ខេត្តកំពង់ចាម ៖ រឿងរ៉ាវដ៏រន្ធត់មួយដែលកម្រនឹងកើតឡើងណាស់នៅតាមតំបន់ជនបទដាច់ស្រយាល ដោយបុរសជាប្ដីបានឈ្លោះជាមួយប្រពន្ធមានផ្ទៃពោះក៏កើតជាអំពើហិង្សាឈានទៅដល់ករណីឃាតកម្មសាហាវដោយបុរសជាប្ដីបានសម្លាប់ក្មួយៗដោយចាក់សាំងដុតប្រពន្ធកូនក្នុងផ្ទៃរួមទាំងម្ដាយក្មេកសរុបរហូតដល់១០នាក់ឯណោះ។
ហេតុការណ៍នេះបានកើតឡើងនៅផ្ទះចាំចំការ ក្នុងភូមិទួលសំបួរ ឃុំទួលសំបួរ ស្រុកស្ទឹងត្រង់ នៅយប់ទៀបភ្លឺម៉ោង៥ ឈានចូលព្រឹកថ្ងៃទី២៣វិច្ឆិកាឆ្នាំ ២០២៥។
ក្រោយហេតុការណ៍កើតឡើងកម្លាំងសមត្ថកិច្ចបានចុះស្រាវជ្រាវជាបន្ទាន់ក្រោមបញ្ជាពីលោកឧត្តមសេនីយ៍ស្នងការនគរបាលខេត្តឈានដល់ចាប់បុរសជាប្ដី បញ្ជូនមកកាន់ស្នងការដ្ឋាននគរបាលខេត្ត។
លោកវ៉ា ស្រេង មេឃុំទួលសំបួរ បានប្រាប់ឲ្យដឹងថា ដើមហេតុដំបូងប្រពន្ធជាជនរងគ្រោះនិងប្ដីបានឈ្លោះគ្នា ដោយទ្រាំមិនបាន ស្ត្រីជាប្រពន្ធក៏បានរត់មកផ្ទះម្ដាយនៅភូមិពោន ដែលមានចម្ងាយប្រមាណជាង៥គីឡូម៉ែត្រ ពីផ្ទះរបស់ខ្លួន ។ បន្ទាប់មកប្ដីដែលមានអាយុជាង ២០ឆ្នាំខឹងសម្បារនិងប្រពន្ធ ក៏ជិះម៉ូតូមកតាមរករឿងប្រពន្ធដល់ផ្ទះម្ដាយក្មេកទៀតដែលស្ថិតនៅភូមិពោន។ គ្រានោះប្ដីបានប្រព្រឹត្តនូវអំពើឃាតកម្មសាហាវដោយសម្លាប់ក្មួយៗនៅផ្ទះនោះទាំងអស់ រួមទាំងប្រពន្ធពោះធំកូនក្នុងផ្ទៃនិងម្ដាយក្មេក ដោយបានលើកគដាក់លើគ្នារួចចាក់សាំងដុតកំទេចចោលដើម្បីបំបាត់ភស្តុតាង។
ក្រោយពីកើតហេតុវត្ថុតាងដែលនៅសល់គឺមានប្រេងសាំងជិតមួយប៊ីដុងទៀត ដែលបុរសជាប្ដីបានទិញយកមកដើម្បីប្រព្រឹត្តនៅអំពើឃាតកម្មដែលពុំដែលកើតមានទាល់តែសោះនៅក្នុងឃុំមួយនេះ។
លោកមេឃុំបានបន្តឲ្យដឹងទៀតថារួមទាំងក្មួយ ដែលរត់មកក្រៅផ្ទះក៏ត្រូវបានបុរសនេះតាមសម្លាប់កាប់ទាំងពូជតែម្ដងសរុបទៅកើនដល់១០នាក់ ។ ក្រោយពីសម្លាប់មនុស្សជាសមាជិកក្រុមគ្រួសាររបស់ខ្លួនច្រើនបែបនេះក៏បានជិះម៉ូតូគេចមកផ្ទះរបស់ខ្លួនវិញ និងព្យាយាមជិះម៉ូតូរត់គេចដែរ តែត្រូវបានកម្លាំងនគរបាលមូលដ្ឋានតាមស្ទាក់ចាប់បាន។
ដោយឡែកមន្ត្រីសាលាស្រុកស្ទឹងត្រង់មួយរូបបានប្រាប់ឲ្យដឹងដែរថាក្រោយពីមានករណីអំពើឃាតកម្មឃោរឃៅនេះរួចមក កម្លាំងសមត្ថកិច្ចគ្រប់លំដាប់ថ្នាក់បានចុះទៅដល់គោលដៅ ដើម្បីហ៊ុមព័ទ្ធធ្វើការត្រួតពិនិត្យ ដោយមានទាំងនគរបាលបច្ចេកទេសនៃស្នងការដ្ឋាននគរបាលខេត្តសហការជាមួយនឹងអង្គការCPU របស់អូស្ត្រាលីបានមកដល់នៅឃុំទួលសំបួរ ស្រុកស្ទឹងត្រង់
ធ្វើការអង្កេតលើករណីនេះផងដែរ។
ជនសង្ស័យជាប្តីឈ្មោះ សុបិន្ត វិនា អាយុ២១ ឆ្នាំ រស់នៅភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម បានកាប់សម្លាប់ និងដុត ប្រពន្ធ ម្តាយក្មេក និងក្មួយៗដែលត្រូវជាសាច់ថ្លៃសរុបស្លាប់អស់ចំនួន ៩ នាក់ រួមមានៈ
១-ឈ្មោះ ស៊ុន ស្រឿន ភេទស្រី អាយុ៦៧ រស់នៅទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ត្រូវជាម្តាយក្មេកជនសង្ស័យ ។
២-ឈ្មោះ ធា តាំងលី ភេទស្រី អាយុ២០ឆ្នាំ (មានផ្ទៃពោះ) ត្រូវជាប្រពន្ធរបស់ជនសង្ស័យ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៣-ឈ្មោះ ស៊ីម វិសាល ភេទស្រី អាយុ១៤ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៤-ឈ្មោះ ផា បូតា ភេទប្រុស អាយុ១៣ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៥-ឈ្មោះ ផា ស្រីតាន ភេទស្រី អាយុ១១ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៦-ឈ្មោះ ធា ថាក់ ភេទប្រុស អាយុ៧ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៧-ឈ្មោះផា សុភ័ក្ត្រ ភេទប្រុស អាយុ៧ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៨-ឈ្មោះផា សម្ភស្ស ភេទស្រី អាយុ៥ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
៩-ឈ្មោះណាត នាង ភេទស្រី អាយុ២១ឆ្នាំ រស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
សូមបញ្ជាក់ថា សរុបទាំងកូនក្នុងផ្ទៃរបស់ស្ត្រីជាប្រពន្ធជនសង្ស័យផងនោះ អ្នកស្លាប់មានចំនួន១០នាក់។
បច្ចុប្បន្ន ជនសង្ស័យឈ្មោះ សុបិន្ត វិនា ខាងលើត្រូវបាននគរបាលស្នងការខេត្តឃាត់ខ្លួន ដើម្បីកសាងសំណុំរឿងតាមនីតិវិធី ។
ករណីអំពើហិង្សាខាងលើនេះដែលមានលក្ខណៈឃោរឃៅបែបនេះនៅក្នុងខេត្តកំពង់ចាមមិនដែលធ្លាប់កើតមានឡើងទាល់តែសោះ ទើបតែមានមួយករណីនេះ ៕
ចែករំលែកព័តមាននេះ