ខេត្តសៀមរាប ៖ គិតត្រឹមវេលាម៉ោង ៦ និង ៣០នាទីយប់ថ្ងៃទី២០ ខែវិច្ឆិកា ឆ្នាំ២០២៥ ម្សិលមិញនេះ មានបងប្អូនប្រជាពលរដ្ឋដែលរស់នៅខេត្តសៀមរាប…
ខេត្តសៀមរាប ៖ គិតត្រឹមវេលាម៉ោង ៦ និង ៣០នាទីយប់ថ្ងៃទី២០ ខែវិច្ឆិកា ឆ្នាំ២០២៥ ម្សិលមិញនេះ មានបងប្អូនប្រជាពលរដ្ឋដែលរស់នៅខេត្តសៀមរាប ដែលបានជិះរថយន្តក្រុង ពីខេត្តសៀមរាប ឆ្ពោះទៅកាន់រាជធានីភ្នំពេញ ដើម្បីរកការងារធ្វើសំណង់ និង ចេញដំណើរទៅក្រៅប្រទេសបានជួបឧបទ្ទេវហេតុគ្រោះថ្នាក់ចរាចរណ៍នៅខេត្តកំពង់ធំ ដែលបណ្តាលឱ្យស្លាប់បងប្អូនប្រជាពលរដ្ឋ ប្រុស ស្រីរស់នៅក្នុងខេត្តសៀមរាបចំនួន ៦ នាក់ និង របួសធ្ងន់ស្រាល ៩ ក្នុង ចំណោមអ្នកស្លាប់សរុបចំនួន១៣ និង របួស ធ្ងន់ ស្រាល ជាង ២០នាក់។
ជនរងគ្រោះ ប្រុស ស្រី ដែលស្លាប់ និងរបួសធ្ងន់ស្រាលទាំង១៥ នាក់ នោះមាន : ១-ឈ្មោះ ស្រី ចៀន ភេទប្រុស អាយុ៣១ ឆ្នាំ ( របួសធ្ងន់) មុខរបរកម្មករសំណង់ រស់នៅក្នុងភូមិសាស្ត្រ ឃុំ យាងស្រុកពួក ខេត្តសៀមរាប ទៅធ្វើសំណង់ នៅភ្នំពេញ។ ២-ឈ្មោះ ស៊ាប ខ្មៅ ភេទស្រី អាយុ ៣០ ឆ្នាំ ( របួសធ្ងន់) មុខរបរកម្មករសំណង់ រស់នៅក្នុងភូមិសាស្ត្រ ឃុំយាង ស្រុកពួក ខេត្តសៀមរាប ទៅធ្វើសំណង់ នៅភ្នំពេញ។ ៣-ឈ្មោះ តក់ សាន់ ភេទប្រុស អាយុ២៤ឆ្នាំ ( ស្លាប់ ) មុខរបរកម្មករសំណង់ រស់នៅក្នុងភូមិសាស្ត្រ ឃុំ យាងស្រុកពួក ខេត្តសៀមរាប ទៅធ្វើសំណង់ នៅភ្នំពេញ។
៤-ឈ្មោះ ចេម ភេទស្រី អាយុជាង២០ឆ្នាំ ( ស្លាប់ ) មុខរបរកម្មករសំណង់ រស់នៅក្នុងភូមិសាស្ត្រ ស្រុកពួក ខេត្តសៀមរាប ទៅធ្វើសំណង់ នៅភ្នំពេញ។៥-ឈ្មោះ ឃ្លៀប យ៉េត ភេទស្រី អាយុ ៣១ ឆ្នាំ ( ស្លាប់ ) មុខរបរកម្មករសំណង់ រស់នៅក្នុងភូមិសាស្ត្រ ឃុំ យាង ស្រុកពួក ខេត្តសៀមរាប ទៅធ្វើសំណង់។ ៦-ឈ្មោះ តក់ សៃ ភេទស្រី អាយុ៣១ ឆ្នាំ (របួសធ្ងន់ ) មុខរបរកម្មករសំណង់ រស់នៅក្នុងភូមិសាស្ត្រ ឃុំយាង ស្រុកពួក ខេត្តសៀមរាប ទៅ ធ្វើសំណង់។ ៧-ឈ្មោះ ធឿន ថែន ភេទ ប្រុស អាយុ៣៧ ឆ្នាំ ( របួសធ្ងន់ ) មុខរបរកម្មករកសិករ រស់នៅក្នុងភូមិសាស្ត្រ ឃុំ យាង ស្រុកពួក ខេត្តសៀមរាប ទៅភ្នំពេញ រកការងារធ្វើ ។ ៨- ឈ្មោះ ស៊ីវ លាក់ ភេទ ស្រី អាយុ១៨ ឆ្នាំ ( របួសអ្ងន់ ) មុខរបរកម្មករកសិករ រស់នៅក្នុងភូមិ សាស្ត្រ ឃុំ ពោធិ៍ទ្រាយ ស្រុកពួក ខេត្តសៀមរាប ទៅភ្នំពេញ រកការងារធ្វើ ។
