រាជធានីភ្នំពេញ ៖ ជនសង្ស័យពីរនាក់ ត្រូវបានកម្លាំងនគរបាលខណ្ឌដង្កោ ស្រាវជ្រាវឃាត់ខ្លួនបន្ទាប់ពីធ្វើសកម្មភាពលួចម៉ូតូមិនបានសម្រេច កាលពីថ្ងៃទី០៨ ខែវិច្ឆិកា ឆ្នាំ២០២៥ វេលាម៉ោង១១និង២០នាទី ត្រង់ចំណុចកន្លែងលក់ផ្កា…
រាជធានីភ្នំពេញ ៖ ជនសង្ស័យពីរនាក់ ត្រូវបានកម្លាំងនគរបាលខណ្ឌដង្កោ ស្រាវជ្រាវឃាត់ខ្លួនបន្ទាប់ពីធ្វើសកម្មភាពលួចម៉ូតូមិនបានសម្រេច កាលពីថ្ងៃទី០៨ ខែវិច្ឆិកា ឆ្នាំ២០២៥ វេលាម៉ោង១១និង២០នាទី ត្រង់ចំណុចកន្លែងលក់ផ្កា ស្ថិតនៅផ្លូវ៥០ម៉ែត្រ ក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យដែលត្រូវឃាត់ខ្លួន ៖
១.ឈ្មោះ គៀង ចៅសំ ហៅជ័យ ភេទប្រុស អាយុ៣២ឆ្នាំ ស្នាក់នៅបន្ទប់ជួល ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។
២.ឈ្មោះ ម៉ែន វិចិត្រ ភេទប្រុស អាយុ៣៤ឆ្នាំ មានទីលំនៅសង្កាត់ផ្សារដើមគ ខណ្ឌទួលគោក រាជធានីភ្នំពេញ ។
ចំណែកជនរងគ្រោះឈ្មោះ ហួន ចន្ធី ភេទប្រុស អាយុ៤១ឆ្នាំ ជនជាតិខ្មែរ មុខរបរលក់ដូរ មានទីលំនៅផ្ទះលេខA០៨ ផ្លូវ៥០ម៉ែត្រ ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមនគរបាលខណ្ឌដង្កោ បានឲ្យដឹងថា ជនសង្ស័យត្រូវបានកម្លាំងនគរបាលព្រហ្មទណ្ឌឃាត់ខ្លួននៅវេលាម៉ោង១រសៀល ថ្ងៃទី០៨ ខែវិច្ឆិកា ឆ្នាំ២០២៥ ត្រង់ចំណុចការ៉ាស់សាំងតេលា ផ្លូវបេតុង ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
បន្ទាប់ពីឃាត់ខ្លួន សមត្ថកិច្ចដកហូត វត្ថុតាងចាប់យក ៖ ១.ម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០១៣ ពាក់ផ្លាកលេខភ្នំពេញ 1BU-0529 ។ ២.ម៉ូតូម៉ាក ToDay ពណ៌ស ពាក់ផ្លាកលេខភ្នំពេញ 1GG-0993 ចំនួន០១គ្រឿង ។ ៣.ទូរសព្ទដៃម៉ាកOPPO ពណ៌ខ្មៅ ចំនួន០១គ្រឿង ។
នគរបាលខណ្ឌដង្កោ បានឲ្យដឹងថា កាលពីថ្ងៃទី០៨ ខែវិច្ឆិកា ឆ្នាំ២០២៥ វេលាម៉ោង១១និង០០នាទី ជនរងគ្រោះឈ្មោះ ហួន ចន្ធី បានជិះម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០១៣ ពាក់ផ្លាកលេខភ្នំពេញ 1BU-0529 ដើម្បីទៅទិញដើមផ្កា និងដី នៅកន្លែងលក់ផ្កា ដែលស្ថិតនៅភូមិប្រការខាងលើ។ ខណៈនោះ ជនរងគ្រោះទុកម៉ូតូម៉ាកខាងលើ នៅមុខកន្លែងលក់ផ្កា ពុំបានដកកូនសោម៉ូតូចេញពីម៉ូតូទេ រួចបានដើរទៅយកលុយអាប់ពីអ្នកលក់ផ្កា មានចម្ងាយពីម៉ូតូប្រហែល០៧ម៉ែត្រ ស្រាប់តែឃើញជនសង្ស័យឈ្មោះ គៀង ចៅសំ ហៅ ជ័យ បានធ្វើសកម្មភាពលួចម៉ូតូ។ ឃើញដូចនេះ ជនរងគ្រោះ ក៏បានស្រែកថា ចោរៗ ហើយរត់ដេញតាមពីក្រោយ រហូតដល់មុខផ្ទះរបស់ខ្លួន បានយករថយន្ត ដែលចតនៅមុខផ្ទះស្រាប់ បើកដេញតាម រហូតដល់ផ្លូវច្រមុះជ្រូកវត្តហា ស្ថិតនៅភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ ជនសង្ស័យក៏បានផ្ដួលម៉ូតូជនរងគ្រោះចោលរត់គេចខ្លួន ហើយជនរងគ្រោះ ក៏ចុះពីរថយន្ដរត់ដេញតាមពីក្រោយ ស្រែកចោរៗ ហើយកម្លាំងសមត្ថកិច្ច ដែលជិះម៉ូតូល្បាត បានជួយអន្ដរាគមន៍ឃាត់ខ្លួនជនសង្ស័យព្រមទាំងរហូតម៉ូតូរបស់ជនរងគ្រោះ ត្រឡប់មកវិញ។
ក្រោយឃាត់ខ្លួនជនសង្ស័យបានម្នាក់ និងតាមរយៈការឆ្លើយសារភាព សមត្ថកិច្ចស្រាវជ្រាវឈានទៅឃាត់ខ្លួនបានបក្ខពួកម្នាក់ទៀត ៕
ចែករំលែកព័តមាននេះ