ទីក្រុងប្រ៊ុចសែល៖ អឺរ៉ុបថ្លែងថារាល់ផែនការសន្តិភាពណាមួយត្រូវតែឆ្លងកាត់ការពិគ្រោះយោបល់ជាមួយអឺរ៉ុប និងអ៊ុយក្រែន។ ថ្នាក់ដឹកនាំសហភាពអឺរ៉ុបចាប់ផ្ដើមបង្ហាញជំហររបស់ខ្លួនមិនគាំទ្រការសម្រេចអ្វីជាអត្តនោម័តពាក់ព័ន្ធនឹងផែនការសន្តិភាពសម្រាប់អ៊ុយក្រែន។ ការបង្ហាញជំហរដូច្នេះបន្ទាប់ពីគេទទួលដំណឹងថានៅក្នុងផែនការដែលផ្ដួចផ្ដើមដោយលោកត្រាំនោះមានលក្ខខណ្ឌជាច្រើនបង្ខំឱ្យអ៊ុយក្រែនធ្វើទៅតាមការទាមទាររបស់រុស្ស៊ីដើម្បីងាយស្រួលបញ្ចប់សង្គ្រាមឱ្យបានឆាប់។
ជាការពិត អាមេរិកគាំទ្រឱ្យគូបដិបក្សទាំង២ធ្វើសម្បទានឱ្យគ្នាទៅវិញទៅមកដូចអ្វីដែលរដ្ឋមន្ត្រីការបរទេសរបស់ខ្លួនបានបង្ហោះនៅលើបណ្ដាញអ៊ិចអីចឹង។ ក៏ប៉ុន្តែពួកអឺរ៉ុបនៅតែប្រកាន់ជំហររឹងទទឹងដដែលថារាល់ផែនការបញ្ចប់សង្គ្រាមអ៊ុយក្រែនដាច់ខាតត្រូវតែឆ្លងកាត់ការគាំទ្រពីអ៊ុយក្រែនដែលជាសាមីប្រទេសបូកជាមួយអឺរ៉ុបទៀតទើបអាចទៅរួច។
ប្រធានកិច្ចការបរទេសរបស់សហភាពអឺរ៉ុបដែលបានចូលរួមកិច្ចប្រជុំរដ្ឋមន្ត្រីការបរទេសអឺរ៉ុបនៅទីក្រុងប្រ៊ុចសែលថ្លែងថាអឺរ៉ុបតែងតែគាំទ្រជានិច្ចនូវសន្តិភាពជាអចិន្ត្រៃយ៍ និងប្រកបដោយយុត្តិធម៌។ យើងស្វាគមន៍ជានិច្ចនូវកិច្ចខិតខំប្រឹងប្រែងដើម្បីសម្រេចគោលដៅនេះ។ លោកស្រីសង្កត់ធ្ងន់ថាដើម្បីឱ្យផែនការសន្តិភាពនោះអាចសម្រេចទៅបានវាទាល់តែមានចំណែកអ៊ុយក្រែន និងអឺរ៉ុបចូលរួមផងដែរ។
ប្រធានកិច្ចការបរទេសសហភាពអឺរ៉ុប លោកស្រីខាចា ខាឡាស់ (Kaja Kallas)ប្រមុខការទូតអាល្លឺម៉ង់ អេស្ប៉ាញ និងប៉ូឡូញក៏គាំទ្រប្រសាសន៍របស់ប្រធានកិច្ចការបរទេសត្រង់ចំណុចនេះផងដែរ។ នាយករដ្ឋមន្ត្រីប៉ូឡូញថ្លែងថាសន្តិសុខជាតិរបស់អឺរ៉ុបនៅពេលនេះកំពុងតែមានបញ្ហា។ ដូច្នេះ លោកយល់ថាបើសិនជាមានកិច្ចព្រមព្រៀងសន្តិភាពណាមួយនាពេលអនាគតគួរណាស់ឆ្លងកាត់ការពិគ្រោះយោបល់ជាមួយអឺរ៉ុបជាមុនសិន។
បើគេស្ដាប់ពីខាងភាគីរុស្ស៊ីវិញម្ដង រុស្ស៊ីហាក់ដូចជាមិនទាន់មានអារម្មណ៍ចង់ចរចាគ្នានៅឡើយទេ។ រុស្ស៊ីថ្លែងថាបើចង់ឱ្យមានកិច្ចព្រមព្រៀងសន្តិភាពជាមួយអ៊ុយក្រែនលុះត្រាតែដោះស្រាយអ្វីដែលជាឫសគល់នៃសង្គ្រាមជាមុនសិន។ រុស្ស៊ីបញ្ជាក់ថាសម្រាប់ពេលនេះគ្មានការចរចាគ្នារវាងម៉ូស្គូ និងវ៉ាស៊ីនតោនពាក់ព័ន្ធនឹងផែនការសន្តិភាពណាមួយទេ។
ចំពោះសំណួរថាតើលោកពូទីនបានជ្រាបអំពីផែនការសន្តិភាពដែលផ្ដួចផ្ដើមឡើងដោយលោកត្រាំដែរឬទេ អ្នកនាំពាក្យវិមានក្រឹមឡាំងសូមមិនធ្វើអត្ថាធិប្បាយអ្វីទាំងអស់។ អឺរ៉ុបបារម្ភកាន់តែខ្លាំងថាសង្គ្រាមអ៊ុយក្រែនស្រួលមិនស្រួលអាចនឹងរីករាលដាលទៅដល់ព្រំដែនរបស់ខ្លួន។ មានការចោទប្រកាន់ជាបណ្ដើរៗថារុស្ស៊ីកំពុងធ្វើតេស្តសមត្ថភាពរបស់អឺរ៉ុបដោយវាយប្រហារតាមប្រព័ន្ធព័ត៌មានវិទ្យា និងបង្ហោះដ្រូនចូលដែនអាកាសរដ្ឋជាសមាជិកសហភាពអឺរ៉ុប ឬសមាជិកអង្គការណាតូ។
ឥឡូវនេះ មិនត្រឹមតែសហភាពអឺរ៉ុបទេ សូម្បីតែអង់គ្លេសក៏រុស្ស៊ីធ្វើតេស្តសមត្ថភាពដែរ។ ថ្មីៗនេះ អង់គ្លេសព្រមានថាខ្លួនសូមរក្សាសិទ្ធិប្រើប្រាស់វិធានការយោធាបន្ទាប់ពីនាវាស៊ើបការណ៍របស់រុស្ស៊ីដែលបើកទៅកៀកនឹងដែនសមុទ្រប្រទេសស្កុតលែនបានបាញ់កាំរស្មីឡាស៊ែដាក់ភ្នែកអាកាសយានិកអង់គ្លេស។ អង់គ្លេសព្រមានថាករណីនេះសូមកុំឱ្យកើតមានជាលើកទី២។ នេះបើយោងតាមប្រភពពីអាល់ចាស៊ីរ៉ា (al-Jazeera) និងប្រភពដទៃទៀត៕
ចែករំលែកព័តមាននេះ