ទីក្រុងវ៉ាស៊ីនតោន៖ មន្ទីបញ្ចកោណបានអនុម័តយល់ព្រមលក់ប្រព័ន្ធការពារដែនអាកាសម៉ាកណាសាម (NASAM) មានតម្លៃជិត៧រយលានដុល្លារទៅឱ្យតៃវ៉ាន់។ ខែលការពារដែនអាកាសនេះកំពុងប្រើប្រាស់សាកល្បងដើម្បីតតាំងជាមួយមីស៊ីលរបស់រុស្ស៊ីនៅក្នុងសង្គ្រាមអ៊ុយក្រែន។ បើគិតទាំងលើកនេះទៀត អាមេរិកយល់ព្រមលក់អាវុធឱ្យតៃវ៉ាន់ចំនួន២លើកត្រឹមតែរយៈពេលមួយសប្ដាហ៍នៅក្នុងតម្លៃមួយពាន់លានដុល្លារ។
ខែលការពារដែនអាកាសផលិតដោយក្រុមហ៊ុនអ័រធីអ៊ិច (RTX) នេះជាប្រព័ន្ធមីស៊ីលរយៈចម្ងាយមធ្យម និងជាអាវុធស៊េរីថ្មីសម្រាប់តៃវ៉ាន់។ មន្ទីរបញ្ចកោណបញ្ជាក់កាលពីថ្ងៃចន្ទថាក្រុមហ៊ុនខាងលើនេះទទួលបានសិទ្ធិចុះកិច្ចសន្យាដេញថ្លៃលក់ណាសាមទៅឱ្យតៃវ៉ាន់។ សង្ឃឹមថានឹងផលិតចប់សព្វគ្រប់បញ្ជូនទៅឱ្យតៃវ៉ាន់គ្រប់ត្រឹមខែកុម្ភៈ ឆ្នាំ២០៣១។
នៅឥណ្ឌូ-ប៉ាស៊ីហ្វិចមានតែប្រទេសអូស្ត្រាលី និងឥណ្ឌូណេស៊ីប៉ុណ្ណោះដែលមានប្រព័ន្ធការពារដែនអាកាសណាសាមនេះសម្រាប់ប្រើប្រាស់។ អាមេរិកធ្លាប់ប្រកាសតាំងពីឆ្នាំមុនថាតៃវ៉ាន់នឹងទទួលបានប្រព័ន្ធនេះចំនួនបីគ្រឿងនៅក្នុងគម្រោងទិញ-លក់តម្លៃ២ពាន់លានដុល្លារ។ មីស៊ីលនេះប្រើសាកនៅអ៊ុយក្រែនរួចហើយ ហើយឃើញថាមានប្រសិទ្ធភាពខ្ពស់អាចតទល់ជាមួយរុស្ស៊ីបាន។ ហេតុនេះ អាមេរិកក៏សម្រេចលក់ឱ្យតៃវ៉ាន់។ មីស៊ីលនេះកំពុងត្រូវប៉ាន់ និងមានប្រទេសជាច្រើនចង់ទិញ។
កាលពីថ្ងៃព្រហស្បតិ៍សប្ដាហ៍មុន អាមេរិកអនុម័តយល់ព្រមលក់យន្តហោះចម្បាំង និងគ្រឿងបន្លាស់យន្តហោះមួយចំនួនទៅឱ្យតៃវ៉ាន់តម្លៃសរុប៣៣០លានដុល្លារ។ នោះជាកិច្ចព្រមព្រៀងទិញ-លក់អាវុធរវាងអាមេរិក និងតៃវ៉ាន់ជាលើកដំបូងចាប់តាំងពីលោកត្រាំឡើងកាន់អំណាចកាលពីខែមករា។ បញ្ហានេះធ្វើឱ្យតៃវ៉ាន់ចាប់ផ្ដើមអរព្រួច ប៉ុន្តែចិនផ្ទុះកំហឹងយ៉ាងខ្លាំង។
គួរកត់សម្គាល់ថាការសម្រេចចិត្តលក់អាវុធទាំង២លើកទៅឱ្យតៃវ៉ាន់កើតឡើងចំពេលដែលប្រទេសចិន និងជប៉ុនកំពុងមានជម្លោះបែកផ្សែងផ្នែកការទូតដោយសារពាក្យសម្ដីរបស់នាយករដ្ឋមន្ត្រីជប៉ុន លោកស្រីតាកាអ៊ីឈិ ដែលចង់បញ្ជូនយោធាទៅជួយតៃវ៉ាន់បើសិនកោះនេះរងការវាយប្រហារពីសំណាក់កងទ័ពចិននាពេលអនាគត។
កាលពីថ្ងៃសៅរ៍កន្លងទៅនេះ នាវាល្បាតរបស់ចិនបានបើកកាត់ដែនសមុទ្រនៅក្បែរប្រជុំកោះដែលជប៉ុនហៅថាស៊ីនកាគូ ឬភាសាចិនហៅថាទាវយូ។ ជប៉ុនថ្លែងថានៅក្នុងគ្រានោះ ខ្លួនបានចល័តយន្តហោះចម្បាំងជាច្រើនគ្រឿងបន្ទាប់ពីចិនបង្ហោះដ្រូន១គ្រឿងនៅចន្លោះកោះតៃវ៉ាន់ និងកោះយ៉ូណាគូនិ (Yonaguni) របស់ជប៉ុននៅប៉ែកខាងលិចបំផុត។ នេះបើយោងតាមប្រភពពីអាល់ចាស៊ីរ៉ា (al Jazeera) និងប្រភពដទៃទៀត៕
ចែករំលែកព័តមាននេះ