រាជធានីភ្នំពេញ ៖ ពាក់ព័ន្ធទៅនឹងជម្លោះព្រំដែនកម្ពុជា-ថៃ ដែលអូសបន្លាយមកដល់ពេលនេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានអះអាងថា គ្មានការកាត់ដីរបស់កម្ពុជាឱ្យភាគីថៃ ដើម្បីបញ្ចប់សង្គ្រាមតាមព្រំដែនឡើយ…
រាជធានីភ្នំពេញ ៖ ពាក់ព័ន្ធទៅនឹងជម្លោះព្រំដែនកម្ពុជា-ថៃ ដែលអូសបន្លាយមកដល់ពេលនេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានអះអាងថា គ្មានការកាត់ដីរបស់កម្ពុជាឱ្យភាគីថៃ ដើម្បីបញ្ចប់សង្គ្រាមតាមព្រំដែនឡើយ ។
ការលើកឡើងរបស់សម្តេចតេជោ បន្ទាប់ពីក្រុមប្រឆាំងនៅក្រៅប្រទេសបានលើកឡើងថាថ្នាក់ដឹកនាំកម្ពុជាបានកាត់ទឹកដីឲ្យថៃដើម្បីបញ្ចប់សង្គ្រាម ។ យ៉ាងណាក្តី នៅក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ ឆ្នាំ២០២៥ នាព្រឹកថ្ងៃទី១៧ ខែវិច្ឆិកា ឆ្នាំ២០២៥ សម្ដេចតេជោ ហ៊ុន សែន បានថ្លែងអះអាងថា គ្មានការកាត់ដីរបស់កម្ពុជាឱ្យភាគីថៃ ដើម្បីបញ្ចប់សង្គ្រាមតាមព្រំដែនឡើយ ។
ពាក់ព័ន្ធបញ្ហាព្រំដែននេះដែរ សម្ដេចតេជោក៏បានព្រមានដើម្បីចាត់វិធានការច្បាប់ ចំពោះជនទាំងឡាយណា ធ្វើសកម្មភាពញុះញង់ធ្វើឱ្យប៉ះពាល់ដល់ទឹកចិត្តកងទ័ព និងសន្តិសុខជាតិផងដែរ ។ សម្ដេចតេជោ ហ៊ុន សែន គូសបញ្ជាក់ថា៖«មកដល់ម៉ោងនេះ យើងអត់ទាន់មានដកសញ្ជាតិអ្នកណាមួយទេ ក្នុងពេលដែលថៃបានដកសញ្ជាតិពីរនាក់រួចទៅហើយ គឺលី យុងផាត់ និង កុក អាន ចឹងតើនៅលើពិភពលោក មានប្រទេសច្រើនណាស់ ស្ទឹរតែ៨០% នៃប្រទេសមានច្បាប់ដកសញ្ជាតិ»។
សូមរំលឹកថា ការរៀបចំក្របខណ្ឌច្បាប់ សម្រាប់ការដកសញ្ជាតិខ្មែរនេះ មិនមែនជារឿងថ្មីនោះទេ។ ដោយផ្អែកតាមការសិក្សាស្រាវជ្រាវ កាលពីសម័យមុន កម្ពុជាធ្លាប់មានច្បាប់កំណត់អំពីការដកសញ្ជាតិខ្មែរដែរ ដូចជា ក្រមរដ្ឋប្បវេណីឆ្នាំ១៩២០ ដែលត្រូវបានធ្វើវិ សោធនកម្មជាបន្តបន្ទាប់ និងមានច្បាប់ស្តីពីបាត់បង់សញ្ជាតិខ្មែរ ដែលត្រូវបានប្រកាសឲ្យប្រើ តាមព្រះរាជក្រម លេខ ៣៧៧/ ៦៨-ប.រ. ចុះថ្ងៃទី១៦ ខែតុលា ឆ្នាំ១៩៦៨ ។
មិនតែប៉ុណ្ណោះ នៅតាមបណ្តាប្រទេសជាច្រើនដូចជា បារាំង, អាម៉េរិក, អង់គ្លេស, អាល្លឺម៉ង់, អូស្ត្រាលី, អ៊ីតាលី, ប៊ែលហ្សិក, ឥណ្ឌា, សាធារណរដ្ឋកូរ៉េ និងសិង្ហបុរី ជាដើម សុទ្ធតែមាន ច្បាប់កំណត់អំពីការដកសញ្ជាតិពលរដ្ឋខ្លួន ជាពិសេស ក្នុងករណីប្រព្រឹត្តអំពើប៉ះពាល់ធ្ងន់ធ្ងរដល់ផលប្រយោជន៍របស់ជាតិ ឬអំពើប៉ះពាល់ដល់វិស័យសន្តិសុខជាតិ៕
ចែករំលែកព័តមាននេះ