ខេត្តកំពង់ចាម ៖ មហាឃោរឃៅក្នុងឃាតកម្មដ៏គួរឱ្យភ្ញាក់ផ្អើល កាលពីថ្ងៃទី២៣ វិច្ឆិកា ២០២៥ បានធ្វើឱ្យមានការរន្ធត់ចិត្តជាខ្លាំង នូវអំពើសាហាវយង់ឃ្នងដែលស្មានមិនដល់ ដែលជនតិរច្ឆានម្នាក់លើកដៃប្រហារជីវិតមនុស្សក្មេងចាស់ជាប្រព័ន្ធ មានប្រពន្ធពោះធំ…
ខេត្តកំពង់ចាម ៖ មហាឃោរឃៅក្នុងឃាតកម្មដ៏គួរឱ្យភ្ញាក់ផ្អើល កាលពីថ្ងៃទី២៣ វិច្ឆិកា ២០២៥ បានធ្វើឱ្យមានការរន្ធត់ចិត្តជាខ្លាំង នូវអំពើសាហាវយង់ឃ្នងដែលស្មានមិនដល់ ដែលជនតិរច្ឆានម្នាក់លើកដៃប្រហារជីវិតមនុស្សក្មេងចាស់ជាប្រព័ន្ធ មានប្រពន្ធពោះធំ មានម្តាយក្មេក ប្អូនថ្លៃ និងក្មួយសាច់ថ្លៃរហូតដល់៩នាក់ ហើយយកសពមកគរគ្នាចាក់សាំងដុតយ៉ាងព្រៃផ្សៃក្នុងផ្ទះ ។ សូមរំលឹកថា៖ គួររំលឹកថា ឃា.តកម្មសាហា.វមិនធ្លាប់មាន ប្ដីសម្លា.ប់ប្រពន្ធមានផ្ទៃពោះ ម្ដាយក្មេក និងក្មួយៗសរុប១០នាក់ រួចប្រមូលគលើគ្នា ចា.ក់សាំងដុ.ត ដើម្បីបំបាត់ភស្តុតាង
អំពើឃាតកម្មសម្លាប់ចាក់សាំងដុតមនុស្សស្លាប់៩នាក់មែន តែបើគិតកូននៅក្នុងផ្ទៃប្រពន្ធ១ទៀត គឺត្រូវជា១០នាក់ ។ នៅក្នុងផ្ទះខ្ទមចាំចម្ការស្វាយចន្ទីក្នុងភូមិពោន ឃុំទួលសំបួរ ស្រុកស្ទឹងត្រង់ ។
នៅព្រឹកថ្ងៃទី២៤ ខែវិច្ឆិកា ឆ្នាំ២០២៥ ឯកឧត្តម អ៊ុន ចាន់ដា អភិបាលខេត្តរួមនឹងសហការីបានអញ្ជើញចុះសួរសុខទុក្ខ និងនាំយកបច្ច័យចូលបុណ្យសពសរុបជិត១០លានរៀល ជាមួយនឹងភាពក្តុកក្តួល ទឹកភ្នែករលីងរលោងនិងសោកស្ដាយបំផុតចំពោះហេតុការណ៍ដែលបានកើតឡើង ។
អ្នកស្រី វេង ញាញ់ អាយុជាង៤០ឆ្នាំ ជាម្តាយកុមារ៤នាក់ ដែលត្រូវសម្លាប់និយាយថា ពេលគាត់កំពុងតែធ្វើការរោងចក្រកាត់ដេរមួយកន្លែងក្នុងរាជធានីភ្នំពេញ ត្រូវបានប្អូនទូរស័ព្ទមកប្រាប់ថា កូនប្រុសស្រីរបស់គាត់ចំនួន៤នាក់ ត្រូវបានក្មួយប្រសាឈ្មោះ សុបិន្ត មិនា អាយុ២១ឆ្នាំ បានសម្លាប់និងចាក់សាំងដុតនៅក្នុងផ្ទះចាំចម្ការ ។
គ្រាន់តែឮបែបនេះ គាត់ស្លុតក្នុងចិត្តជាពន់ពេកបានស្រែកទ្រហោយំ ផ្អើលពេញរោងចក្រ ព្រមទាំងបានប្រញាប់សុំច្បាប់ថៅកែចេញដំណើរមកស្រុកកំណើតនៅល្ងាច ថ្ងៃទី២៣ វិច្ឆិកា ឆ្នាំ