៩-ឈ្មោះ វី វ៉ាង ភេទ ប្រុស អាយុ២១ ឆ្នាំ ( របួសធ្ងន់ ) មុខរបរកម្មករកសិករ រស់នៅក្នុងភូមិសាស្ត្រ ឃុំ ពោធិ៍ទ្រាយ ស្រុកពួក ខេត្តសៀមរាប ទៅភ្នំពេញ រកការងារធ្វើ ។ ១០-ឈ្មោះ ឈុន ចាង គីម ភេទ ស្រី អាយុ១៨ ឆ្នាំ ( ស្លាប់ ) មុខរបរកម្មករកសិករ រស់នៅក្នុងភូមិសាស្ត្រ ឃុំ ពោធិ៍ទ្រាយ ស្រុកពួក ខេត្តសៀមរាប ទៅភ្នំពេញរកការងារ ធ្វើ ។ ១១-ឈ្មោះ ធួន ថាន ភេទ ប្រុស អាយុ៣២ ឆ្នាំ ( របួសធ្ងន់ ) មុខរបរកម្មករកសិករ រស់នៅក្នុងភូមិសាស្ត្រ ឃុំ សសរស្ដម្ភ ស្រុកពួក ខេត្តសៀមរាប ទៅភ្នំពេញ រកការងារធ្វើ ។ ១២- ឈ្មោះ ខ្លុយ សាស ភេទ ស្រីអាយុ ២៨ ឆ្នាំ ( របួសធ្ងន់ ) មុខរបរ កសិករ រស់នៅក្នុងភូមិសាស្ត្រ ឃុំ សសរស្ដម្ភ ស្រុកពួក ខេត្តសៀមរាប ទៅភ្នំពេញ ដើម្បីរកការងារធ្វើ។ ១៣-ឈ្មោះ ពាញ ហាង ភេទ ស្រី អាយុ ៥២ឆ្នាំ ( របួសធ្ងន់ ) មុខរបរ លក់ដូរ រស់នៅក្នុងភូមិ សាស្ត្រ ឃុំ មុខប៉ែន ស្រុកពួក ខេត្តសៀមរាប ទៅព្រលាន យន្តហោះ ភ្នំពេញ ដើម្បីចេញ ដំណើរទៅក្រៅប្រទេស។ ១៤ -ឈ្មោះ សុំ លីសួ ភេទ ប្រុស អាយុ៣៦ ឆ្នាំ ( ស្លាប់ ) មុខរបរលក់ដូរ រស់នៅក្នុងភូមិសាស្ត្រ ឃុំ មុខប៉ែន ស្រុកពួក ខេត្តសៀមរាប ទៅភ្នំពេញ ចេញទៅក្រៅប្រទេស និង១៥-ឈ្មោះ ភឹង សុឃា ភេទ ស្រី អាយុ២៦ ឆ្នាំ ( ស្លាប់ ) មុខរបរ លក់ដូរ រស់នៅក្នុងភូមិសាស្ត្រ ឃុំ មុខប៉ែន ស្រុកពួក ខេត្តសៀមរាប ទៅភ្នំពេញ ដើម្បីចេញដំណើរទៅ ក្រៅប្រទេស ។
បើតាមប្រសាសន៍របស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានប្រាប់ថា ក្នុងនាមក្រុមប្រឹក្សា គណៈអភិបាលខេត្ត មន្ត្រីរាជការ និងកង កម្លាំងប្រដាប់អាវុធទាំងអស់ក្នុងខេត្តពិតជាសោកស្តាយ និងសោកសង្រែកយ៉ាងខ្លាំងបន្ទាប់ពីទទួលបានដំណឹងដ៏រន្ធត់ តក់ស្លុតឥតឧបម៉ាដែលបានទទួលដំណឹងដ៏សែនក្រៀមក្រំចំពោះឧបទ្ទេវហេតុកគ្រោះថ្នាក់ចរាចរណ៍នៅខេត្តកំពង់ធំ កាលពីយប់កន្លងទៅនេះ។
សូមបញ្ជាក់ផងដែរថា អាជ្ញាធរខេត្តសៀមរាប សូមចូលរួមសោកស្តាយ និងរំលែកទុក្ខដ៏សែនក្រៀមក្រំនេះជាមួយនឹងក្រុមគ្រួសារសព និងសូមបួងសួងឱ្យដួងវិញ្ញាណក្ខន្ធរបស់បងប្អូនបានទៅកាន់សុខគតិភពកុំបីឃ្លៀងឃ្លាតឡេីយ ។
