ខេត្តបាត់ដំបង ៖ បុរសម្នាក់ដែលគេស្គាល់ព្រាលៗថា ជា«ឌីជេ» ច្រៀងចល័តផង ទំនងទើបចេញពី«ក្លិបរាត្រី»ហើយស្ថិតក្នុងស្ថានភាពស្រវឹងផង បានជិះម៉ូតូលឿនស្លុយបំបុកចូលហាងលក់ការ៉េមដ៏ល្បីមួយកន្លែង កាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១៩ វិច្ឆិកា…
ខេត្តបាត់ដំបង ៖ បុរសម្នាក់ដែលគេស្គាល់ព្រាលៗថា ជា«ឌីជេ» ច្រៀងចល័តផង ទំនងទើបចេញពី«ក្លិបរាត្រី»ហើយស្ថិតក្នុងស្ថានភាពស្រវឹងផង បានជិះម៉ូតូលឿនស្លុយបំបុកចូលហាងលក់ការ៉េមដ៏ល្បីមួយកន្លែង កាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១៩ វិច្ឆិកា ២០២៥ ត្រង់ចំណុចផ្លូវបែកជាបួន ក្នុងភូមិរំចេក៤ សង្កាត់រតនៈ ក្រុងបាត់ដំបង ។
នៅកន្លែងកើតហតុ គេមិនទាន់ស្គាល់អត្តសញ្ញាណជនរងគ្រោះជាក់លាក់ទេ តែមានសាក្សីខ្លះស្គាល់ថា បុរសនោះឈ្មោះណាក់ ជា«ឌីជេ»មិនសូវល្បីឈ្មោះម្នាក់ ធ្វើការនៅក្នុងក្លិបរាត្រីមួយកន្លែងស្ថិតនៅខាងត្បូងចំណុចកើតហេតុប្រហែល៤០០ម៉ែត្រ ។ សាក្សីបាននិយាយថា «ឌីជេ» រូបនេះ បានជិះម៉ូតូម៉ាកស្គូពី ពណ៌ខ្មៅ ពាក់ស្លាកលេខបាត់ដំបង 1AS-7781 ធ្វើដំណើរពីទិសខាងត្បូង (ចេញពីក្លិបដែលខ្លួនធ្វើការ)ឆ្ពោះទៅខាងជើង ។ ប៉ុន្តែពេលទៅដល់ចំណុចកើតហេតុ ត្រង់ផ្លូវបំបែកជាបួន បែរជាបុរសនេះបានជិះទៅត្រង់ស្លុយ ខុសផ្លូវក៏ជ្រុលទៅបុកចូលហាងលក់ការ៉េមគេពេញទំហឹង ដែលមានជញ្ជាំងសុទ្ធតែកញ្ចក់ក្រាស់ឃ្មឹក បណ្ដាលឲ្យបែកខ្ទេចខ្ទីរ និងមុតរបួសស្ទើរសុះសាច់ ឈាមហូរជោកពេញរាងកាយ ។
បើពិនិត្យកាមេរ៉ាសុវត្ថិភាព ដែលម្ចាស់ហាងការ៉េមបំពាក់នៅខាងមុខ គេឃើញជនរងគ្រោះរូបនេះជិះម៉ូតូមកពីទិសខាងត្បូងលឿនស្លុយ ហាក់ដូចគ្មានស្មារតីអ្វីបន្តិចសោះឡើយ សំដៅបុកចូលហាងលក់ការ៉េមដល់ខាងក្នុងផ្អើលម្ចាស់ហាង និងអ្នកភូមិទាំងរំលងអធ្រាត្រ ។ នៅកន្លែងកើតហេតុ គេឃើញ«ឌីជេ»រូបនេះ ស្ថិតក្នុងស្ថានភាពជោកជាំទៅដោយឈាម ងើបអង្គុយនៅចំកណ្ដាលហាងការ៉េម ខណៈម៉ូតូដេកលើបំណែកកញ្ចក់មើលគូរព្រឺសម្បុរ ។
មន្ត្រីចរាចរណ៍បានចុះទៅកាន់ចំណុចកើតហេតុភ្លាមៗក្រោយទទូលដំណឹង ដើម្បីដឹកជនរងគ្រោះទៅកាន់មន្ទីរពេទ្យ ។ ប្រធានការិយាល័យចរាចរណ៍ជើងគោកនៃស្នងការខេត្ត លោក ចាន់ សុធី បានប្រាប់ថា បើតាមការសួរនាំបឋម ជនរងគ្រោះជា «ឌីជេ» ប្រចាំក្លិបរាត្រីមួយកន្លែង ហើយទំនងជាទើបចេញពី«ក្លិបរាត្រី»នោះ ហើយស្រវឹងផង ទើបជិះម៉ូតូបុកចូលហាងលក់ការ៉េមទាំងមិនដឹងខ្លួនបែបនេះ ។
លោកចាន់ សុធី បានបញ្ជាក់ថា ពេលនេះ ជនរងគ្រោះកំពុងសម្រាកនៅមន្ទីរពេទ្យនៅឡើយ ។ ករណីនេះ ភាគីទាំងពីរនឹងត្រៀមជួបចរចាគ្នាហើយ ។ ព្រោះបើតាមព័ត៌មានបឋមភាគីបង្ក (ឌីជេ) យល់ព្រមសងថ្លៃខូចខាតទៅម្ចាស់ហាងលក់ការ៉េម ៕
ចែករំលែកព័តមាននេះ