ទីក្រុងឡុង៖ លោកធីមដេវី (Tim Davie) ក្នុងនាមជាអគ្គនាយក និងជាប្រធានផ្នែកព័ត៌មានរបស់ប្រព័ន្ធផ្សព្វផ្សាយអង់គ្លេស ប៊ីប៊ីស៊ី (BBC) បានប្រកាសលាលែងពីតំណែងដ៏គួរឱ្យភ្ញាក់ផ្អើលបន្ទាប់ពីស្ថាប័នរបស់លោកទទួលរងការរិះគន់ពាក់ព័ន្ធនឹងការកាត់តសុន្ទរកថារបស់លោកត្រាំ។ នាយកប្រតិបត្តិរបស់ប៊ីប៊ីស៊ីក៏ប្រកាសលាលែងដូចគ្នា។…
ទីក្រុងឡុង៖ លោកធីមដេវី (Tim Davie) ក្នុងនាមជាអគ្គនាយក និងជាប្រធានផ្នែកព័ត៌មានរបស់ប្រព័ន្ធផ្សព្វផ្សាយអង់គ្លេស ប៊ីប៊ីស៊ី (BBC) បានប្រកាសលាលែងពីតំណែងដ៏គួរឱ្យភ្ញាក់ផ្អើលបន្ទាប់ពីស្ថាប័នរបស់លោកទទួលរងការរិះគន់ពាក់ព័ន្ធនឹងការកាត់តសុន្ទរកថារបស់លោកត្រាំ។ នាយកប្រតិបត្តិរបស់ប៊ីប៊ីស៊ីក៏ប្រកាសលាលែងដូចគ្នា។ ប៊ីប៊ីស៊ីរងការចោទប្រកាន់ថាផ្សាយព័ត៌មានលំអៀង កាត់យកពាក្យសម្ដីរបស់លោកត្រាំត្រង់ចំណុចណាដែលខ្លួនចង់បានដើម្បីបង្ហាញថាលោកនិយាយពន្យុះអ្នកគាំទ្រឱ្យងើបបះបោរនៅវិមានរដ្ឋសភា។
លោកត្រាំស្វាគមន៍ការចាកចេញរបស់អ្នកទាំង២។ លោកចាត់ទុកថាពួកគេជាមនុស្សគ្មានភាពស្មោះត្រង់បន្ទាប់ពីកម្មវិធីផ្សាយរបស់ស្ថាប័ននេះឈ្មោះ Panorama ដកស្រង់ពាក្យសម្ដីរបស់លោកត្រាំ២ផ្សេងគ្នាមកដាក់បញ្ចូលគ្នា។ នៅពេលទស្សនិកជនស្ដាប់មើលទៅហាក់ដូចជាលោកត្រាំនិយាយពន្យុះឱ្យអ្នកគាំទ្រងើបបះបោរសម្រុកចូលវិមានរដ្ឋសភាកាលពីខែមករា ឆ្នាំ២០២១។ ព្រឹត្តិការណ៍នៅក្នុងគ្រានោះនាំទៅដល់ការប្រវាយប្រតប់គ្នា និងស្លាប់មនុស្សមួយចំនួន។
នាយកផ្សព្វផ្សាយរបស់ប៊ីប៊ីស៊ី និងក៏ជានិពន្ធនាយករបស់ស្ថាប័ននេះផងដែរ លោកធីមដេវី (Tim Davie) បានដឹកនាំស្ថាប័ននេះតាំងពីឆ្នាំ២០២០។ លោកបាននិយាយការពារស្ថាប័ន និងចាត់ទុកថាគុណភាពព័ត៌មានរបស់ប៊ីប៊ីស៊ីត្រូវគេចាត់ទុកថាមានកម្រតិខ្ពស់នៅលើពិភពលោក។ ប៉ុន្តែលោកទទួលស្គាល់ថាពិតជាមានកំហុសដែលលោកត្រូវតែរ៉ាប់រងទទួលខុសត្រូវ។ អ្នកស្រីដេបូរ៉ា ថឺនីស (Debroah Turness) ជានាយកប្រតិបត្តិរបស់ប៊ីប៊ីស៊ីក៏ប្រកាសលាលែងពីតំណែងផងដែរ។ លោកស្រីស្រីផ្ញើអ៊ីមែលប្រាប់បុគ្គលិករបស់ប៊ីប៊ីស៊ីថាការចោទប្រកាន់ថ្មីៗនេះថាប៊ីប៊ីស៊ីផ្សាយព័ត៌មានលំអៀងនោះជាការចោទប្រកាន់ខុស។
លោកដេវីនិយាយការពារប៊ីប៊ីស៊ី
រដ្ឋមន្ត្រីក្រសួងវប្បធម៌អង់គ្លេស លោកស្រីលីហ្សា ណាន់ឌី (Lisa Nandy) អរគុណលោកដេវីដែលបានបំពេញការងារនៅប៊ីប៊ីស៊ីក្នុងនាមជានាយកស្ថាប័ននេះ។ លោកស្រីថ្លែងថាលោកដេវីបានដឹកនាំស្ថាប័ននេះឆ្លងកាត់ដំណាក់កាលផ្លាស់ប្ដូរជាបន្តបន្ទាប់។ ប្រភពដែលដឹករឿងផ្ទៃក្នុងបានបង្ហើបឱ្យដឹងថាការដែលលោកដេវីប្រកាសលាលែងពីតំណែងធ្វើឱ្យគណៈគ្រប់គ្រងរបស់ប៊ីប៊ីស៊ីស្រឡាំងកាំង។ លោកនឹងបន្តកាន់តំណែងនេះរយៈពេលពីរបីខែទៀតទម្រាំគេរើសបានអ្នកថ្មីមកជំនួសរូបលោក។
លោកដេវីបាននិយាយការពារស្ថាប័ននេះ និងថាគួរលើកស្ទួយ មិនមែននិយាយបង្អាប់ទេ ព្រោះប៊ីប៊ីស៊ីបានដើរតួនាទីជួយកសាងសង្គមឱ្យមានសុខុមាលភាព និងជួយបង្កើតគំនិតច្នៃប្រឌិត។ ទន្ទឹមនឹងនោះ លោកក៏ទទួលស្គាល់ផងដែរថាប៊ីប៊ីស៊ីមិនមែនល្អឥតខ្ចោះនោះទេ។ មិនមែនមានតែរឿងមួយនេះទេដែលលោកត្រូវតែលាលែងពីតំណែង មានរឿងច្រើនទៀត ប៉ុន្តែនេះជាកត្តាជំរុញ។ លោកត្រូវតែមានស្មារតីទទួលខុសត្រូវខ្ពស់បំផុត៕
ចែករំលែកព័តមាននេះ