ទីក្រុងបាងកក៖ ស្ថានភាពទឹកជំនន់នៅប្រទេសថៃមិនទាន់ធូរស្រាលនៅឡើយទេ មិនត្រឹមតែមិនធូរស្រាលទេ កាន់តែធ្ងន់ធ្ងរបន្ថែមទៀតព្រោះភ្លៀងនឹងបន្តធ្លាក់ខ្លាំងនៅភាគខាងត្បូង។ ខេត្តចំនួន៩បានរកឃើញសាកសពជនរងគ្រោះបន្ថែមទៀត និងធ្វើឱ្យចំនួនអ្នកស្លាប់កើនដល់៣៣នាក់។ នៅក្នុងស្ថានភាពដែលទឹកលិចខ្លាំងគ្រប់ទីកន្លែងបែបនេះ ក្រុមអ្នកជួយសង្គ្រោះមិនអាចប្រើមធ្យោបាយជើងគោកបានឡើយ។ អាជ្ញាធរត្រៀមបញ្ជូនឧទ្ធម្ភាគចក្រជាច្រើនគ្រឿងដើម្បីជម្លៀសមនុស្សចេញពីតំបន់គ្រោះថ្នាក់។ ជាពិសេសទីក្រុងហាតយ៉ៃដែលស្ថិតនៅជាប់នឹងព្រំដែនប្រទេសម៉ាឡេស៊ីកំពុងរងគ្រោះខ្លាំងជាងគេ។
គ្រោះទឹកជំនន់វាយប្រហារខេត្តចំនួន៩នៅប្រទេសថៃ និងរដ្ឋចំនួន៨នៅប្រទេសម៉ាឡេស៊ីបង្ខំឱ្យប្រជាជនជិត៤៥០០០នាក់ជម្លៀសខ្លួនជាបន្ទាន់។ នៅឥណ្ឌូណេស៊ីក៏មានទឹកជំនន់ផងដែរ។ គេប៉ាន់ស្មានថាមនុស្សយ៉ាងតិច១៣នាក់បានស្លាប់នៅក្នុងហេតុការណ៍គ្រោះទឹកជំនន់ និងការបាក់ដីនៅសប្ដាហ៍នេះនៅឥណ្ឌូណេស៊ី។ ម៉ាឡេស៊ីស្លាប់តិចជាងគេត្រឹមតែម្នាក់ប៉ុណ្ណោះ។
នៅទីក្រុងហាតយ៉ៃ មន្ត្រីសុខាភិបាលប្រាប់ថាគេនឹងប្រើប្រាស់ឧទ្ធម្ភាគចក្រដើម្បីដឹកស្បៀងអាហារចែកជូនប្រជាជនដែលរងផលប៉ះពាល់ដោយទឹកជំនន់ និងដើម្បីដឹកជញ្ជូនអ្នកជំងឺចេញពីមន្ទីរពេទ្យរបស់រដ្ឋដែលមានទឹកលិចនៅជាន់ទីមួយ។ មន្ទីរពេទ្យនេះមានអ្នកជំងឺ៦០០នាក់កំពុងសម្រាកព្យាបាលជំងឺ។ ក្នុងនោះ អ្នកជំងឺ៥០នាក់កំពុងសង្គ្រោះបន្ទាន់។ កិច្ចការនៅចំពោះមុខគឺត្រូវជម្លៀសអ្នកសង្គ្រោះបន្ទាន់ចេញពីមន្ទីរពេទ្យនេះជាបន្ទាន់។ នេះបើយោងតាមមន្ត្រីក្រសួងសុខាភិបាល។
ដំណើរការជួយសង្គ្រោះ និងដឹកជញ្ជូនពិតជាមិនងាយស្រួលប៉ុន្មានឡើយ។ ឧទ្ធម្ភាគចក្រ២០គ្រឿង និងទូកកៅស៊ូ២០០គ្រឿងដែលប្រើប្រាស់សម្រាប់ការដឹកជញ្ជូនមនុស្សចេញពីទីក្រុងហាតយ៉ៃកំពុងជួបបញ្ហាពិបាកខ្លាំង និងមិនងាយស្រួលបើកចូលទៅដល់ទីតាំងដែលមានមនុស្សរស់នៅកណ្ដាលវាលទឹកដ៏ល្ហល្ហេវនោះទេ។ រង់ចាំដល់ទឹកស្រកបន្តិចវិញ ទូកកៅស៊ូអាចនឹងចូលទៅដល់មន្ទីរពេទ្យទីក្រុងហាតយ៉ៃដើម្បីដឹកអ្នកជំងឺ សាច់ញាតិរបស់អ្នកជំងឺ និងបុគ្គលិកពេទ្យសរុប២ពាន់នាក់។
ហាតយ៉ៃមានភ្លៀងធ្លាក់ខ្លាំងដល់កម្រិតខ្ពស់បំផុត។ កាលពីសប្ដាហ៍មុន ត្រឹមតែរយៈពេលមួយថ្ងៃប៉ុណ្ណោះទីក្រុងនេះទទួលបានរបបទឹកភ្លៀងរហូតដល់៣៣៥មិល្លីម៉ែត្រដែលជាអត្រាខ្ពស់មិនធ្លាប់មាននៅក្នុងរយៈពេល៣រយឆ្នាំចុងក្រោយ។ ជារួម ទឹកជំនន់នៅភាគខាងត្បូងលើកនេះប៉ះពាល់ផ្ទះជាង៩,៨សែនខ្នង និងប្រជាជនជាង២,៧លាននាក់។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