ខេត្តកំពង់ស្ពឺ ៖ នគរបាលក្រុងច្បារមនបានឃាត់ខ្លួនជនសង្ស័យម្នាក់ ដែលស្កាត់តាំងពីភ្នំពេញ មកធ្វើសកម្មភាពលួចគាស់ឃ្លាំងស្តុកទំនិញមួយកន្លែង តែត្រូវបានប្រជាពលរដ្ឋរាយការណ៍ជូនសមត្ថកិច្ច ក៏ឃាត់ខ្លួនបាន ។ មន្ត្រីនគរបាលក្រុងច្បារមនបានឱ្យដឹងថា ជនសង្ស័យរូបនេះឈ្មោះ…
ខេត្តកំពង់ស្ពឺ ៖ នគរបាលក្រុងច្បារមនបានឃាត់ខ្លួនជនសង្ស័យម្នាក់ ដែលស្កាត់តាំងពីភ្នំពេញ មកធ្វើសកម្មភាពលួចគាស់ឃ្លាំងស្តុកទំនិញមួយកន្លែង តែត្រូវបានប្រជាពលរដ្ឋរាយការណ៍ជូនសមត្ថកិច្ច ក៏ឃាត់ខ្លួនបាន ។
មន្ត្រីនគរបាលក្រុងច្បារមនបានឱ្យដឹងថា ជនសង្ស័យរូបនេះឈ្មោះ ឃៀង សុខុន ភេទប្រុស អាយុ៦២ឆ្នាំ មុខរបរមិនពិតប្រាកដ ស្នាក់នៅបន្ទប់ជួលក្នុងសង្កាត់បឹងកក់ទី១ ខណ្ឌទួលគក រាជធានីភ្នំពេញ ត្រូវបានឃាត់ខ្លួនកាលពីវេលាម៉ោងប្រមាណ១ និង៤០នាទីរសៀលថៃ្ងទី២២ ខែវិច្ឆិកា ឆ្នាំ២០២៥ នៅចំណុចឃ្លាំងស្តុកទំនិញមួយកន្លែង ស្ថិតក្នុងភូមិតាម៉ុល សង្កាត់ច្បារមន ក្រុងច្បារមន ។
លោកវរសេនីយ៍ទោ យ័ន្ដ សង្ហារ អធិការនគរបាលក្រុងច្បារមនបានឱ្យដឹងថា មុនពេលឈានដល់ការឃាត់ខ្លួនជនសង្ស័យវ័យចំណាស់ខាងលើ គឺមានប្រជាពលរដ្ឋរាយការណ៍តាមទូរស័ព្ទមកលេខទាន់ហេតុការណ៍ Hotline ថា នៅចំណុចឃ្លាំងស្តុកទំនិញ ស្ថិតក្នុងភូមិតាម៉ុល សង្កាត់ច្បារមន ក្រុងច្បារមន មានករណីប៉ុនប៉ងលួចទ្រព្យសម្បត្ដិ ដោយមានចោរកំពុងធ្វើសកម្មភាព ។
នៅពេលទទួលបានសេចក្តីរាយការណ៍នេះភ្លាម កម្លាំងនគរបាលក្រុងច្បារមន បានធ្វើការស្រាវជ្រាវ រហូតឈានទៅឃាត់ខ្លួនបានមុខសញ្ញាចោរលួចម្នាក់នេះ រួមជាមួយវត្ថុតាងមានកន្ត្រៃកាត់ដែក១ ទួរណឺវីស១ ឧបករណ៍កាច់សោម៉ូតូ៣ កន្ត្រៃតូច១ ម៉ាឡេត១ ដែកដាប់១ ទូរស័ព្ទដៃ១គ្រឿង និងសោម៉ូតូ១ផងដែរ ។
លោកអធិការ យ័ន្ដ សង្ហារ បានបន្តថា ក្រោយពេលឃាត់ខ្លួន ក៏បានបញ្ជូនជនសង្ស័យទៅអធិការដ្ឋានដើម្បីសាកសួរ និងកសាងសំណុំរឿងបញ្ជូនបន្តទៅការិយាល័យនគរបាលព្រហ្មទណ្ឌខេត្ដ ដើម្បីមានចំណាត់ការបន្តតាមផ្លូវច្បាប់ ៕
ចែករំលែកព័តមាននេះ