ទីក្រុងឡុង៖ អង់គ្លេស និងរុស្ស៊ីចាប់ផ្ដើមមានភាពតានតឹងនឹងគ្នាបន្ថែមទៀតបន្ទាប់ពីមានភាពប្រទាំងប្រទើសគ្នាផ្នែកយោធាកាលពីពេលថ្មីៗនេះ។ រដ្ឋមន្ត្រីការពារជាតិអង់គ្លេស លោកចន ហ៊ាលី (John Healey)ព្រមានថាឱ្យតែរុស្ស៊ីហ៊ានហក់មកទៀត អង់គ្លេសនឹងប្រើចំណាត់ការយោធាតបទៅវិញជាមិនខានឡើយ។ លោកថ្លែងថាអង់គ្លេសត្រៀមខ្លួនរួចជាស្រេចដើម្បីឆ្លើយតបដោយកម្លាំងយោធាបើសិននាវាស៊ើបការណ៍សម្ងាត់របស់រុស្ស៊ីឈ្មោះយ៉ាន់តា (Yantar) ត្រូវអង់គ្លេសមើលឃើញថាជាគ្រោះគំរាមកំហែងចំពោះសន្តិសុខជាតិរបស់ខ្លួន។
លោកថ្លែងដូច្នេះបន្ទាប់ពីនាវារបស់រុស្ស៊ីមួយគ្រឿងនេះបានបាញ់កាំរស្មីឡាស៊ែដាក់អាកាសយានិករបស់អង់គ្លេសដែលអង់គ្លេសបញ្ជូនទៅត្រួតពិនិត្យមើលសភាពការណ៍។ ជានិច្ចកាល កងទ័ពភូមិន្ទជើងទឹក និងកងទ័ពភូមិន្ទជើងអាកាសរបស់អង់គ្លេសជាអ្នករ៉ាប់រងមើលការខុសត្រូវទៅលើអ្វីដែលអាចជាគ្រោះគំរាមកំហែងចំពោះសន្តិសុខជាតិអង់គ្លេស។ ក្រោយការផ្ទុះសង្គ្រាមអ៊ុយក្រែនកាលពីឆ្នាំ២០២២ អង្គភាពទាំង២នេះបង្កើនការឃ្លាំមើលកាន់តែខ្លាំងដើម្បីតាមចាប់សញ្ញានៃនាវាចម្បាំង និងនាវាមុជទឹករបស់រុស្ស៊ី។
រដ្ឋមន្ត្រីការពារជាតិអង់គ្លេសលោកហ៊ាលីថ្លែងថាការបាញ់កាំរស្មីឡាស៊ែដាក់អាកាសយានិកនៃកងទ័ពភូមិន្ទអាកាសអង់គ្លេសគឺជាទង្វើដ៏គ្រោះថ្នាក់បំផុត។ លោកព្រមានថារឿងនេះថ្ងៃមុខថ្ងៃក្រោយកុំឱ្យកើតមានតទៅទៀត។ បើមិនដូច្នេះទេ អង់គ្លេសលែងគួរសមហើយ ហើយនឹងបញ្ចេញប្រតិកម្មតបទៅវិញជាមិនខាន។ លោកថ្លែងបន្តទៀតថាយើងបានសម្រេចគ្នារួចហើយថានឹងចាត់វិធានការផ្នែកយោធាតបទៅនាវារបស់រុស្ស៊ីឈ្មោះយ៉ាន់តា។
នាវាឈ្មោះយ៉ាន់តាត្រូវបានផលិតឡើងដើម្បីស៊ើបការណ៍សម្ងាត់ ពោលគឺដើម្បីប្រមូលព័ត៌មានសម្ងាត់ពីប្រទេសដទៃទៀត និងសម្រាប់កំណត់ទីតាំងខ្សែកាបបាតសមុទ្រ។ នាវានេះបច្ចុប្បន្នកំពុងបើកប្រតិបត្តិការនៅលើដែនសមុទ្រដែលស្ថិតនៅកៀកៗនឹងសមុទ្ររបស់អង់គ្លេស។ ពោលគឺនៅភាគខាងជើងប្រទេសស្កុតលែន។ នេះបើយោងតាមការអះអាងរបស់លោកហ៊ាលី។
លោកថានេះជាលើកទីមួយដែលនាវាឈ្មោះយ៉ាន់តារបស់រុស្ស៊ីធ្វើសកម្មភាពដូចខាងលើនេះដាក់កងទ័ពភូមិន្ទអាកាសរបស់អង់គ្លេស។ យើងយកចិត្តទុកដាក់យ៉ាងខ្លាំងចំពោះបញ្ហានេះ។ រដ្ឋមន្ត្រីរូបនេះថ្លែងថាលោកបានកែសម្រួលវិធានផ្ទៃក្នុងរបស់កងនាវាចរណ៍អង់គ្លេស។ ធ្វើបែបនេះដើម្បីងាយស្រួលនៅពេលនាវានេះបើកចូលដែនសមុទ្ររបស់យើង យើងអាចតាមដានសភាពការណ៍ឱ្យបានដិតដល់ជាងមុន និងសង្កេតការណ៍ឱ្យបានដិតដល់ជាងមុនទៅលើសកម្មភាពរបស់នាវា។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