រាជធានីភ្នំពេញ ៖ បុរសចិនម្នាក់ត្រូវបានកម្លាំងនគរបាលខណ្ឌពោធិ៍សែនជ័យ សហការជាមួយនគរបាលការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ ស្រាវជ្រាវឃាត់ខ្លួនបន្ទាប់ពីធ្វើសកម្មភាពគាស់ផ្ទះលោកវេជ្ជបណ្ឌិតមួយរូប គាស់បំបែកទូដែកយកប្រាក់ និងគ្រឿងអលង្ការ សរុបគិតជាទឹកប្រាក់ចំនួន ១១២៤៥០ដុល្លារ ហើយគេចខ្លួនបានតែ២ថ្ងៃ…
រាជធានីភ្នំពេញ ៖ បុរសចិនម្នាក់ត្រូវបានកម្លាំងនគរបាលខណ្ឌពោធិ៍សែនជ័យ សហការជាមួយនគរបាលការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ ស្រាវជ្រាវឃាត់ខ្លួនបន្ទាប់ពីធ្វើសកម្មភាពគាស់ផ្ទះលោកវេជ្ជបណ្ឌិតមួយរូប គាស់បំបែកទូដែកយកប្រាក់ និងគ្រឿងអលង្ការ សរុបគិតជាទឹកប្រាក់ចំនួន ១១២៤៥០ដុល្លារ ហើយគេចខ្លួនបានតែ២ថ្ងៃ ។
ជនសង្ស័យឈ្មោះ ចាង ទៀន វៃ(Zhang Dian Wei) ភេទប្រុស អាយុ៣៧ឆ្នាំ ជនជាតិចិន កាន់លិខិតឆ្លងដែនលេខ EP2843056 មុខរបរលក់បាយ ស្នាក់នៅផ្ទះ៣៣ ផ្លូវ១១៣K ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។ ចំណែកជនរងគ្រោះឈ្មោះ ឥន សម្ភាវិត ភេទប្រុស អាយុ៥៦ឆ្នាំ ជាវេជ្ជបណ្ឌិត មានទីលំនៅបច្ចុប្បន្នផ្ទះលេខ៣៥ បុរីជីបម៉ុងលែន ពោធិ៍ចិនតុង ផ្លូវ១១៣K ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
លោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យបានឱ្យដឹងថា កាលពីថ្ងៃទី០៤ ខែវិច្ឆិកា ឆ្នាំ២០២៥ ក្រុមគ្រួសារជនរងគ្រោះបានធ្វើដំណើរទៅកម្សាន្តនៅខេត្តមណ្ឌលគីរី និងសម្រាកនៅមណ្ឌលគីរី១យប់ ។ លុះនៅវេលាម៉ោងប្រហែល៤និង៣០នាទីព្រឹក ថ្ងៃទី០៥ខែវិច្ឆិកា ឆ្នាំ២០២៥ ទើបក្រុមគ្រួសារជនរងគ្រោះត្រឡប់មកដល់ផ្ទះវិញ ស្រាប់តែឃើញផ្ទះរបស់ខ្លួនបើកទ្វារចំហ ត្រូវចោររើរុះ និងឃើញទូដែកដែលដាក់គ្រឿងអលង្ការផ្សេងៗ ត្រូវបានគាស់បំបែកយកលុយ និងសម្ភារៈក្នុងទូដែកទាំងអស់ ។
លោកវរសេនីយ៍ឯក ម៉ន វុធី អធិការបានឱ្យដឹងទៀតថា នៅក្នុងសកម្មភាពជនសង្ស័យបានគាស់យកលុយ និងគ្រឿងអលង្ការរួមមាន ប្រាក់ដុល្លារប្រហែល ៤៥០០០ដុល្លារ ចិញ្ចៀនពេជ្រ៣វង់គិតជាប្រាក់ចំនួន១១៥០០ដុល្លារ ខ្សែដៃពេជ្រ២ខ្សែ ១១ ០០០ដុល្លារ ខ្សែដៃមាស២ខ្សែ(ទម្ងន់១តម្លឹង) គិតជាប្រាក់ចំនួន ៥ ៥០០ដុល្លារ ខ្សែកមាស៤ខ្សែ (ទម្ងន់១តម្លឹងកន្លះ)គិតជាប្រាក់ចំនួន ៨ ២៥០ដុល្លារ ខ្សែកផ្លាទីន២ខ្សែ(ទម្ងន់៤តម្លឹង) គិតជាប្រាក់ចំនួន ១៦ ០០០ដុល្លារ ចិញ្ចៀនមាស១វង់
