រាជធានី​ភ្នំពេញ ​៖ កម្ពុជា​មាន​គោលនយោបាយ​ ដោយ​កំណត់​គោលដៅ​ឆ្នាំ២០៣០ ខាង​មុខ ធ្វើ​យ៉ាង​ចុះបញ្ជី​យានយន្ត​អគ្គិសនី​ឲ្យ​បាន​៣​ម៉ឺន​គ្រឿង បន្ទាប់​ពី​ទីផ្សារ​រថយន្តអគ្គិសនី​បច្ចុប្បន្ន​បាន​កំពុង​មានការ​រីក​ចម្រើន​ខ្លាំង ​។

ការ​កំណត់​គោលដៅ​នេះ​ ខណៈ​ដែល​រាជរដ្ឋាភិបាល​ បាន​ប្រកាស​ដាក់​ដំណើរការ​ជា​ផ្លូវការ​គម្រោង​វិទ្យាស្ថាន​បច្ចេកវិទ្យា​យានយន្ត និង​ឧស្សាហ៍កម្ម ថាមពល​ថ្មី ​នៅ​នា​ព្រឹកថ្ងៃ​ទី​២៧ ខែតុលា ឆ្នាំ​២០២៥​ ​។

ឯកឧត្តម ហែម វណ្ណ​ឌី ​រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ និង​នវានុវត្តន៍ បាន​ឲ្យ​ដឹង​ថា ​ចំពោះ​វិស័យ​យានយន្ត​អគ្គិសនី រាជរដ្ឋាភិបាល​កម្ពុជា ​បាន​ដាក់​ចេញ​នូវ​គោលនយោបាយ​ជាតិ​អភិវឌ្ឍ​វិស័យ​រថយន្ត​អគ្គិសនីឆ្នាំ​២០២៤-២០៣០ ពិតជា​បាន​តម្រ​ង់​ទិស​ការ​អភិវឌ្ឍ​ឱ្យ​ចំ​គោលដៅ និង​ធានា​ភាព​ធន់​ក្នុង​វិស័យ​ឧស្សាហកម្ម​កម្មន្តសាល​នៅ​កម្ពុជា ដែល​បាន​គិតគូរ​ដល់​ការ​ពង្រឹង​ខ្សែ​សង្វា​ក់​ផ្គត់ផ្គង់ ​នៃ​ធាតុ​ផ្សំ​រួម​មាន ​៖ តួ​រថយន្ត សំបក​កង់ អា​គុយ ម៉ាស៊ីន គ្រឿង​/​បង្គុំ អេ​ឡិច​ត្រូ​និ​ច និង​គ្រឿងបន្លាស់​ផ្សេង​ៗ​ទៀត ដល់​ការ​ផ្តល់​ហេដ្ឋា​រចនាសម្ព័ន្ធ​គាំទ្រ រួម​ទាំង​ស្ថានីយ​ថាមពល ថាមពល​កកើត​ឡើង​វិញ កា​រត​ភ្ជាប់​អន្តរ​វិស័យ ព្រមទាំង​ការ​បណ្តុះបណ្តាល យន្តការ​លើកទឹកចិត្ត ​ដើម្បី​ជំរុញ​ការ​វិនិយោគ ការ​អភិវឌ្ឍន៍ ការ​ស្រាវជ្រាវ ការ​ច្នៃប្រឌិត​និង​ការ​ប្រើប្រាស់​រថយន្តអគ្គិសនី​ ។

ឯកឧត្តម​ បន្តថា ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ​នឹង​ដើរតួ​នាទី​យ៉ាង​សំ​ខាន់​ក្នុង​ការ​ចូលរួមគាំទ្រ និង​ណែនាំ​លើ​ការ​អភិវឌ្ឍន៍​ក្របខ័ណ្ឌ បទ​ប្បញ្ញត្តិ និង​គោលនយោបាយ ដើម្បី​លើកទឹកចិត្ត​ដល់​រថយន្ត​អគ្គិសនី និង​សមាសធាតុ​រថយន្ត​អគ្គិសនី ដើម្បី​បង្កើត​ជា​ស្តង់ដារ និង​បញ្ជាក់​សមាសធាតុ​ផលិត​ក្នុងស្រុក​ស្រប​តាម​ស្តង់ដារ​ជាតិ និង​អន្តរជាតិ ដើម្បី​ជំរុញ​ការ​បង្កើត បណ្តាញ​ស្ថានីយ៍​សាក​ថ្ម​សម្រាប់​រថយន្ត​អគ្គិសនី អភិវឌ្ឍ​គោលដៅ គោលនយោ​បាយ និង​រចនាសម្ព័ន្ធ​ពន្ធដារ ក្នុង​គោលបំណង​លើកទឹកចិត្ត​ដល់​ការ​វិនិយោគ​ថាមពលកកើតឡើង​វិញ លើកកម្ពស់​ការ​បង្កើត​ការងារ និង​ជំនាញ​យុវជន​ក្នុង​វិស័យ​ផលិតកម្ម តាម​រយៈ គម្រោ​ងឧស្សាហ​កម្ម​បៃ​តង និង​ការងារ​សមរម្យ ដើម្បី​លើកកម្ពស់​ការ​អភិវឌ្ឍន៍​សួន​ឧស្សាហកម្មបៃតង (EIPs) និង​ដើម្បី​ធ្វើ​ពិពិធ​កម្ម​ឧស្សាហកម្ម រួម​ទាំង​ផ្លូវ​ឆ្ពោះទៅ​រក​ឧស្សាហ​កម្ម​ធុនធ្ងន់​ ។

