រាជធានីភ្នំពេញ ៖ ករណីដុតកង់ឡាន ដោយសារជម្លោះរវាងពលរដ្ឋ និងពលរដ្ឋ ទាក់ទិនរឿងច្រកចេញចូលលំនៅឋាន ពេលនេះ អាជ្ញាធរខណ្ឌ៧មករា បានជួយសម្របសម្រួលដោះស្រាយហើយ ។…
រាជធានីភ្នំពេញ ៖ ករណីដុតកង់ឡាន ដោយសារជម្លោះរវាងពលរដ្ឋ និងពលរដ្ឋ ទាក់ទិនរឿងច្រកចេញចូលលំនៅឋាន ពេលនេះ អាជ្ញាធរខណ្ឌ៧មករា បានជួយសម្របសម្រួលដោះស្រាយហើយ ។
ករណីដុតកង់ឡាននេះ បានបង្កភ្ញាក់ផ្អើលកាលពីព្រឹកថ្ងៃទី១៩ ខែវិច្ឆិកា ឆ្នាំ២០២៥នេះ មានបងប្អូនពលរដ្ឋ ១៣នាក់ ដែលរស់នៅអាគារខុនដូរមួយកន្លែង បានប្រមូលផ្តុំគ្នា ធ្វើការដុតសម្បកកង់ឡាន នៅលើច្រកដីឡូតិ៍ មួយកន្លែង កែងផ្លូវលេខ១៣៩ ក្នុងសង្កាត់វាលវង់ ខណ្ឌ៧មករា ។
ការបង្កបាតុភាពតាមរយៈការដុតសម្បកកង់ឡាននេះ គឺដោយសារពលរដ្ឋទាំង ១៣នាក់ខាងលើ ទាមទារឲ្យពលរដ្ឋជាម្ចាស់ដីឡូតិ៍មួយកន្លែង ដែលមានទីតាំងនៅខាងក្រោយខុនដូរ ដែលពួកគេរស់នៅនោះ សុំឲ្យបើកច្រកនោះ ជាផ្លូវសាធារណៈ សម្រាប់ប្រើប្រាស់ជាផលប្រយោជន៍រួម សម្រាប់ពលរដ្ឋគ្រប់គ្នា ក៏ប៉ុន្តែភាគីម្ចាស់ដីឡូតិ៍ មិនយល់ព្រម ដោយបញ្ជាក់ថា វាជាកម្មសិទ្ធិឯកជន ពុំមែនជាសម្បត្តិរដ្ឋនោះឡើយ ។
កន្លងទៅ ម្ចាស់ដីឡូតិ៍ ធ្លាប់បានជួលច្រកចូលខាងលើ ឲ្យអ្នកមើលការខុសត្រូវអាគារខុនដូរ ដែលនៅជាប់ផ្លូវនោះ ដើម្បីបង្កលក្ខណៈងាយស្រួលសម្រាប់ការចេញចូលរស់នៅប្រចាំថ្ងៃ ក៏ដូចជាការចតរថយន្តរបស់ពលរដ្ឋរស់នៅអាគារខុនដូរ ជាដើម ក៏ប៉ុន្តែក្នុងមួយរយៈពេលក្រោយមកនេះ ដោយម្ចាស់ដីឡូតិ៍ ពុំទទួលបានថវិការថ្លៃជួល ពីភាគីអ្នកគ្រប់គ្រងខុនដូរ ទើបម្ចាស់ដីឡូតិ៍ សម្រេចយកច្រកនោះ មកគ្រប់គ្រងជាកម្មសិទ្ធិឯកជនភាពផ្ទាល់ខ្លួនវិញ ក៏បង្កឲ្យមានបាតុភាព កើតទុកមិនសុខចិត្តពីបងប្អូនពលរដ្ឋរស់នៅអាគារខុនដូរ ដែលឧស្សាហ៍ប្រើប្រាស់ច្រកនោះតែម្តងទៅ ។
ជុំវិញបាតុភាពដុតសម្បកកង់ឡាន អាជ្ញាធរខណ្ឌ៧មករា ក៏បានអញ្ចើញអ្នកពាក់ព័ន្ធទាំង១៣នាក់ (ស្រី៦នាក់) យកទៅធ្វើការអប់រំ ណែនាំ និងធ្វើកិច្ចសន្យា ស្នើឲ្យបញ្ឈប់រាល់សកម្មភាពទាំងឡាយណា ដែលបង្កឲ្យមានការប៉ះពាល់ដល់សណ្តាប់ធ្នាប់សាធារណៈ និងសន្តិសុខសង្គមបន្តទៀត ។
អាជ្ញាធរខណ្ឌ៧មករា បញ្ជាក់ថា បញ្ហាទំនាស់ច្រកដីឡូតិ៍នោះ បច្ចុប្បន្នក្រុមមន្ត្រីជំនាញ ទាំងថ្នាក់មន្ទីរ ក៏ដូចជាក្រសួងរៀបចំដែនដី នគររូបនីយ៍កម្ម និងសំណង់ បាននិងកំពុងដោះស្រាយបញ្ហានេះយ៉ាងយកចិត្តទុកដាក់ តាមជំនាញហើយ ដូច្នោះហើយ អាជ្ញាធរមូលដ្ឋានស្នើឲ្យបងប្អូន ដែលកំពុងមានការកើតទុកមិនសុខចិត្តខាងលើ សូមរក្សាភាពស្ងប់ស្ងៀម និងរងចាំដំណោះស្រាយពីថ្នាក់នាំក្រសួងជំនាញ ដើម្បីទទួលបានលទ្ធផលត្រឹមត្រូវ និងវិជ្ជមាន សម្រាប់គ្រប់ៗគ្នា ។
ក្នុងនាមរដ្ឋបាលខណ្ឌ៧មករា បញ្ជាក់ទៀតថា អ្វីដែលជាសម្បត្តិរដ្ឋ នៅតែជាកម្មសិទ្ធិរដ្ឋ ពុំអនុញ្ញាតឲ្យបុគ្គលណា រំលោភបំពាននោះឡើយ ក៏ប៉ុន្តែប្រសិនបើសម្បត្តិណា ជាកម្មសិទ្ធិឯកជន វិញនោះ រដ្ឋអំណាចត្រូវតែថែរក្សាជូនគាត់ ទៅតាមច្បាប់ បញ្ចៀសដាច់ខាតពីការរំលោភបំពានពីភាគីណាមួយ ដែលពុំមែនជាម្ចាស់កម្មសិទ្ធិ ។
បច្ចុប្បន្ន អាជ្ញាធរមានសមត្ថកិច្ច បានអប់រំ និងធ្វើកិច្ចសន្យាទៅដល់ពលរដ្ឋទាំង ១៣នាក់ខាងលើ រួចអោយត្រឡប់ទៅផ្ទះវិញ ក្នុងលក្ខខណ្ឌបង្កបាតុភាព ធ្វើអោយប៉ះពាល់ដល់សណ្តាប់ធ្នាប់សាធារណៈទៀត អាជ្ញាធរនឹងចាត់តាមការផ្លូវច្បាប់ ៕
ចែករំលែកព័តមាននេះ