រាជធានីភ្នំពេញ ៖ មានករណីអគ្គិភ័យបានឆាបឆេះផ្ទះប្រជាពលរដ្ឋខ្មែរអ៊ិស្លាមចំនួន៥ខ្នងយ៉ាងសន្ធោសន្ធៅ បណ្តាលឱ្យបុរសម្នាក់រងរបួសស្រាល ដែលហេតុការណ៍នេះបង្កការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៦ ខែវិច្ឆិកា ឆ្នាំ២០២៥ នៅក្រោយផ្សារចាម តាមបណ្តោយផ្លូវលេខ ៣៦៩…
រាជធានីភ្នំពេញ ៖ មានករណីអគ្គិភ័យបានឆាបឆេះផ្ទះប្រជាពលរដ្ឋខ្មែរអ៊ិស្លាមចំនួន៥ខ្នងយ៉ាងសន្ធោសន្ធៅ បណ្តាលឱ្យបុរសម្នាក់រងរបួសស្រាល ដែលហេតុការណ៍នេះបង្កការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៦ ខែវិច្ឆិកា ឆ្នាំ២០២៥ នៅក្រោយផ្សារចាម តាមបណ្តោយផ្លូវលេខ ៣៦៩ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញផ្សែងហ៊ុយចេញពីផ្ទះពលរដ្ឋខ្មែរអ៊ិស្លាម១កន្លែង ដែលជាផ្ទះកាត់ដេរក្រណាត់ និងសម្លៀកបំពាក់ ។ បន្ទាប់មកគេបានឃើញអណ្តាតភ្លើងក្រហមឆាបឆេះចេញពីខាងក្នុងខ្លាំងឡើងៗ បង្កការភ្ញាក់ផ្អើលដល់ប្រជាពលរដ្ឋនៅក្នុងភូមិបាននាំគ្នាជួយយកបំពង់ពន្លត់អគ្គិភ័យ និងទឹកទៅពន្លត់ជាបឋម ប៉ុន្តែមិនរលត់នោះទេ ។
អ្នកឃើញហេតុការណ៍បានបន្តទៀតថា ដោយមិនអាចគ្រប់គ្រងស្ថានការណ៍បាន អ្នកភូមិបាននាំគ្នារាយការណ៍ទៅសមត្ថកិច្ច ដើម្បីសុំរថយន្តពន្លត់អគ្គិភ័យជួយអន្តរាគមន៍ ។
ក្រោយពេលទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យជាច្រើនគ្រឿង ចេញពីគ្រប់គោលដៅ ឆ្ពោះទៅកាន់ទីតាំងកើតហេតុ ដើម្បីធ្វើការអន្តរាគមន៍ និងគ្រប់គ្រងស្ថានការណ៍បានទាំងស្រុង និងមិនបង្កអោយមានមនុស្សរងរបួសធ្ងន់ធ្ងរនោះទេ ។
ជាក់ស្តែងករណីខាងលើនេះ បង្កអោយផ្ទះ៥ខ្នងរងការឆាបឆេះ និងខូចខាតទ្រពសម្បត្តិមួយចំនួនធំ ព្រមទាំងបង្កអោយបុរសម្នាក់រងរបួសស្រាល ដោយសាររលាកភ្លើង និងបានប្រើប្រាស់រថយន្តពន្លត់អគ្គិភ័យជាច្រើនគ្រឿង ។ គេសង្ស័យថាករណីអគ្គិភ័យនេះ បណ្តាលមកពីការឆ្លងចរន្តអគ្គិសនីចេញពីផ្ទះកាត់ដេរ ៕
ចែករំលែកព័តមាននេះ