រាជធានីភ្នំពេញ ៖ ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មានបានប្រាប់ឱ្យដឹងថា គណៈកម្មការតាមដានវាយតម្លៃ និងលើកសរសើរការអនុវត្តក្រមសីលធម៌ វិជ្ជាជីវៈសារព័ត៌មាននៃក្រសួងព័ត៌មានបានទទួល…
រាជធានីភ្នំពេញ ៖ ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មានបានប្រាប់ឱ្យដឹងថា គណៈកម្មការតាមដានវាយតម្លៃ និងលើកសរសើរការអនុវត្តក្រមសីលធម៌ វិជ្ជាជីវៈសារព័ត៌មាននៃក្រសួងព័ត៌មានបានទទួល និងដោះស្រាយបណ្តឹងពាក់ព័ន្ធនឹងអ្នកសារព័ត៌មានសរុបចំនួន២៣ករណី គិតចាប់តាំងពីខែមករា រហូតដល់ដើមខែតុលា ឆ្នាំ២០២៥ ។
ឯកឧត្ដមអ្នកនាំពាក្យបានឲ្យដឹងនៅថ្ងៃទី២៧ ខែតុលា ឆ្នាំ២០២៥ថា ការសម្របសម្រួលដោះស្រាយវិវាទបានផ្តល់យុត្តិធម៌ជូនអ្នកសារព័ត៌មាន និងភាគីក្នុងរឿង ព្រមទាំងការពារអ្នកកាសែតពីការប្រឈមនឹងវិធានការផ្លូវច្បាប់ធ្ងន់ធ្ងរ។ ឯកឧត្ដមអ្នកនាំពាក្យរូបនេះបានថ្លែងបញ្ជាក់ថា៖ «សម្រាប់រាល់បណ្តឹងទាំងអស់ដែលក្រសួងបានទទួលការស្នើសុំឱ្យជួយដោះស្រាយ គណៈកម្មការបានពិនិត្យ និងវិភាគយ៉ាងល្អិតល្អន់ទាំងលើអង្គហេតុ និងអង្គច្បាប់ ហើយបានអញ្ជើញភាគីពាក់ព័ន្ធក្នុងសាច់រឿងមកចូលរួម ក្នុងដំណើរការនីតិវិធីសម្រុះសម្រួល ដោយឈរលើមូលដ្ឋាននៃច្បាប់ស្តីពីរបបសាព័ត៌មាន និយាមវិជ្ជាជីវៈ ធម្មនុញ្ញវិជ្ជាជីវៈសារព័ត៌មាន កាតព្វកិច្ចក្នុងក្របខណ្ឌកិច្ចសន្យាអាជីវកម្មសារព័ត៌មាន និងលិខិតបទដ្ឋានពាក់ព័ន្ធ»។
ឯកឧត្តមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានពន្យល់ទៀតថា «ក្នុងដំណើរការនីតិវិធីសម្រុះសម្រួល កំហុសវិជ្ជាជីវៈសារព័ត៌មាន ទង្វើខុសក្រមសីលធម៌ ត្រូវបានវែកញែក វិភាគដោយតម្លាភាព យុត្តិធម៌ និងវិជ្ជាជីវៈ ដើម្បីផ្សះផ្សាបញ្ចប់វិវាទដោយមានសេចក្តីសន្និដ្ឋាន របាយការណ៍ច្បាស់លាស់ ដែលភាគីពាក់ព័ន្ធក្នុងវិវាទបានព្រមព្រៀងទទួលយក។ រីឯកំហុសខ្លឹមសារផ្សាយត្រូវបានកែតម្រូវ និងផ្សាយឡើងវិញជាមួយព័ត៌មានត្រឹមត្រូវ មានប្រភព និងយោងគ្រប់គ្រាន់ ដែលភាគីវិវាទបានទទួលយករៀងៗខ្លួន ហើយអ្នកសារព័ត៌មានបានទទួលការតម្រង់ទិសលើការប្រតិបត្តិវិជ្ជាជីវៈ និងក្រមសីលធម៌សារព័ត៌មាន ដើម្បីបន្តអនុវត្តការងារឱ្យបានប្រសើរដោយគោរពច្បាប់ និងក្រមសីលធម៌វិជ្ជាជីវៈ» ។