២០២៥ ។ អ្នកស្រី វេង ញាញ់ បានបន្តឲ្យដឹងទៀតថា គាត់ពិតជាខ្លោចចិត្តអាណិតដល់កូនៗដែលនៅជាមួយជីដូនចំណាស់ចំនួន៤នាក់ មានប្រុសមានស្រីត្រូវបានស្លាប់ក្នុងអណ្ដាតភ្លើងទាំងអស់គ្មានអ្នកណាម្នាក់រត់រួចនោះទេ ។ ពេលមកដល់ផ្ទះ ត្រូវបានប្អូនៗរៀបរាប់ប្រាប់ពីដំណើររឿងថា នៅល្ងាចថ្ងៃទី២២ វិច្ឆិកា ខណៈក្មួយស្រីរបស់គាត់ដែលមានជម្លោះជាមួយនឹងប្ដីឈ្មោះ មិនា ជិះម៉ូតូទៅផ្ទះចាំចម្ការនៅភូមិពោន ។
លុះមកដល់ព្រឹកព្រលឹម ថ្ងៃទី២៣ វិច្ឆិកា ក៏ស្រាប់តែមានហេតុការណ៍កើតឡើងដោយក្មួយប្រសាប្រុស បានប្រព្រឹត្តនូវទង្វើសាហាវព្រៃផ្សៃសម្លាប់ក្មួយៗប្រពន្ធព្រមទាំងកូនក្នុងផ្ទៃនិងម្ដាយក្មេងរហូតដល់១០នាក់ បង្កឲ្យមានការភ្ញាក់ផ្អើលពេញភូមិ ។ អ្នកស្រីរៀបរាប់ថា គាត់ទៅធ្វើការនៅរោងចក្រជាមួយប្ដីស៊ីឈ្នួលគេកន្លែងខុសគ្នា ដើម្បីយកប្រាក់មកបង់ឲ្យធនាគារឯកជន និងលុយនៅសល់សម្រាប់ចិញ្ចឹមកូនៗ ។
ឯកឧត្តម អ៊ុន ចាន់ដា អភិបាលខេត្តមានប្រសាសន៍ថា ក្នុងនាមរដ្ឋបាលខេត្តពិតជាមានការសោកស្ដាយ និងសូមចូលរួមរំលែកនូវមរណទុក្ខដ៏ក្រៀមក្រំនេះ ព្រោះថា ហេតុការណ៍បានកើតឡើងភ្លាមៗនឹកស្មានមិនដល់ដែលបង្កឡើងពីសំណាក់កូនប្រសាប្រុស លើម្ដាយក្មេកព្រមទាំងក្មួយៗបណ្ដាលឱ្យបាត់បង់ជំវិតមនុស្សដែលគួរឱ្យជាទីស្រឡាញ់រហូតទៅដល់១០នាក់ គិតទាំងកូនក្នុងផ្ទៃ ។
ឃាតករត្រូវបានសមត្ថកិច្ចចាប់បានកំពុងតែសួរនាំនៅស្នងការដ្ឋាននគរបាលខេត្តកំពង់ចាម ហើយករណីនេះ ត្រូវតែផ្ដល់ភាពយុត្តិធម៌ជូនវិញ្ញាណក្ខន្ធដល់អ្នកស្លាប់ធ្វើយ៉ាងណាដាក់ទោសទណ្ឌឲ្យបានធ្ងន់ធ្ងរបំផុត ដោយមិនអាចលើកលែងបាននោះទេ ។
ជាមួយនោះរដ្ឋបាលខេត្ត បានចូលបុណ្យសពចំនួន៥លានរៀល ឧកញ៉ា ហេង ឡុង ចំនួន៤លានរៀល លោកអភិបាលស្រុកស្ទឹងត្រង់៥០ម៉ឺនរៀល ឯកឧត្តម នេត សាវឿន ប្រធានក្រុមការងារចុះជួយខេត្តកំពង់ចាមចំនួន១០០០ដុល្លារ ហើយរាល់ការចំណាយបុណ្យសពទាំងអស់គឺរដ្ឋបាលខេត្តទទួលរាប់រងទាំងស្រុង ។
សពជនរងគ្រោះ៩នាក់ ត្រូវបានដាក់ក្នុងមឈូសចំនួន៩ហើយក៏ត្រូវបានដង្ហែយកទៅបញ្ចុះក្នុងរណ្តៅចំនួន៩ នៅចម្ងាយពីផ្ទះប្រមាណជាង៥០ម៉ែត្រ ។ ទាក់ទិននឹងឃាតករឃោរឃៅដែលចាប់ខ្លួនកំពុងស្ថិតនៅក្នុងការគ្រប់គ្រងដោយនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្ត និងមិនបានផ្តល់ព័ត៌មានបន្ថែមអ្វីនោះទេ ។ ដោយការចូលរួមមរណទុក្ខសូមឧទ្ទិសដល់វិញ្ញាណក្ខន្ធជនរងគ្រោះទាំងអស់បានទៅកាន់សុគតិភពកុំបីឃ្លៀងឃ្លាតឡើយ ៕
ចែករំលែកព័តមាននេះ