ខេត្តកំពង់ចាម ៖ ដោយអនុវត្តតាមការណែនាំពីសំណាក់ឯកឧត្តមអ៊ុន ចាន់ដា អភិបាលខេត្តនិងជាប្រធានគណៈបញ្ជាការឯកភាពខេត្ត ប្រធានមន្ទីរកសិកម្មខេត្ត បានចាត់ឱ្យកម្លាំងជំនាញជលផលចុះបន្តសកម្មភាពបង្ក្រាបទល្មើសនេសាទក្នុងរដូវបើកក្នុងភូមិសាស្ត្រស្រុកកងមាសនិងស្រុកស្ទឹងត្រង់នៅជាប់ដងទន្លេមេគង្គ។សកម្មភាពនេះបានធ្វើឡើងនៅថ្ងៃទី១២ ខែវិច្ឆិកា ឆ្នាំ២០២៥ ដោយបំផ្លាញបទល្មើសនេសាទខុសច្បាប់បានរហូតដល់ទៅ ៤ករណីជាមួយនោះក៏បានកាប់បំផ្លាញចោលនៅវត្ថុតាងខុសច្បាប់នៅនឹងកន្លែងទៀតផង។
លោកលី ស្រ៊ី នាយខណ្ឌរដ្ឋបាលជលផលខេត្តកំពង់ចាម បានឱ្យដឹងថា ទោះបីជាកម្លាំងជំនាញជលផលខេត្តបានចុះផ្សព្វផ្សាយពីការប្រើប្រាស់ឧបករណ៍នេសាទខុសច្បាប់ដើម្បីបញ្ជ្រាបទៅដល់បងប្អូនប្រជាពលរដ្ឋហើយបានយល់ដឹងក្នុងនោះមានភាគច្រើនបានយល់ដឹង ហើយអ្នកខ្លះទៀតនៅតែបន្តបំពានច្បាប់បទល្មើសនេសាទដែលខុសច្បាប់ គឺធ្វើសកម្មភាពលួចដាក់ស្បៃមុងមិនឲ្យកម្លាំងជំនាញដឹងឡើយ។
នាយខណ្ឌរដ្ឋបាលជលផលខេត្តបន្តឲ្យដឹងទៀតថា ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះបង្ក្រាបបទល្មេីសជលផល រុះរើនិងបំផ្លាញចោលឧបករណ៍ខុសច្បាប់បានចំនួន០៤ករណីរួមមាន៖
+ករណីទី០១
-ឧបករណ៍លូស្បៃមុងចំនួន ០៧មាត់
-របាំងស្បៃមុងប្រវែង ៣៥០ម៉ែត្រ
-បង្គោលចម្រឹងចំនួន ១២៥ដើម
-ចាក់លែងត្រីចម្រុះទម្ងន់ ០៩គីឡូក្រាម
នៅចំណុចទំនប់បឹងកក់ ឃុំស្តៅ ស្រុកកងមាស ខេត្តកំពង់ចាម។
+ករណីទី០២
-ឧបករណ៍លូស្បៃមុងចំនួន ០៨មាត់
-របាំងស្បៃមុងប្រវែង ៤១៥ម៉ែត្រ
-បង្គោលចម្រឹងចំនួន ១៤៥ដើម
-ចាក់លែងត្រីចម្រុះទម្ងន់ ១២គីឡូក្រាម
នៅចំណុចបឹងទៀមលាង ឃុំកងតាណឹង ស្រុកកងមាស ខេត្តកំពង់ចាម។
+ករណីទី០៣
-ឧបករណ៍លូស្បៃមុងចំនួន ០៩មាត់
-របាំងស្បៃមុងប្រវែង ២៧០ម៉ែត្រ
-បង្គោលចម្រឹងចំនួន ១៣៥ដើម
-ចាក់លែងត្រីចម្រុះទម្ងន់ ០៥គីឡូក្រាម
នៅចំណុចមុខវត្តល្វា ឃុំអារក្សត្នោត ស្រុកស្ទឹងត្រង់ ខេត្តកំពង់ចាម។
+ករណីទី០៤
-ឧបករណ៍លូស្បៃមុងចំនួន ១១មាត់
-របាំងស្បៃមុងប្រវែង ៣៣០ម៉ែត្រ
-បង្គោលចម្រឹងចំនួន ១៦៥ដើម
ចាក់លែងត្រីចម្រុះទម្ងន់ ០៧គីឡូក្រាមនៅចំណុចជ្រោយចង្កែង ឃុំអារក្សត្នោត ស្រុកស្ទឹងត្រង់។
សម្រាប់ទិសដៅបន្តកម្លាំងជំនាញជលផលខេត្តនៅតែបន្តសហការជាមួយអាជ្ញាធរតាមបណ្ដាស្រុកផ្សេងទៀតនៅជាប់ដងទន្លេមេគង្គ ជាមួយនោះសូមឱ្យសហគមន៍នេសាទដែលបានដឹងបទល្មើសនៅទីកន្លែងណាមួយសូមប្រញាប់រាយការណ៍មកជំនាញដើម្បីបើកប្រតិបត្តិការចុះបង្ក្រាបជាបន្ទាន់ ៕
ចែករំលែកព័តមាននេះ