រាជធានីភ្នំពេញ ៖ បុរសជាអ្នករត់កង់បីម្នាក់ត្រូវបានជនសង្ស័យជាភ្ញៀវធ្វើសកម្មភាពយកកាំបិតចាក់ បណ្តាលឲ្យរងរបួសធ្ងន់ ដោយសារតែរឿងបាញ់លុយលើសហើយសុំដកលុយក្រៅ តែជនរងគ្រោះអត់មានលុយក្រៅ ក៏កើតជាជម្លោះពាក្យសំដីរហូតជនសង្ស័យយកកាំបិតចាក់ជនរងគ្រោះតែម្តង ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៣ឈានចូលព្រឹកថ្ងៃទី១ ខែវិច្ឆិកា ឆ្នាំ២០២៥ នៅចំណុចខ្លាងទ្វារវត្តកំសាន្ត សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
ជនរងគ្រោះឈ្មោះ ហាស់ សុមាន ភេទប្រុស អាយុ៣៨ឆ្នាំ មុខរបររត់កង់បីឥណ្ឌា ស្រុកកំណើតនៅភូមិបន្ទាយចក្រី ស្រុកព្រះស្ដេច ខេត្ត ព្រៃវែង ។
ចំណែកជនសងស្ស័យឈ្មោះ ជីវ អេងស៊ីវឡេង ភេទប្រុស មុខរបរមិនពិត ស្នាក់នៅភូមិជ្រោយបាសាក់ សង្កាត់ ព្រែកប្រា ខណ្ឌច្បារអំពៅ រាជធានីភ្នំពេញ ត្រូវបានឃាត់ខ្លួនពីបទហិង្សា បណ្ដាលឱ្យជនរងគ្រោះម្នាក់រងរបួសធ្ងន់ ។ ជនសង្ស័យជាមុខសញ្ញាធ្លាប់ជាប់ពន្ធនាគារព្រៃស ដោយត្រូវបានឃាត់ខ្លួនពីបទឆក់កាបូបកាលអំឡុងឆ្នាំ២០២៣ទើបនិងចេញពីពន្ធនាគារនៅឆ្នាំ២០២៥នេះទេ ។
តាមប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះជារត់កង់បីឥណ្ឌាបានដឹកជនសង្ស័យ២នាក់គូរសង្សារពីម្ដុំស្តុបក្រសួងមហាផ្ទៃ ក្នុងគោលបំណងទៅផ្ទះជួល នៅម្តុំវត្តកំសាន្ត លុះទៅដល់ចំណុចកើតហេតុខាងលើ នារីជាសង្សាររបស់ជនសង្ស័យបានបាញ់លុយទៅឱ្យជនរងគ្រោះលើស ហើយសុំអោយអាប់លុយរាយក្រៅ តែអ្នករត់កង់បីថាគាត់អត់មានលុយក្រៅ ក៏កើតជាជម្លោះពាក្យសំដី រហូតជនសង្ស័យយកកូនកាំបិតតូចចេញពីហោប៉ាវខោចាក់ទៅលើជនរងគ្រោះចំពីមុខផង ចំពីក្រោយផង បណ្ដាលឲ្យហូរឈាមពេញខ្លួន ។
តាមប្រភពព័ត៌មានបានបន្តថា ពេលនោះជនរងគ្រោះរត់ទៅក្នុងភូមិអោយគេជួយ ហើយក៍មានបងប្អូនប្រជាពលរដ្ឋនៅក្បែរនោះ ក៍ដូចជាអ្នករត់កង់បីផ្សេងទៀត បានស្រែកគំហកទៅជនសង្ស័យ ស្រាប់តែជនសង្ស័យបានរត់ទៅវាយម៉ូតូកង់បីទៀត បណ្តាលឲ្យបែកកញ្ចក់ ហើយក៍រត់គេចចូលទៅក្នុងវត្តបាត់តែម្តង ។
ក្រោយកើតហេតុ ជនរងគ្រោះត្រូវបានគេបញ្ជូនទៅព្យាបាលនៅបង្អែកច្បារអំពៅ ចំណែកជនសង្ស័យរហូតម៉ោង៥ព្រឹកថ្ងៃដដែល ត្រូវបានកម្លាំងកងរាជអាវុធហត្ថខណ្ឌច្បារអំពៅចុះទៅបង្ក្រាបបាន រួចនាំយកមកសាកសួរ និងកសាងសំណុំរឿងចាត់ការតាមផ្លូវច្បាប់ ៕
ចែករំលែកព័តមាននេះ