ទីក្រុងប៉េកាំង៖ ថ្ងៃនេះ ប្រទេសចិនព្រមានធ្ងន់ៗថាខ្លួននឹងវាយកម្ទេចរាល់ការប៉ុនប៉ងរបស់បរទេសដែលចង់ជ្រៀតជ្រែកនៅក្នុងបញ្ហាតៃវ៉ាន់។ ការថ្លែងដូច្នេះបន្ទាប់ពីប្រទេសជប៉ុនប្រកាសអំពីផែនការដាក់ពង្រាយជើងទម្របាញ់មីស៊ីលនៅក្បែរកោះតៃវ៉ាន់។ អ្នកនាំពាក្យការិយាល័យទំនាក់ទំនងចិន-តៃវ៉ាន់ លោកផឹងឈីងកឹន (Peng Qingen) ថ្លែងថាយើងមានឆន្ទៈមោះមុត, មានការតាំងចិត្តរឹងមាំ និងមានសមត្ថភាពពេញលេញក្នុងការការពារអធិបតេយ្យភាពជាតិ និងបូរណភាពទឹកដីរបស់យើង។
តបទៅនឹងសំណួររបស់អ្នកសារព័ត៌មានពាក់ព័ន្ធនឹងផែនការដាក់ពង្រាយមីស៊ីលរបស់ជប៉ុននោះ អ្នកនាំពាក្យចិនរូបនេះថ្លែងថាយើងនឹងវាយកម្ទេចរាល់ការជ្រៀតជ្រែករបស់បរទេស។ លោកថាការដាក់ពង្រាយអាវុធវាយប្រហារនៅទីតាំងក្បែរកោះតៃវ៉ាន់ជាទង្វើដ៏គ្រោះថ្នាក់បំផុត, ជាទង្វើដែលមានចេតនាបង្កភាពតានតឹងនៅក្នុងតំបន់ និងនាំឱ្យមានការប្រឈមមុខគ្នាផ្នែកយោធា។
សូមរំលឹកថារដ្ឋមន្ត្រីការពារជាតិជប៉ុនបានថ្លែងកាលពីថ្ងៃអាទិត្យអំពីផែនការដាក់ពង្រាយមីស៊ីលនៅលើកោះយ៉ូណាគុនី (Yonaguni) ដែលស្ថិតនៅប៉ែកខាងលិចបំផុតប្រទេសជប៉ុនស្ថិតនៅចម្ងាយ១១០គីឡូម៉ែត្រពីឆ្នេរសមុទ្រខាងកើតកោះតៃវ៉ាន់។ កោះនេះជាមូលដ្ឋានយោធារបស់ជប៉ុនចាប់តាំងពីឆ្នាំ២០១៦។ រដ្ឋមន្ត្រីជប៉ុនរូបនេះអះអាងថាការដាក់ពង្រាយមីស៊ីលរយៈចម្ងាយមធ្យមសម្រាប់បាញ់ពីដីទៅអាកាសនោះអាចនឹងជួយពង្រឹងសន្តិសុខរបស់ជប៉ុន។
គ្រាន់តែឮសេចក្ដីប្រកាសនេះភ្លាម ក្រសួងការបរទេសចិនបញ្ចេញប្រតិកម្មតបភ្លាម និងចាត់ទុកថានេះជាចេតនាបង្កភាពតានតឹង និងនាំឱ្យមានភាពតានតឹងផ្នែកយោធា។ ប៉ុន្តែរដ្ឋមន្ត្រីជប៉ុនមិនយល់ដូច្នេះទេ។ លោកថ្លែងថាមីស៊ីលនេះប្រើសម្រាប់ការពារខ្លួនតែប៉ុណ្ណោះ។ ពោលគឺសម្រាប់បាញ់យន្តហោះ ឬមីស៊ីលប្រទេសដទៃដែលរំលោភអធិបតេយ្យភាពជាតិរបស់ជប៉ុន។ លោកថ្លែងថាមីស៊ីលនេះមិនមែនសម្រាប់វាយប្រហារប្រទេសដទៃទេ ហើយក៏មិនបង្កភាពតានតឹងនៅក្នុងតំបន់ដែរ។
កោះតៃវ៉ាន់ប្រកាសគាំទ្រគម្រោងដាក់ពង្រាយមីស៊ីលនេះ ហើយសង្ឃឹមថាវាអាចជួយថែរក្សាសន្តិសុខនៅច្រកសមុទ្រតៃវ៉ាន់។ អនុរដ្ឋមន្ត្រីតៃវ៉ាន់ថ្លែងថាការដាក់ពង្រាយមីស៊ីលនេះមានប្រយោជន៍សម្រាប់ផលប្រយោជន៍ជាតិតៃវ៉ាន់ព្រោះជប៉ុនគ្មានជម្លោះបូរណភាពទឹកដី ឬមានអរិភាពជាមួយតៃវ៉ាន់ទេ។ នៅថ្ងៃនេះផងដែរ ប្រធានាធិបតីតៃវ៉ាន់ប្រកាសអំពីផែនការចំណាយថវិកា៤០ពាន់លានដុល្លារដើម្បីពង្រឹងវិស័យការពារជាតិ។ ថវិកានេះនឹងប្រើប្រាស់រយៈពេល៨ឆ្នាំចាប់ពីឆ្នាំ២០២៦-២០៣៣។ នេះបើយោងតាមប្រភពពីអាល់ចាស៊ីរ៉ា (al Jazeera) និងប្រភពដទៃទៀត៕
ចែករំលែកព័តមាននេះ