បើតាមការបញ្ជាក់ពីលោកឧត្តមសេនីយ៍ឯក ទេព ពុំ សែន អធិការនគរបាលស្រុកពួក បានប្រាប់ កោះសន្តិ ភាពយើង ឱ្យដឹងនៅរសៀលថ្ងៃទី ២១ ខែវិច្ឆិកា ឆ្នាំ ២០២៥ នេះថា បច្ចុប្បន្ន អាជ្ញាធរ ខេត្ត និង អាជ្ញាធរស្រុកពួក ព្រមទាំងអាជ្ញាធរមូលដ្ឋាន និងកម្លាំងប្រដាប់អាវុធបានចូលរួមបុណ្យសព ជាមួយក្រុមគ្រួសារប្រុសស្រីទាំង៦នាក់ផងដែរ ក្នុងនោះ សពជនរងគ្រោះ ប្រុស ស្រី ចំនួន ៣ បូជា នៅសាលាឆទាន ក្នុង ឃុំ យាង ស្រុកពួក ។
សាកសពជនរងគ្រោះ ប្រុស ស្រី ចំនួន២នាក់ត្រូវបាន ក្រុមគ្រួសារបូជានៅផ្ទះ ក្នុងឃុំមុខប៉ែន ស្រុកពួក ខេត្តសៀមរាប ។ រីឯសពកញ្ញា ឈុន ចាងគីម ត្រូវបានក្រុមគ្រួសារដឹកយកទៅបូជា នៅវត្តព្រះអង្គឈើខ្មៅ ក្នុងឃុំពោធិ៍ទ្រាយ ស្រុកពួក ខេត្តសៀមរាប ។ ចំពោះជនរងគ្រោះ ប្រុសស្រីទាំង៩នាក់ កំពុងសង្គ្រោះបន្ទាន់នៅមន្ទីរពេទ្យបង្អែកខេត្តសៀមរាបផងដែរ។
សូមរំលឹកឡើងិវញថា មានករណីរថយន្ដក្រុង២ជាន់ដឹកអ្នកដំណើរពេលយប់មួយគ្រឿង ផ្ទុកមនុស្សចំនួន៣៧នាក់ បានបុកបង្កាន់ដៃស្ពានអូរប្រសាទ ធ្លាក់ចូលទឹក បណ្តាលឱ្យស្លាប់មនុស្សចំនួន១៣នាក់ និងរបួសធ្ងន់ស្រាលចំនួន២៤នាក់
ហេតុការណ៍ខាងលើនេះ បានកើតឡើងនៅវេលាម៉ោង២ឈានចូលព្រឹកថ្ងៃទី២០ ខែវិច្ឆិកា ឆ្នាំ២០២៥ នៅចំណុចស្ពានអូរប្រសាទ ភូមិជ័យជំនះ ឃុំកកោះ ស្រុកសន្ទុក ខេត្តកំពង់ធំ។
ស្នងការនគរបាលខេត្តកំពង់ធំ លោកឧត្តមសេនីយ៍ទោ ហេង សុផល បានប្រាប់បណ្ដាញព័ត៌មាន ឲ្យដឹងថា មកទល់ព្រឹកថ្ងៃទី២០ វិច្ឆិកា សមត្ថកិច្ចបានស្ទួចយកឡានចេញពីទឹក និងរកឃើញមនុស្សស្លាប់ចំនួន១៣នាក់ ស្រី៨នាក់ និងអ្នករបួសធ្ងន់ស្រាល២៤នាក់។
ផ្អែកតាមការសន្និដ្ឋានរបស់សមត្ថកិច្ចជំហ៊ានដំបូង គ្រោះថ្នាក់ចរាចរណ៍នេះបណ្ដាលមកពីអ្នកបើកស្ថិតក្នុងស្ថានភាពងងុយដេក។
ក្រោយពេលកើតហេតុ សាកសពក្រោយស្រង់ពីទឹកសមត្ថកិច្ចបានយកទៅតម្កល់នៅវត្តកកោះ ឃុំកកោះ ស្រុកសន្ទុក ដើម្បីស្រាវជ្រាវរកអត្តសញ្ញាណ និងក្រុមគ្រួសារ ។
ដោយឡែក ជនរងគ្រោះជាអ្នកខេត្តសៀមរាប ដែលបានស្លាប់បាត់បង់ជីវិតចំនួន៦នាក់ ក្នុងហេតុការណ៍ខាងលើ ត្រូវបានក្រុមគ្រួសារសាច់ញាតិមកទទួលយកទៅធ្វើបុណ្យតាមប្រពៃណីនៅខេត្តសៀមរាបហើយ ៕
ចែករំលែកព័តមាននេះ