ទីក្រុងប៉េកាំង៖ នៅពេលជម្លោះការទូតរវាងចិន និងជប៉ុនមិនទាន់ធូរស្រាលនៅឡើយទេក្រោយការថ្លែងសុន្ទរកថារបស់នាយករដ្ឋមន្ត្រីជប៉ុន លោកស្រីតាកាអ៊ីឈិ ពាក់ព័ន្ធនឹងបញ្ហាតៃវ៉ាន់ ថ្ងៃនេះ ប្រទេសចិនជម្រាបជូនភាគីជប៉ុនថាខ្លួននឹងផ្អាកនាំចូលគ្រឿងសមុទ្រទាំងអស់ពីប្រទេសជប៉ុនក្រោមហេតុផលភូតគាមអនាម័យ។ ពោលគឺប្រទេសចិនត្រូវការត្រួតពិនិត្យបន្ថែមទៀតទៅលើគុណភាពទឹកសមុទ្រក្រោយការបង្ហូរទឹកកាកសំណល់នុយក្លេអ៊ែររបស់ជប៉ុនចូលទៅក្នុងសមុទ្រ។
ថ្វីដ្បិតនៅក្នុងលិខិតបញ្ជាក់ដែលផ្ញើជូនជប៉ុននោះ ប្រទេសចិនមិនបាននិយាយពាក់ព័ន្ធនឹងជម្លោះការទូត ប៉ុន្តែព្រឹត្តិការណ៍ទាំង២នេះត្រូវគេគិតថាមានជាប់ពាក់ព័ន្ធគ្នា។ ប្រទេសចិនមានកំហឹងយ៉ាងខ្លាំងបន្ទាប់ពីលោកស្រីតាកាអ៊ីឈិប្រកាសថាជប៉ុនអាចនឹងបញ្ជូនកងទ័ពទៅធ្វើអន្តរាគមន៍ជួយតៃវ៉ាន់បើកោះនេះរងការវាយប្រហារពីកងទ័ពចិន។ ប្រតិកម្មចំពោះសុន្ទរកថាកាលពីថ្ងៃទី៧ ខែវិច្ឆិកានោះ ប្រទេសចិនបានកោះហៅឯកអគ្គរាជទូតជប៉ុនទៅឆ្លើយបំភ្លឺ និងបានអំពាវនាវឱ្យប្រជាជនខ្លួនផ្អាកធ្វើដំណើរទៅជប៉ុនព្រោះហេតុផលសុវត្ថិភាព។
គម្រោងចាក់បញ្ចាំងខ្សែភាពយន្តជប៉ុនក៏ត្រូវផ្អាកផងដែរ។ ដំណឹងស្ដីពីការផ្អាកនាំចូលគ្រឿងសមុទ្រជប៉ុនត្រូវបានផ្សព្វផ្សាយដោយទីភ្នាក់ងារព័ត៌មានក្យូដូ (Kyodo) និងអឹនអេចខេ (NHK) ដែលដកស្រង់ប្រភពស្នើសុំមិនបញ្ចេញឈ្មោះ។ មន្ត្រីដដែលនោះរៀបរាប់បន្តទៀតថាប្រទេសចិនបានផ្ដល់សេចក្ដីពន្យល់ថាការហាមនាំចូលគ្រឿងសមុទ្រជាវិធានការចាំបាច់ដែលខ្លួនត្រូវតែធ្វើដើម្បីត្រួតពិនិត្យមើលទឹកកាកសំណល់នុយក្លេអ៊ែរ។
អាងស្តុកទុកទឹកកាកសំណល់នុយក្លេអ៊ែររបស់ជប៉ុនប្រទេសចិនទើបតែចាប់ផ្ដើមអនុញ្ញាតឱ្យនាំចូលគ្រឿងសមុទ្រឡើងវិញពីប្រទេសជប៉ុនកាលពីពេលថ្មីៗនេះតែប៉ុណ្ណោះ។ ចិនផ្អាកនាំចូលកាលពីលើកមុនបន្ទាប់ពីជប៉ុនបង្ហូរទឹកកាកសំណល់កាលពីឆ្នាំ២០២៣។ ក្រុមអ្នកជំនាញរបស់អង្គការសហប្រជាជាតិអះអាងថាទឹកកាកសំណល់នោះមានសុវត្ថិភាពគ្រប់គ្រាន់។ ប៉ុន្តែប្រទេសចិនមិនអាចជឿទុកចិត្តបានទេ។ ចិនយល់ថាជប៉ុនធ្វើបែបនេះហាក់ដូចជាចាត់ទុកមហាសមុទ្រប៉ាស៊ីហ្វិចជាលូទឹកស្អុយ។ ដូច្នេះចិនក៏ចេញបម្រាមហាមឃាត់ការនាំចូលអាហារសមុទ្រពីជប៉ុន។
ទំនាក់ទំនងរវាងចិន និងជប៉ុនម្ដងក្ដៅម្ដងត្រជាក់មិនទៀងទាត់។ បញ្ហាចោទខ្លាំងដោយសាររឿងរ៉ាវពីអតីតកាលមួយផ្នែក និងជម្លោះបូរណភាពទឹកដីមួយផ្នែកដែលជាផ្ទាំងពពកខ្មៅតាមរំខានប្រទេសទាំង២មិនឱ្យមានទំនាក់ទំនងផ្អែមល្ហែមនឹងគ្នាបានឡើយ។ កាលពីថ្ងៃចន្ទ ប្រទេសជប៉ុនអំពាវនាវឱ្យប្រជាជនខ្លួនដែលកំពុងស្ថិតនៅប្រទេសចិនសូមបង្កើនការប្រុងប្រយ័ត្នចំពោះអ្វីដែលនៅជុំវិញខ្លួន និងគួរជៀសវាងកុំដើរចូលទៅក្នុងហ្វូងមនុស្ស។
ប្រទេសជប៉ុនព្យាយាមបន្ធូរបន្ថយភាពតានតឹង និងបានបញ្ជូនអ្នកការទូតរបស់ខ្លួនទៅទីក្រុងប៉េកាំងដើម្បីពិភាក្សាគ្នា។ នៅក្នុងកិច្ចជំនួបកាលពីថ្ងៃអង្គារ ប្រទេសចិននៅតែនិយាយដដែលឡើងវិញថាខ្លួនសូមប្រឆាំងជំទាស់នឹងពាក្យសម្ដីរបស់លោកស្រីតាកាអ៊ីឈិទោះបីជប៉ុនបញ្ជាក់រួចហើយថាពាក្យសម្ដីរបស់លោកស្រីជារឿងផ្សេង។ រីឯគោលជំហររបស់ជប៉ុនផ្សេង។ ជប៉ុនថាខ្លួននៅតែប្រកាន់ខ្ជាប់នយោបាយចិនតែមួយដូចដែលមានចែងនៅក្នុងសេចក្ដីថ្លែងការណ៍រួមរវាងចិន និងជប៉ុនឆ្នាំ១៩៧២។ នេះបើយោងតាមប្រភពពីអាអែហ្វប៉េ (AFP) និងប្រភពដទៃទៀត៕
ចែករំលែកព័តមាននេះ