ចុះសួរសុខទុក្ខនិងយកអំណោយឧបត្ថម្ភគ្រួសារអាវុធហត្ថមានជំងឺ ពលី មរណៈ និងចូលនិវត្តន៍

ថ្ងៃទី ២០ ខែ កក្កដា ឆ្នាំ ២០១១

ម៉ោង ០២:១៧

ខេត្តបន្ទាយមានជ័យ ៖ ដើម្បីអបអរសាទរខួបលើទី១៨ ថ្ងៃកំណើតកងរាជអាវុធហត្ថ ១៤កក្កដា ១៩៩៣-១៤កក្កដា ២០១១ កាលពីថ្ងៃទី១៨ កក្កដា ២០១១ លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថខេត្តបន្ទាយមានជ័យ បាននាំយកអំណោយចុះសួរសុខទុក្ខគ្រួសារកងរាជអាវុធហត្ថដែលមានជំងឺ ពលី មរណៈ និងចូលនិវត្តន៍ទូទាំងខេត្ត ។

លោកឧត្តមសេនីយ៍ទោ រ័ត្ន ស្រ៊ាង បានឱ្យដឹងថា ដើម្បីចូលរួមអបអរខួបកំណើតលើកទី ១៨ របស់កងរាជអាវុធហត្ថ លោករួមជាមួយនឹងមេបញ្ជាការរងបានចុះសួរសុខទុក្ខនាំយកអំណោយរួមមាន មី៣កេសធំ, ទឹកត្រី ទឹកស៊ីអ៊ីវ៨យួរ, ទឹកផ្លែឈើ១កេស, អង្ករ៣០គីឡូក្រាម, ថវិកា១០ម៉ឺនរៀល ចែកជូនដល់គ្រួសារអាវុធហត្ថពលី មរណៈ មានជំងឺ និងចូលនិវត្តន៍សរុបទាំងអស់២៤គ្រួសារ។ ក្នុងនោះនៅទីបញ្ជាការ៧គ្រួសារ, នៅស្រុកម៉ាឡៃ៨គ្រួសារ ស្រុកមង្គលបូរី១គ្រួសារ ថ្មពួក២គ្រួសារ ក្រុងសិរីសោភ័ណ៦គ្រួសារ ដែលក្នុង១គ្រួសារទទួលបានអំណោយខាងលើ។ ជាមួយនឹងការចុះសួរសុខទុក្ខលើកទឹកចិត្តដល់កងកម្លាំង និងគ្រួសារកងរាជអាវុធហត្ថនេះ លោកក៏បានដឹកនាំកងកម្លាំងនិងយុវជនផ្ដាច់សារធាតុញៀនចុះធ្វើពលកម្មសម្អាតតាមទីសាធារណៈក្នុងក្រុងសិរីសោភ័ណផងដែរ៕