ជាមួយ​គ្នា​នោះ​ដែរ ​ឯកឧត្តម​រដ្ឋមន្ត្រី​ បាន​ឲ្យ​ដឹង​ថា ​គោលនយោបាយ​ជាតិ គឺ​ជំរុញ​ការ​អភិ​វ​ឌ្ឍ​ប្រព័ន្ធ​អេកូឡូស៊ី​របស់​វិស័យ យានយន្ត​អគ្គិសនី ​ប្រកប​ដោយ​ប្រសិទ្ធភាព ​និងតាម​បច្ចេកវិទ្យា​យានយន្ត​អគ្គិសនី ដែល​កំណត់​គោលដៅ២០៣០ សម្រេច​បានការ​ចុះបញ្ជី រថយន្ត​ប្រភេទ EV សុទ្ធ ចំនួន៣០.០០០គ្រឿង ក្នុង​នោះ​រថយន្ត EV សុទ្ធ (private cars) ចំនួន ២៥.០០០ គ្រឿង និង​រថយន្ត EV សុទ្ធ សម្រាប់​ប្រើ​ក្នុង​សកម្មភាព​អាជីវកម្ម (commercial cars) ចំនួន ៥.០០០ គ្រឿង ទោចក្រយានយន្ត EV សុទ្ធ ចំនួន ៧២០.០០០ គ្រឿង និង​ត្រីចក្រយានយន្ត EV សុទ្ធ ចំនួន ២០.០០០ គ្រឿង ​។

បើ​តាម​ ឯកឧត្តម​រដ្ឋមន្ត្រី​ បាន​ឲ្យ​ដឹង​ថា នៅ​ឆ្នាំ​២០២៥នេះ ទីផ្សារ​យានយន្ត​នៅ​កម្ពុជា កំពុង​ការ​រីក​ចម្រើន​យ៉ាង​ខ្លាំង​ និង​ដំណើរការ​យ៉ាង​ស្វាហាប់ ដែល​ជំរុញ​កំណើ​នទីផ្សារ​នូវ​ភាព​សម្បូរ​បែប ដែល​ក្នុង​នោះ​ឃើញ​មានការ​កើនឡើង ​នៃ​ចំណាប់​អារម្ម​ណ៍​លើ​រថយន្ត​អគ្គិសនី​ផង​ដែរ ​។

ឯកឧត្តម ​បន្ថែមថា ​ក្រសួង​បាន​គាំទ្រ​ការ​បង្កើតគម្រោង​វិទ្យាស្ថាន​បច្ចេកវិទ្យា​យានយន្ត និង​ឧស្សាហកម្ម​ថាមពល​ថ្មី​នៅ​កម្ពុជា (New Energy Vehicle and Industrial Technology Institute) នៅ​កម្ពុជា ​ដែល​នឹង​ជួយ​បំពេញ​ហេ​ដ្ឋា​រចនាសម្ព័ន្ធ​គាំទ្រ​ការ​អភិវឌ្ឍ​វិស័យ​យាន្ត​យន្ត និង​ស្រប​តាម «​គោលនយោបាយ​ជា តិ​អភិវឌ្ឍ​វិស័យ​រថយន្ត​អគ្គិសនី ​ឆ្នាំ​២០២៤-២០៣០» ហើយ​សង្ឃឹមថា នឹង​ទទួល​បាន​លទ្ធផល​ល្អ​សម្រាប់​ការ​អនុវត្ត​ជាក់ស្តែង និង​រីក​ចម្រើន​ទៅ​អនាគត​ ។

