រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានស្នើសុំឲ្យព្រះសង្ឃបន្តតួនាទីនៅក្នុងការពង្រឹងការអប់រំ និងគុណធម៌ ក៏ដូចជាបណ្តុះទឹកចិត្តដល់ពលរដ្ឋនៅក្នុងខឿនការពារជាតិ ។…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានស្នើសុំឲ្យព្រះសង្ឃបន្តតួនាទីនៅក្នុងការពង្រឹងការអប់រំ និងគុណធម៌ ក៏ដូចជាបណ្តុះទឹកចិត្តដល់ពលរដ្ឋនៅក្នុងខឿនការពារជាតិ ។
មានប្រសាសន៍នៅក្នុងពិធីបើក «អនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ ឆ្នាំ២០២៥» នៅថ្ងៃទី១៧ ខែវិច្ឆិកា ឆ្នាំ២០២៥ សម្តេចតេជោបានមានប្រសាសន៍ថា ចំនួនព្រះសង្ឃ គឺស្មើនឹង១ភាគ៥នៃកងទ័ព ដូច្នេះហើយ សម្តេចបានស្នើសុំឲ្យព្រះសង្ឃជួយជាតិតាមការអប់រំ ពង្រឹងសុវត្ថិភាពភូមិឃុំមានសុវត្ថិភាព និងបណ្តុះខឿនការពារជាតិបន្ថែមលើ ការអប់រំសីលធម៌ និងគុណធម៌។
សម្តេចតេជោក៏បានមានប្រសាសន៍ទៀតថា «អរគុណព្រះសង្ឃ និងប្រជាពលរដ្ឋដែលបានចូលរួមគាំទ្រចលនានានានៅក្នុងពេលកន្លងទៅ ។ ពីព្រោះថា ពេលណាជាតិរលត់ ជាតិត្រូវបាត់បង់ ជាតិត្រូវគេបំពាន សាសនាក៏ត្រូវគេបំពានដែរ ដូច្នេះ ខ្ញុំសូមបន្តអំពាវនាវ ឲ្យបន្តជួយវិស័យអាណាចក្របន្តទៀត»។
លោក ចាយ បូរិន រដ្ឋមន្ត្រីក្រសួងធម្មការ និងសាសនាបានអះអាងថា ពុទ្ធសាសនានៅកម្ពុជាបានកំពុងតែបន្តរីកចម្រើន ។ លោកបានអះអាងថា មកដល់ឆ្នាំ២០២៥នេះ កម្ពុជាមានព្រះសង្ឃសរុបប្រមាណជា ៧៥.៥០០ អង្គ គង់នៅវត្តសរុបប្រមាណជា៥.១៤០ វត្តនៅទូទាំងប្រទេស និងមានអាចារ្យដែលឆ្លងការបណ្តុះបណ្តាលសរុបប្រមាណជា១៣.៨០០នាក់ ។
ចែករំលែកព័តមាននេះ