រាជធានីភ្នំពេញ ៖ រោងស្តុកអេតចាយ និងស្នាក់នៅរបស់កម្មករមួយកន្លែង នៅតាមផ្លូវ២១៧ ក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ត្រូវបានអគ្គិភ័យឆាបឆេះយ៉ាងសន្ធោសន្ធៅ…
រាជធានីភ្នំពេញ ៖ រោងស្តុកអេតចាយ និងស្នាក់នៅរបស់កម្មករមួយកន្លែង នៅតាមផ្លូវ២១៧ ក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ត្រូវបានអគ្គិភ័យឆាបឆេះយ៉ាងសន្ធោសន្ធៅ ហើយរថយន្តពន្លត់អគ្គិភ័យជាច្រើនគ្រឿងចេញអន្តរាគមន៍បាញ់។ ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង២ និង១៥នាទីរសៀលថ្ងៃទី១៧ ខែវិច្ឆិកា ឆ្នាំ២០២៥ ។
តាមព័ត៌មានឲ្យដឹងថា នៅមុនពេលកើតហេតុ គេឃើញភ្លើងបានឆាបឆេះគំនរអេតចាយនិងរាលដាលទៅរោងស្នាក់នៅរបស់កម្មករយ៉ាងសន្ធោសន្ធៅផ្សែងហុយខ្មួលខ្មាញ់ទៅលើអាកាសបង្កឲ្យមានការភ្ញាក់ផ្អើលស្ទើរមួយចំហៀងក្រុង ហើយរថយន្តជាច្រើនគ្រឿងទៅអន្តរាគមន៍បាញ់ពន្លត់ ។ នៅក្នុងហេតុការណ៍នោះ គេឃើញភ្លើងបានឆេះពេញបន្ទុកនិងផ្ទុះកំប៉ុងធូបមូសលាន់ដូចដុតកាំជ្រួច ។
តាមប្រភពព័ត៌មានពីអ្នកមើលការនៅកន្លែងស្តុកអេតចាយបានអោយដឹងថា មុនពេលកើតហេតុ កម្មករប្រហែល៤ទៅ៥នាក់កំពុងតែប្រមូលកំប៉ុងបាញ់ថ្នាំមូស ដាក់ចូលទៅក្នុងឃ្លាំងស្តុកអេតចាយ ស្រាប់តែផ្ទុះកំប៉ុងថ្នាំមូសបានផ្ទុះ បណ្តាលអោយឆាបឆេះយ៉ាងសន្ធោសន្ធៅតែម្តង ។
តាមនគរបាលការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថា បន្ទាប់ពីកើតមានអគ្គិភ័យរថយន្តពន្លត់អគ្គិភ័យចំនួន៣គ្រឿងបានទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញកាលពីវេលាម៉ោង៣រសៀលថ្ងៃដដែលពុំបណ្ដាឱ្យឆេះរាលដាដល់លំនៅឋាននៅត្បែរនោះឡើយ ។
តាមនគរបាលបានឱ្យដឹងទៀតថា រោងអេតចាយទំហំ២០ម៉ែត្រ គុណ៥០ម៉ែត្រ រួមនិងសម្ភារអេតចាយមួយចំនួន និងម៉ូតូចំនួន០១គ្រឿង និងម៉ូតូរ៉ឺម៉កចំនួន០២គ្រឿង ត្រូវភ្លើងឆាបឆេះរងការខូចខាតទាំងស្រុង ។ មូលហេតុនាំឲ្យកើតមានអគ្គិភ័យបណ្តាលមកពីផ្ទុះកំប៉ុងធូបមូស ៕
ចែករំលែកព័តមាននេះ