ខេត្តស្ទឹងត្រែង ៖ អាជ្ញាធរខេត្តស្ទឹងត្រែង រួមជាមួយស្ថាប័នពាក់ព័ន្ធ និងប្រជាពលរដ្ឋ បានរៀបចំពិធីអបអរសាទរ ទិវាអនាម័យបរិស្ថានជាតិ ២៣ វិច្ឆិកា នាឆ្នាំនេះ…
ខេត្តស្ទឹងត្រែង ៖ អាជ្ញាធរខេត្តស្ទឹងត្រែង រួមជាមួយស្ថាប័នពាក់ព័ន្ធ និងប្រជាពលរដ្ឋ បានរៀបចំពិធីអបអរសាទរ ទិវាអនាម័យបរិស្ថានជាតិ ២៣ វិច្ឆិកា នាឆ្នាំនេះ ក្រោមប្រធានបទដ៏សំខាន់គឺ «ទម្លាប់ស្អាត គ្រួសារស្អាត បរិស្ថានល្អ» ។
ពិធីនេះធ្វើឡើងនៅថ្ងៃទី២១ វិច្ឆិកា ២០២៥ ដោយមានគោលបំណងចម្បង ជំរុញស្មារតីទទួលខុសត្រូវរបស់ប្រជាពលរដ្ឋក្នុងខេត្ត ចំពោះកិច្ចគាំពារបរិស្ថាន និងអនាម័យសាធារណៈ។ បង្កើនការយល់ដឹងអំពីសារៈសំខាន់ នៃអនាម័យផ្ទាល់ខ្លួន គ្រួសារ និងបរិស្ថានរស់នៅ ដើម្បីសុខភាពល្អ និងគុណភាពជីវិត។ ជំរុញឱ្យមានការផ្លាស់ប្តូរផ្នត់គំនិត ដោយចាប់ផ្តើមពី ការទុកដាក់សំរាមឱ្យបានត្រឹមត្រូវ និងកាត់បន្ថយការប្រើប្រាស់ប្លាស្ទិក។ កៀរគរកម្លាំងពីគ្រប់មជ្ឈដ្ឋានក្នុងខេត្ត មន្ត្រីរាជការ សិស្ស និស្សិត វិស័យឯកជន ព្រះសង្ឃ និងប្រជាពលរដ្ឋ ឱ្យចូលរួមសម្អាត និងថែរក្សាសោភ័ណភាពតាមមូលដ្ឋានរៀងៗខ្លួន ។
ក្នុងឱកាសនេះ អាជ្ញាធរខេត្ត បានជំរុញឱ្យអនុវត្តសកម្មភាពជាក់ស្តែងរួមមាន ៖ យុទ្ធនាការសម្អាតទ្រង់ទ្រាយធំ រៀបចំសកម្មភាពរួមគ្នារើសសំរាម សម្អាតទីសាធារណៈ វត្តអារាមសាលារៀន និងដងផ្លូវក្នុងក្រុង និងជនបទ ។
អាជ្ញាធរខេត្តស្ទឹងត្រែង បានអំពាវនាវដល់ប្រជាពលរដ្ឋទាំងអស់ ឱ្យបន្តធ្វើសកម្មភាពអនាម័យបរិស្ថាននេះ ឱ្យក្លាយទៅជាទម្លាប់ប្រចាំថ្ងៃ ដើម្បីរួមចំណែកដល់ការសម្រេចបាននូវចក្ខុវិស័យកម្ពុជាស្អាត បៃតង និងចីរភាពសម្រាប់មនុស្សជំនាន់ក្រោយ ៕
ចែករំលែកព័តមាននេះ