រាជធានីភ្នំពេញ ៖ ក្រុមអាជីវករលក់ដូរតាមចិញ្ចើមផ្លូវព្រះមុខបរមរាជវាំង បាននាំគ្នាប្រើហិង្សាព្រួតវាយទៅលើបុគ្គលម្នាក់ព្រមទាំងចាប់សម្រាតខោ ដោយសារតែបុរសរូបនោះ «ហូបប្រហិតចៀននិងផឹកស្រាបៀរមិនអោយលុយ » ។ ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង១០និង២០នាទីយប់ ថ្ងៃទី២៤…
រាជធានីភ្នំពេញ ៖ ក្រុមអាជីវករលក់ដូរតាមចិញ្ចើមផ្លូវព្រះមុខបរមរាជវាំង បាននាំគ្នាប្រើហិង្សាព្រួតវាយទៅលើបុគ្គលម្នាក់ព្រមទាំងចាប់សម្រាតខោ ដោយសារតែបុរសរូបនោះ «ហូបប្រហិតចៀននិងផឹកស្រាបៀរមិនអោយលុយ » ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង១០និង២០នាទីយប់ ថ្ងៃទី២៤ ខែវិច្ឆិកា ឆ្នាំ២០២៥ នៅខាងមុខព្រះបរមរាជវាំង ប៉ែកខាងជើង សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញមនុស្សមួយក្រុម ក្នុងនោះមានអាជីវករលក់ដូរតាមចិញ្ចើមផ្លូវ ទាំងប្រុសនិងស្រី បាននាំគ្នាប្រើហិង្សាព្រួតវាយទៅលើបុរសម្នាក់និងចាប់ស្រាតខោថែមទៀត ។ បន្ទាប់មកអ្នកធ្វើដំណើរឆ្លងកាត់ នាំគ្នាថតវីដេអូសកម្មភាពទាំងនេះ រាយការណ៍ទៅកាន់បណ្តាញសង្គម និងអ្នកយកព័ត៌មានអោយបានជ្រាបជាដំណឹង ។
បន្ទាប់ពីទទួលដំណឹងនេះ អ្នកព័ត៌មានជាច្រើនបានចុះមកដល់ទីតាំងកើតហេតុ យកព័ត៌មាន ទើបស្ត្រីៗអ្នកលក់ដូររៀបរាប់ថា បុគ្គលដែលពួកគាត់វាយនោះ «ស៊ីមិនអោយលុយ» គឺហូបប្រហិតចៀននិងផឹកស្រាបៀរ សរុបជាទឹកប្រាក់ជាង២ម៉ឺនរៀល ទើបពួកគាត់ចាប់វាយស្រាតខោតែម្តង ។
ភ្លាមៗនោះ គេឃើញស្ត្រីម្នាក់ក្នុងចំណោមអ្នកលក់ដូរ បានលើកទូរស័ព្ទថតទៅកាន់ក្រុមអ្នកយកព័ត៌មាន និងពលរដ្ឋដែលឈររោមមើលនៅទីនោះ ព្រមទាំងពោលពាក្យផ្លែផ្កាឌឺដង និងដេញមិនអោយមកថតផ្តិត ឬឈររោមនៅក្បែរទីតាំងរបស់គាត់លក់ដូរនោះទេ ។ អាកប្បកិរិយាបែបនេះ បានធ្វើអោយមានទំនាស់ពាក្យសម្តីកើតឡើងរវាងអ្នកលក់ និងអ្នកយកព័ត៌មានក្នុងពេលកំពុងផ្សាយផ្ទាល់ផងដែរ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