តាម​រយៈ​ផែនការ​សកម្មភាព​គាំទ្រ ​ទាំង​គោលនយោបាយ យុទ្ធសាស្ត្រ ផែនទី​បង្ហាញផ្លូវ ក្នុង​ការ​បង្កើន​ភាព​ទាក់ទាញ​សម្រាប់​វិនិយោគិន ដែល​បច្ចុប្បន្ន​កម្ពុជា​មានលទ្ធភាព ក្នុង​ការ​ផលិត​គ្រឿង​បង្គុំ​សាមញ្ញ​របស់​យានយន្ត​ទូទៅ ដែល​ក្នុង​នោះ មាន​ឧស្សាហកម្ម​ផលិត​គ្រឿង​បង្គុំ​ក្នុងស្រុក​ដូច​ជា ​៖ ខ្សែភ្លើង​ ដែល​ផលិត​ដោយ​ក្រុមហ៊ុន DENSO, SUMITOMO, និង YAZAKI KYUNGSHIN ជាដើម និង​ក្រុមហ៊ុន​ដែល​ផលិត​សំបក​កង់​ឡាន ​ដែល​ផលិត​ដោយ​ក្រុមហ៊ុន CART TIRE, NEWBUSTAR និង GENERAL INTTELLIGENCE ដើម្បី​ផ្គត់ផ្គង់​ឧស្សា​ហ​កម្ម​ដំឡើងរថយន្ត​នៅ​តាម​ប្រទេស​ក្នុង​តំបន់ ដែល​ផ្អែក​លើ​ឧស្សាហកម្ម​នេះ កម្ពុជា​អាច​ចាប់​យក​ឱកាស​ដ៏​សំខាន់ ក្នុង​កា​រត​ភ្ជាប់​ខ្សែបណ្តាញ​ដំឡើងរថ​យន្ត​អគ្គិសនី​ជា​សាកល ដែល​រំពឹង​ថា ​នឹង​កើនឡើង​នៅ​ឆ្នាំ២០៣០ ​។

លោក សុខ ច​ន្ទ្រា ​តំណាង​ក្រុមហ៊ុន​ GTV MOTOR CAMBODIA បាន​ឲ្យ​ដឹង​ថា ​ដាក់​ដំណើរការ​ជា​ផ្លូវការ​គម្រោង​វិទ្យាស្ថាន​បច្ចេកវិទ្យា​យានយន្ត និង​ឧស្សាហ៍កម្ម ថាមពល​ថ្មី​ ចំ​ពេល​ដែល​ពិភពលោក​កំពុង​ផ្លាស់ប្តូរ​ទៅ​រក​ការ​ប្រើប្រាស់​រថយន្តអគ្គិសនី GTV MOTOR កំពុងឆ្ពោះទៅ​មុខ​ដោយ​ការ​តាំងចិត្ត​។ គិត​ត្រឹម​ដំណាច់​ចុងឆ្នាំ​នេះយើង​នឹង​ដាក់​ឱ្យ​ដំណើរការ​ម៉ូ​ដែល​យានយន្ត​ថាមពល​ថ្មី​ចំនួន​ប្រាំ(៥) រួម​ទាំង​ប្រភេទ Plug-in Hybrid និង​អគ្គិសនី​សុ​ទ្ឋ ដែល​អនុលោម​តាម​ផែនទី​បង្ហាញ​ផ្លូវការ​អភិវឌ្ឍ​វិស័យ​យានយន្ត ​និង​អេ​ឡិច​ត្រូ​និ​ច​កម្ពុជា ​។

លោក​បញ្ជាក់​ថា​ ​យើង​ក៏​ទទួលស្គាល់​យ៉ាង​ច្បាស់​ថា ក្នុង​នាម​ជាម៉ាកយីហោ​រថយន្ត​ជាតិ​ដំបូង​គេ​របស់​កម្ពុជា យើង​មិន​ទាន់​សម្រេច​បាន នូវ​ឯករាជ្យ​ភាព ឧស្សាហកម្ម​ពេញលេញ​នៅឡើយ​ទេ​។ នេះ​មិនមែនជា​ការ​ខ្វះ​សមត្ថភាព​នោះ​ទេ តែ​ជា​ការ​ឆ្លុះ​បញ្ចាំង​ពី​មូល​ដ្ឋា​ន​គ្រឹះ ឧស្សាហកម្ម​ ដែល​កំពុង​អភិវឌ្ឍ​របស់​កម្ពុជា ​។

សូម​ជម្រាប​ថា​ ប្រទេស​កម្ពុជា​បច្ចុប្បន្ន មាន​ឧស្សាហកម្ម​ដំឡើង​យានយន្ត​ក្នុងស្រុក ចំនួន០៨ (​ប្រាំបី​) រួម​មាន ក្រុមហ៊ុន​ “Ford, Ssangyong, Hyundai, KIA, Isuzu, Toyota, BYD និង GTV Motor” ។

ក្រុមហ៊ុន​តំឡើង​ម៉ូតូ​ទូទៅ​ មាន​ចំនួន ០២ Honda និង Suzuki, ក្រុមហ៊ុន ដំឡើង ម៉ូតូ​អគ្គិសនី ​ចំនួន ០១ គឺ​ក្រុមហ៊ុន ​VW&C; និង​ក្រុមហ៊ុន​ដំឡើង កង់​បី​អគ្គិសនី ​មួយ​គឺ Onion Mobility ៕