ខេត្តកណ្តាល ៖ ទីតាំងលក់ខ្សាច់ជាច្រើនកន្លែងតាមបណ្តោយផ្លូវកៅស៊ូលេខ១៤ចាប់ពីឃុំព្រែកទម្លាប់រហូតដល់ច្រកទ្វារព្រំដែនអន្តរជាតិក្អមសំណ ឃុំក្អមសំណ ស្រុកលើកដែក ខេត្តកណ្តាល។ដោយពុំមានឃើញលើកស្លាកប៉ាន់ណូឬស្លាកយីហោអាជីវកម្មនោះឡើយ សង្ស័យអត់មានច្បាប់។
បើយោងតាមប្រភពព៌តមានសុំមិនបញ្ចេញឈ្មោះបានអោយដឹងថា ក្រុមឈ្មួញរកស៊ីបូមខ្សាច់ទន្លេមេគង្គក្រោមលក់នេះ គឺពួកគេសុទ្ធតែជាថៅកែអ្នកមានលុយមានអំណាចទើបធ្វើទៅបាន ដោយកន្លែងខ្លះថៅកែខ្មែរ រីឯកន្លែងខ្លះទៀតជាថៅកែវៀតណាម គឺបើកលក់ខ្សាច់រាប់ឆ្នាំមកហើយ មិនមានលើកស្លាកយីហោអ្វីឡើយ តែបើតាមប្រភពពីមន្ត្រីតូចតាចដែលបំរើការងារនៅសាលាស្រុកបានលួចបង្ហើបប្រាប់អ្នកសារព៌តមានអោយដឹងថា នៅសាលាស្រុកលើកដែកនេះយើងពីដើមមក គឺគ្មានមន្ត្រីជំនាញរ៉ែនៅបំរើការងារនោះទេ។ហេតុដូចនេះហើយ ទើបរថយន្តតូច-ធំចេញចូលដឹកខ្សាច់លក់យ៉ាងគគ្រឹកគគ្រេងម៉ាសេរី ហើយពេលខ្វះដឹកជញ្ជូនអត់ក្របវេចខ្ចប់អោយបានត្រឹមត្រូវធ្វើអោយដីខ្សាច់ឬទឹកហូរស្រក់ពេញតាមដងផ្លូវកៅស៊ូ បង្កការលំបាកដល់អ្នកធ្វើដំណើរប៉ះពាល់សុខភាពធ្ងន់ធ្ងរ។
ជាពិសេសរថយន្តដឹកខ្សាច់លក់ទាំងនោះក៍បានចូលរួមចំណែកបំផ្លាញផងដែរ។ស្របពេលបច្ចុប្បន្នផ្លូវកៅស៊ូលេខ១៤ចូលទៅកាន់ច្រកទ្វារព្រំដែនអន្តរជាតិក្អមសំណនេះ ចាប់ពីឃុំព្រែកទម្លាប់រហូតដល់ឃុំក្អមសំណក៍កំពុងរងការខូចខាតជាច្រើនកន្លែងក្លាយជាក្រហុកក្រហេងក្រហូងដូចរន្ធបាយខុមមានទឹកដក់ បង្កការលំបាកដល់អ្នកធ្វើដំណើរជាខ្លាំង។
ប្រភពដដែលបញ្ជាក់បន្ថែមថា ជាការពិតណាស់ ការធ្វើអាជីវកម្មខ្សាច់ស្ងាត់ៗមិនមានលើកស្លាកយីហោសង្ស័យអត់មានច្បាប់។ការធ្វើអាជីវកម្មអត់ច្បាប់ វាមិនត្រឹមបង្កការខូចផ្លូវ រំខានដល់ការរស់នៅរបស់បងប្អូនប្រជាពលរដ្ឋប៉ុណ្ណោះទេ វាថែមទាំងបាត់បង់នូវចំណូលថវិការជាតិយ៉ាងធ្ងន់ធ្ងរទៀតផង។
ជុំវិញបញ្ហានេះ អ្នកសារព៌តមានយើង នារសៀលថ្ងៃទី២៥ ខែតុលា ឆ្នាំ២០២៥ក៍បានព្យាយាមទូរស័ព្ទទៅសូមការឆ្លើយតបពីលោក ចាប ច័ន្ទវិទ្យា អភិបាលនៃគណ:អភិបាលស្រុកលើកដែកដែរ ប៉ុន្តែទូរស័ព្ទចូលគ្មានអ្នកទទួល ។
ព័ត៌មានបន្តនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