក្រុងវ៉ាស៊ីនតោននៅឡើយទេ។
ក្រោយកិច្ចជំនួបនៅទីក្រុងហ្សឺណែវ លោកហ្សេឡិនស្គីថ្លែងថាផែនការនោះអាចអនុវត្តជាក់ស្ដែងបានហើយ។ គ្រាន់តែថាមិនទាន់ល្អឥតខ្ចោះទេព្រោះនៅមានចំណុចខ្លះដែលមិនទាន់ដោះស្រាយឱ្យបានដាច់ស្រេចនៅឡើយទេ។ មន្ត្រីរដ្ឋាភិបាលអ៊ុយក្រែនម្នាក់ប្រាប់ថាលោកហ្សេឡិនស្គីចង់ជួបលោកត្រាំនៅរយៈពេលប៉ុន្មានថ្ងៃខាងមុខនេះ។
ការដើរតួនាទីរបស់លោកវីតខូសនៅក្នុងបញ្ហាអ៊ុយក្រែនបានក្លាយជាទីចាប់អារម្មណ៍ជាថ្មីម្ដងទៀតនៅពេលព័ត៌មានចុះផ្សាយថាលោក (វីតខូស) បានពន្យល់ប្រាប់លោកអ៊ូសាកូស (ទីប្រឹក្សាលោកពូទីន) ថាលោកពូទីនគួរបញ្ចុះបញ្ចូលលោកត្រាំបែបណាដើម្បីឈានដល់ចំណុចឯកភាពគ្នាទទួលផែនការសន្តិភាព។ លោកត្រាំចាត់ទុកថាវិធីចរចារបស់លោកវីតខូសមិនទាស់ខុសអ្វីទេ។ គាត់ធ្វើទៅតាមនីតិវិធីនៃការចរចាគ្នា។ គាត់ត្រូវនិយាយបញ្ចុះបញ្ចូលអ៊ុយក្រែនខ្លះ និងបញ្ចុះបញ្ចូលរុស្ស៊ីខ្លះ។ នេះជាសិល្បៈក្នុងការចរចា។ នេះបើយោងតាមប្រភពពីអឹនអេចខេ (NHK), រ៉យទ័រ និងប្រភពដទៃទៀត៕
ចែករំលែកព័តមាននេះ