រាជធានីភ្នំពេញ ៖ នៅមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃទី១៨ ខែវិច្ឆិកា ឆ្នាំ២០២៥ មានបើកកិច្ចប្រជុំមួយជាមួយប្រតិភូគ្រូបង្វឹក និងតំណាងសហព័ន្ធកីឡាជាតិ ក្នុងការរៀបចំផែនការអនុវត្តឱ្យបានល្អត្រៀមចេញទៅប្រកួតកីឡាស៊ីហ្គេមលើកទី៣៣នៅប្រទេសថៃដែលនឹងធ្វើឡើងនៅក្នុងខែធ្នូ ឆ្នាំ២០២៥។
នៅក្នុងកិច្ចប្រជុំនោះមិនមានការបង្ហាញតម្រុយណាមួយពីការបញ្ជូនប្រតិភូ គ្រូបង្វឹក កីឡាករ-កីឡាការិនីប៉ុន្មាននាក់ និងប៉ុន្មានប្រភេទកីឡាទៅចូលរួមនោះទេ។ កិច្ចប្រជុំនេះគ្រាន់តែធ្វើឡើងដើម្បីណែនាំអនុសាសន៍របស់សម្ដេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជាតាមរយៈឯកឧត្តមវ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ឱ្យប្រតិភូកីឡា គ្រូបង្វឹក កីឡាករ-កីឡាការិនីទាំងអស់ដែលមានភារកិច្ចត្រូវទៅប្រកួត ត្រូវប្រកាន់ខ្ជាប់នូវវិន័យ ក្រមសីលធម៌ សេចក្ដីថ្លៃថ្នូរ អត់ធ្មត់ និងត្រូវគិតពីសុខសុវត្ថិភាពជាចម្បង។
ព្រឹត្តិការណ៍កីឡាស៊ីហ្គេមលើកទី៣៣នៅប្រទេសថៃនឹងត្រូវធ្វើឡើងចាប់ពីថ្ងៃទី៩ ដល់ថ្ងៃទី២០ ខែធ្នូ ឆ្នាំ២០២៥ខាងមុខនេះ។ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាគឺជាអនុប្រធានប្រតិភូកីឡាស៊ីហ្គេម លោក ញាន សុខវិសាល ប្រធាននាយកដ្ឋានពហុកីឡាអមគណៈកម្មាធិការជាតិអូឡាំពិកកម្ពុជា ជានាយបេសកកម្ម និងលោកយាន គីស៊ីវុត្ថា ប្រធានមជ្ឈមណ្ឌលជាតិហ្វឹកហ្វឺនកីឡាជានាយរងបេសកកម្ម។
គួរឱ្យដឹងផងដែរថា កិច្ចប្រជុំនេះមានការចូលរួមពីប្រតិភូកីឡា តំណាងសហព័ន្ធកីឡាជាតិនិងគ្រូបង្វឹក ដែលត្រូវទៅចូលរួមប្រកួតដើម្បីធ្វើការពន្យល់ណែនាំអំឡុងមុនពេលប្រកួត និងក្នុងពេលប្រកួត ត្រៀមលក្ខណៈឱ្យបានល្អ។
ជាពិសេសក្នុងការត្រៀមលក្ខណៈចូលជួបសំណេះសំណាលជាមួយឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួអប់រំ យុវជន និងកីឡា តំណាងដ៏ខ្ពង់ខ្ពស់របស់សម្ដេចបវរធិបតីហ៊ុន ម៉ាណែត នៅវិមានសន្តិភាពនាថ្ងៃទី២៤ ខែវិច្ឆិកា ឆ្នាំ២០២៥ ៕
ចែករំលែកព័តមាននេះ