ខេត្តព្រៃវែង ៖ កសិករនៅឃុំល្វា ស្រុកព្រះស្ដេច ខេត្តព្រៃវែង បានរៀបរាប់ទាំងញញឹមថា ពេលនេះពួកគាត់សប្បាយចិត្ត ព្រោះតម្លៃស្រូវបានងើបឡើងវិញបន្តិចហើយ ធ្វើឱ្យពួកគាត់ជាកសិករមានកម្លាំងតស៊ូក្នុងការធ្វើស្រែបន្តទៅទៀត ។…
ខេត្តព្រៃវែង ៖ កសិករនៅឃុំល្វា ស្រុកព្រះស្ដេច ខេត្តព្រៃវែង បានរៀបរាប់ទាំងញញឹមថា ពេលនេះពួកគាត់សប្បាយចិត្ត ព្រោះតម្លៃស្រូវបានងើបឡើងវិញបន្តិចហើយ ធ្វើឱ្យពួកគាត់ជាកសិករមានកម្លាំងតស៊ូក្នុងការធ្វើស្រែបន្តទៅទៀត ។ កសិករទាំងនោះបានឱ្យដឹងទៀតថា ប៉ុន្មានខែមុនតម្លៃស្រូវក្នុងមួយគីឡូលក់បានតែ ៦០០រៀលប៉ុណ្ណោះ តម្លៃនេះបើស្រូវបានផលច្រើនពួកគាត់អាចទប់ទល់រួចខ្លួន តែបើស្រែមិនសូវបានផល គឺត្រូវខាតចូលដើមហើយ ។ ប៉ុន្តែពេលនេះតម្លៃស្រូវបានងើបឡើងបន្តិចហើយគឺ ៧០០រៀលក្នុងមួយគីឡូក្រាម តម្លៃនេះទោះមិនចំណេញក៏មិនខាតដើមដែរ ។
កសិករទាំងនោះបញ្ជាក់ថា តម្លៃស្រូវបានងើបឡើងវិញធ្វើឱ្យពួកគាត់សប្បាយចិត្តណាស់ ប៉ុន្តែជាមួយគ្នានេះតម្លៃជីនៅតែថ្លៃកប់ពពក ដូច្នេះពួកគាត់សំណូមពរឱ្យអាជ្ញាធរ ក៏ដូចជាមន្ត្រីជំនាញជួយដោះស្រាយបញ្ហាតម្លៃជីនេះ ធ្វើយ៉ាងណាឱ្យវានៅក្នុងកម្រិតមួយដែលសមរម្យ អាចឱ្យកសិករធ្វើស្រែបានចំណេញខ្លះ ខណៈសព្វថ្ងៃនេះជីមួយបាវតម្លៃជិត ២០ម៉ឺនរៀលទៅហើយ ។
ដោយឡែកក្រុមឈ្មួញកណ្ដាល ដែលចុះមកប្រមូលទិញស្រូវពីកសិករនៅតាមវាលស្រែ បានឱ្យដឹងថា សព្វថ្ងៃនេះពួកគាត់ប្រមូលទិញស្រូវពីកសិករយកទៅលក់ឱ្យឈ្មួញវៀតណាម នៅព្រំដែន ពួកគាត់ក៏ចង់ឱ្យតម្លៃស្រូវឡើងខ្ពស់ដែរ ព្រោះបើស្រូវថោកកសិករឈប់ធ្វើស្រែ ពួកគាត់ជាឈ្មួញកណ្ដាលក៏លែងមានស្រូវទិញដែរ តែសព្វថ្ងៃនេះតម្លៃស្រូវ គឺស្ថិតនៅលើឈ្មួញវៀតណាម ៕
ចែករំលែកព័តមាននេះ