រាជធានីភ្នំពេញ ៖ អគ្គមេបញ្ជាការ អនុញ្ញាតឱ្យបេសកកម្មអមបញ្ជាការដ្ឋានប្រចាំតំបន់អាស៊ីប៉ាស៊ីហ្វិក និងកងកម្លាំងនៅតំបន់ប៉ូលីនេស៊ីបារាំង ចូលជួបសម្ដែងការគួរសម ។ នេះបើយោងតាមផេកអគ្គបញ្ជាការដ្ឋាននៃកងយោធពលខេមរភូមិន្ទ បានប្រកាសនាថ្ងៃរសៀលថ្ងៃទី១១ ខែវិច្ឆិកា…
រាជធានីភ្នំពេញ ៖ អគ្គមេបញ្ជាការ អនុញ្ញាតឱ្យបេសកកម្មអមបញ្ជាការដ្ឋានប្រចាំតំបន់អាស៊ីប៉ាស៊ីហ្វិក និងកងកម្លាំងនៅតំបន់ប៉ូលីនេស៊ីបារាំង ចូលជួបសម្ដែងការគួរសម ។ នេះបើយោងតាមផេកអគ្គបញ្ជាការដ្ឋាននៃកងយោធពលខេមរភូមិន្ទ បានប្រកាសនាថ្ងៃរសៀលថ្ងៃទី១១ ខែវិច្ឆិកា ឆ្នាំ២០២៥ ។
នៅព្រឹកថ្ងៃទី១១ ខែតុលា ឆ្នាំ២០២៥ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យលោកឧត្តមនាវីទោ ហ្សាក់ រីខែយែរ (Jacques RIVIERE )ទទួលបន្ទុករបេសកកម្មអមបញ្ជាការដ្ឋានប្រចាំតំបន់អាស៊ីប៉ាស៊ីហ្វិក និងកងកម្លាំងប្រដាប់អាវុធ នៅតំបន់ប៉ូលីនេស៊ីបារាំង ចូលជួបពិភាក្សាការងារ នៅអគ្គបញ្ជាការដ្ឋាន ។
ក្នុងជំនួបនោះ ឯកឧត្តម នាយឧត្តមសេនីយ៍ វង្ស ពិសេន បានរំឭកពីតួនាទីរបស់បារាំង ក្នុងនាមជាស្ថាបនិក និងជាសហប្រធាននៃសន្និសីទទីក្រុងប៉ារីស ស្តីពីកម្ពុជា ដែលសម្រេចបានកិច្ចព្រមព្រៀងទីក្រុងប៉ារីស ក្នុងឆ្នាំ១៩៩១ និងការរួមចំណែកជាបន្តបន្ទាប់របស់បារាំងដល់ការអភិវឌ្ឍកម្ពុជាលើច្រើនវិស័យ ។
ឯកឧត្តម ក៏បានធ្វើការវាយតម្លៃខ្ពស់ចំពោះទំនាក់ទំនងទ្វេភាគីរវាងកម្ពុជា-បារាំង និងបានថ្លែងអំណរគុណដល់រដ្ឋាភិបាលបារាំង ដែលបានគាំទ្រយ៉ាងពេញទំហឹងដល់កម្ពុជា ក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ ក្នុងឆ្នាំ២០២៦ខាងមុខនេះ ។ លើវិស័យយោធា ឯកឧត្តម អគ្គមេបញ្ជាការ បានថ្លែងអំណរគុណចំពោះកងទ័ពបារាំង ដែលបានផ្តល់អាហារូបករណ៍ដល់សិក្ខាកាមកម្ពុជា លើវគ្គសិក្សាជាច្រើនវគ្គ ជាពិសេសការជួយបណ្តុះបណ្តាលកងយោធពលខេមរភូមិន្ទសម្រាប់បេសកកម្មថែរក្សាសន្តិភាព ក្រោមឆត្រអង្គការសហប្រជាជាតិ ។
ឯកឧត្តមជឿជាក់ថា កងទ័ពប្រទេសទាំងពីរ នឹងបន្តពង្រឹងពង្រីកទំនាក់ទំនង និងកិច្ចសហប្រតិបត្តិការឱ្យកាន់តែទូលំទូលាយតាមរយៈការបណ្តុះបណ្តាលធនធានមនុស្ស ការផ្លាស់ប្តូរទស្សនកិច្ច ការផ្លាស់ប្តូរព័ត៌មាន ទប់ស្កាត់អំពើភេរវកម្មឧក្រិដ្ឋកម្មឆ្លងដែននានា និងបន្តកិច្ចសហប្រតិបត្តិការមនុស្សធម៌ និងសង្គ្រោះគ្រោះមហន្តរាយ ។
ជាកិច្ចឆ្លើយតប លោកឧត្តមសេនីយ៍ទោ ហ្សាក់ រីខែយែរ បានថ្លែងអំណរគុណចំពោះឯកឧត្តមអគ្គមេបញ្ជាការនៃកងយោធពលខេមរភូមិន្ទ ដែលបានធ្វើការកត់សម្គាល់ពីកិច្ចសហប្រតិបត្តិការរវាងកងទ័ពប្រទេសទាំងពីរ ហើយតាមរយៈការលើកឡើងនេះបារាំង និងកម្ពុជានឹងបន្តកិច្ចសហប្រតិបត្តិការឲ្យកាន់តែល្អប្រសើរថែមទៀត ៕
ចែករំលែកព័តមាននេះ