ឯកឧត្ដម ទេព អស្នារិទ្ធ បានអះអាងថាយ៉ាងណាក៏ដោយ សម្រាប់ករណីវិវាទមួយចំនួន ត្រូវទទួលការដាក់ពិន័យស្របតាមច្បាប់ស្តីពីរបបសារព័ត៌មាន ក្នុងនោះមានការចេញលិខិតព្រមានចំពោះអង្គភាពសារព័ត៌មាន អ្នកសារព័ត៌មានដែលបំពានក្រមសីលធម៌ និងការប្រព្រឹត្តផ្ទុយលក្ខខណ្ឌកំណត់ក្នុងកិច្ចសន្យាអាជីវកម្មសារព័ត៌មាន ខណៈករណីមួយចំនួនតូច អង្គភាពសារព័ត៌មានត្រូវបានលុបអាជ្ញាបណ្ណអាជីវកម្មដោយមូលហេតុបំពានក្រមសីលធម៌ធ្ងន់ធ្ងរ ល្មើសនឹងបទប្បញ្ញតិ្តច្បាប់ជាធរមាន ។
ទន្ទឹមនេះ ក្រៅពីយន្តការថ្នាក់ជាតិ ការពង្រឹងទំនាក់ទំនងការងារជាមួយអង្គភាពសារព័ត៌មាន អ្នកសារព័ត៌មាននៅក្នុងមូលដ្ឋានរាជធានី ខេត្តទាំង២៥ តាមរយៈការសម្របសម្រួលដោយមន្ទីរព័ត៌មាន ក្នុងនាមជាសេនាធិការរបស់រដ្ឋបាលរាជធានី ខេត្ត ត្រូវបានធ្វើឡើងជាប្រចាំ ក្នុងគោលបំណងរួមចំណែកពង្រឹងការប្រតិបត្តិក្រមសីលធម៌ និងលើកកម្ពស់គុណភាពវិជ្ជាជីវៈក្នុងការផលិត និងផ្សព្វផ្សាយព័ត៌មាន ។
ឯកឧត្តមអ្នកនាំពាក្យក្រសួងព័ត៌មានបានគូសបញ្ជាក់ឱ្យដឹងផងដែរថា ការបង្កើនទំនាក់ទំនងការងារជាមួយអង្គភាពសារព័ត៌មាន អ្នកសារព័ត៌មាននៅក្នុងមូលដ្ឋានរាជធានី ខេត្ត គឺដើម្បីលើកកម្ពស់តួនាទីនិងភារកិច្ចរបស់អ្នកសារព័ត៌មាន ដោយអនុលោមតាមច្បាប់ ក្រមសីលធម៌ ធម្មនុញ្ញវិជ្ជាជីវៈសារព័ត៌មាន» ។ ឯកឧត្តមបានបន្ថែមថា «យន្តការលើកកម្ពស់ទំនាក់ទំនងសារព័ត៌មាននៅថ្នាក់មូលដ្ឋានរួមចំណែកធានាការទទួលព័ត៌មានពិត សុក្រឹត របស់ប្រជាពលរដ្ឋ អំពីស្ថានភាពនិងវឌ្ឍនភាពនៅមូលដ្ឋាន ជំរុញប្រសិទ្ធភាពការងារសាធារណមតិនិងការទប់ស្កាត់ព័ត៌មានក្លែងក្លាយ» ។
ក្នុងឱកាសនោះ ឯកឧត្តមអ្នកនាំពាក្យក្រសួងព័ត៌មានបានមានប្រសាសន៍រម្លឹកថា អ្នកសារព័ត៌មានទាំងអស់ត្រូវអនុវត្តន៍ការងារដោយការទទួលខុសត្រូវវិជ្ជាជីវៈ តាមរយៈការពង្រឹងសមត្ថភាពផលិត-ផ្សាយព័ត៌មានដោយគុណភាព ហើយមិនត្រូវដើរតួនាទីជំនួសសមត្ថកិច្ចឡើយ។ ឯកឧត្ដមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់ឱ្យដឹងទៀតថា«សូមអ្នកសារព័ត៌មានខិតខំស្រាវជ្រាវអំពីប្រធានបទនីមួយៗ មុនចុះយកព័ត៌មាន ដើម្បីឱ្យមានមូលដ្ឋានច្បាស់លាស់ក្នុងការផលិតមាតិកា និងផ្សាយខ្លឹមសារមានគុណភាព ជាប្រយោជន៍សម្រាប់ប្រជាពលរដ្ឋ និងសង្គមជាតិ»។
ឯកឧត្តមបានសង្កត់ធ្ងន់លើសារៈសំខាន់ ដែលអ្នកសារព័ត៌មានត្រូវធ្វើខ្លួនជាបុគ្គលគំរូដល់សង្គម ដោយត្រូវប្រកាន់ខ្ជាប់នូវគោលការណ៍ផ្តល់ព័ត៌មានពិត មានប្រភពច្បាស់លាស់ ដោយគោរពក្រមសីលធម៌វិជ្ជាជីវៈត្រឹមត្រូវ ព្រោះកត្តាទាំងអស់នេះនឹងផ្តល់សុវត្ថិភាពសម្រាប់ការអនុវត្តការងារ និងជួយការពារអ្នកសារព័ត៌មាន ពីការប្រឈមនឹងបញ្ហាផ្លូវច្បាប់ផងដែរ៕
ចែករំលែកព័តមាននេះ