ខេត្តស្វាយរៀង ៖ រថយន្តយីឌុប១គ្រឿង ដឹកទំនិញសំពីងសំពោងសង្ស័យលើសទម្ងន់ បានក្រឡាប់ផ្ងារជើងម្ខាងដេកស្ដូកស្ដឹង ហើយក្អួតចេញសុទ្ធតែប្រេងឆានិងមីរាប់រយកេសមកលើចិញ្ចើមផ្លូវដូចចាក់ចោល ។ ហេតុការណ៍នេះ កើតឡើងកាលពីវេលាម៉ោងប្រមាណ៩ព្រឹកថ្ងៃទី១៣ វិច្ឆិកា…
ខេត្តស្វាយរៀង ៖ រថយន្តយីឌុប១គ្រឿង ដឹកទំនិញសំពីងសំពោងសង្ស័យលើសទម្ងន់ បានក្រឡាប់ផ្ងារជើងម្ខាងដេកស្ដូកស្ដឹង ហើយក្អួតចេញសុទ្ធតែប្រេងឆានិងមីរាប់រយកេសមកលើចិញ្ចើមផ្លូវដូចចាក់ចោល ។
ហេតុការណ៍នេះ កើតឡើងកាលពីវេលាម៉ោងប្រមាណ៩ព្រឹកថ្ងៃទី១៣ វិច្ឆិកា ២០២៥ នៅភូមិបុសមន ឃុំបុសមន ស្រុករំដួល ។
បើតាមអ្នករស់នៅជិតកន្លែងកើតហេតុនោះបានឲ្យដឹងថា រថយន្តខាងលើនេះធ្វើដំណើរចេញពីច្រកទ្វារទ្វេភាគីបុសមន ឆ្ពោះទៅផ្លូវជាតិលេខ១៣ ដើម្បីបន្តទៅរាជធានីភ្នំពេញ ។ លុះទៅដល់ចំណុចខាងលើ ស្រាប់តែផ្អៀងក្រឡាប់ផ្ងារជើងនៅលើចិញ្ចើមផ្លូវ ចាក់ទំនិញចោលតែម្តង តែមិនបង្កឲ្យមានគ្រោះថ្នាក់ដល់អ្នកដំណើរណាម្នាក់ទេ ។
មហាជនបានលើកឡើងទៀតថា មានរថយន្តតូចធំ ជាពិសេសរថយន្តយីឌុបប្រភេទវ៉េអង ដឹកទំនិញហួសទ្រុងសំពីងសំពោងលើសទម្ងន់ ធ្វើចរាចរណ៍ទាំងយប់ទាំងថ្ងៃ ដូចគេហែកឋិនដឹកទំនិញមកពីស្រុកយួន បង្កឲ្យបាក់ស្រុតផ្លូវកៅស៊ូទៅជាផ្លូវដី ក្លាយជារណ្តៅសម្បុកមាន់ជ្រៅ និងចង្អួរដក់ទឹក ហើយកន្លែងខ្លះបែកល្បាប់រអិលពិបាកធ្វើដំណើរជាខ្លាំង ។
មហាជនក៏បានសំណូមពរដល់អាជ្ញាធរមានសមត្ថកិច្ច មេត្តាពិនិត្យនិងបង្ក្រាបរថយន្តដឹកទំនិញល្មើសច្បាប់ទាំងនេះផង ដើម្បីសុវត្ថិភាពអ្នកធ្វើដំណើរតាមដងផ្លូវ ការពារពីគ្រោះថ្នាក់ជាយថាហេតុ និងទប់ស្កាត់ការដឹកទំនិញលើសទម្ងន់បំផ្លាញផ្លូវបន្តទៀត ៕
ចែករំលែកព័តមាននេះ