(ទម្ងន់៥ជី) គិតជាប្រាក់ចំនួន ២ ៣០០ដុល្លារ ចិញ្ចៀនផ្លាទីន៣វង់(ទម្ងន់៨ជី) គិតជាប្រាក់ចំនួន ២ ៥០០ដុល្លារ ចិញ្ចៀនត្បូងទន្ទឹម១វង់ គិតជាប្រាក់ចំនួន ៦០០ដុល្លារ កងដៃមាស១វង់ គិតជាប្រាក់ចំនួន ២ ៣០០ដុល្លារ ក្រវិលពេជ្រ១គូ គិតជាប្រាក់ចំនួន ៥ ៥០០ដុល្លារ និងកងដៃផ្លាទីន២វង់ គិតជាប្រាក់ចំនួន ២ ០០០ដុល្លារ សរុបជាទឹកប្រាក់ចំនួន ១១២ ៤៥០ដុល្លារ (មួយសែនមួយម៉ឺនពីរពាន់បួនរយហាសិបដុល្លារ) ។
លោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យបានឱ្យដឹងទៀតថា បន្ទាប់ពីកើតហេតុ ជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាបទី២ ។ ដោយអនុវត្តតាមបទបញ្ជាផ្ទាល់ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី០៧ ខែវិច្ឆិកា ឆ្នាំ២០២៥ វេលាម៉ោងប្រហែល ០៩និង៣០នាទី នគរបាលខណ្ឌពោធិ៍សែនជ័យ ដឹកនាំដោយលោកវរសេនីយ៍ឯក ម៉ន វុធី អធិការ បានសហការជាមួយនគរបាលការិយាល័យព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ រួមជាមួយលោកនាយប៉ុស្តិ៍ បានធ្វើការស្រាវជ្រាវឈានទៅឃាត់ខ្លួនជនសង្ស័យជាជនជាតិចិនខាងលើ ដែលស្នាក់នៅជាប់ផ្ទះគ្នា ។
នៅចំពោះមុខ ជនសង្ស័យបានសារភាពថា ខ្លួនពិតជាបានធ្វើសកម្មភាពវាយបំបែកកញ្ចក់ទ្វារខាងក្រោយផ្ទះរបស់ជនរងគ្រោះ ហើយចូលលួចសម្ភារៈ និងគ្រឿងអលង្ការពិតប្រាកដមែន ។ ក្នុងនោះ សមត្ថកិច្ចបាននាំខ្លួនជនសង្ស័យទៅចង្អុលបង្ហាញពីទីតាំងដែលយកសម្ភារៈដែល លួចបានទៅលាក់ទុកនៅក្នុងផ្ទះ រួមនឹងវត្ថុតាងមួយចំនួនផ្សេងទៀត ដែលជនសង្ស័យខាងលើប្រើប្រាស់ធ្វើសកម្មភាព និងបានយកទៅចោលនៅចំណុចដីឡូត៍មួយកន្លែង ស្ថិតក្នុងភូមិ ត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
បច្ចុប្បន្ន ជនសង្ស័យ រួមទាំងវត្ថុតាង ត្រូវបានកម្លាំងជំនាញនគរបាលយុត្តិធម៌ នៃអធិការដ្ឋាន
នគរបាលខណ្ឌពោធិ៍សែនជ័យ កសាងសំណុំរឿងបញ្ជូនទៅតុលាការអនុវត្តន៍តាមនីតិវិធីហើយ ៕
ចែករំលែកព័តមាននេះ