ជប៉ុន ៖ កម្ពុជា និងក្រូអាស៊ី ពិនិត្យលទ្ធភាពបង្កើតឱ្យមានកិច្ចសហប្រតិបត្តិការរវាងគ្នាក្នុងវិស័យសកម្មភាពមីន ។ នេះបើយោងតាមផេកអាជ្ញាធរមីនបានប្រកាសនារសៀលថ្ងៃទី២២ ខែតុលានេះ ។ ជាក់ស្តែងថ្ងៃទី២២…
ជប៉ុន ៖ កម្ពុជា និងក្រូអាស៊ី ពិនិត្យលទ្ធភាពបង្កើតឱ្យមានកិច្ចសហប្រតិបត្តិការរវាងគ្នាក្នុងវិស័យសកម្មភាពមីន ។ នេះបើយោងតាមផេកអាជ្ញាធរមីនបានប្រកាសនារសៀលថ្ងៃទី២២ ខែតុលានេះ ។
ជាក់ស្តែងថ្ងៃទី២២ ខែតុលា ឆ្នាំ២០២៥ ក្នុងឱកាសចូលរួមសន្និសីទស្តីពីសកម្មភាពមីនអ៊ុយក្រែន នៅទីក្រុងតូក្យូប្រទេសជប៉ុន ឯកឧត្តមបណ្ឌិត លី ធុជ ទេសរដ្ឋមន្ត្រី អនុប្រធានទី១អាជ្ញាធរមីន បានជួបពិភាក្សាទ្វេភាគីជាមួយឯកឧត្តម GORDAN GRLIĆ RADMAN រដ្ឋមន្ត្រីការបរទេស និងកិច្ចការអឺរ៉ុបនៃសាធារណរដ្ឋក្រូអាស៊ី ។
ក្នុងជំនួបនោះ ឯកឧត្តម GORDAN GRLIĆ RADMAN បានកោតសរសើរ និងវាយតម្លៃខ្ពស់ ដល់កិច្ចខិតប្រែងក្នុងសកម្មភាពមីនមនុស្សធម៌របស់កម្ពុជា និងគ្រោងនឹងចាប់ផ្តើមកិច្ចសហប្រតិបត្តិការជាមួយកម្ពុជា ក្នុងវិស័យសកម្មភាពមីន តាមរយៈអនុស្សរណៈនៃការយោគយល់គ្នា ។
ឯកឧត្តម GORDAN GRLIĆ RADMAN ក៏បានលើកឡើងដែរថា កម្ពុជា គឺជាទីតាំងសំខាន់សម្រាប់ក្រូអាស៊ី ក្នុងការបង្កើនបណ្តាញទំនាក់ទំនងនៅក្នុងតំបន់អាស៊ានក៏ដូចជា តំបន់អាស៊ីប៉ាស៊ីហ្វិកទាំងមូល ហើយឯកឧត្តមនឹងអញ្ជើញធ្វើទស្សនកិច្ចមកកម្ពុជាដើមឆ្នាំ២០២៦ ដោយមានការចូលរួមជាមួយដោយវិនិយោគគិន និងអ្នកជំនាញពាណិជ្ជកម្ម ដើម្បីស្វែងយល់ និងបង្កើនកិច្ចសហការក្នុងវិស័យសំខាន់ៗដូចជា ពាណិជ្ជកម្ម ទេសចរណ៍ ថាមពល និងរួមទាំងវិស័យមីនផងដែរ ។
ឯកឧត្តបណ្ឌិត លី ធុជ វាយតម្លៃខ្លស់ចំពោះឯកឧត្តម GORDAN GRLIĆ RADMAN ក៏ដូចជាប្រទេសក្រូអាស៊ី ដែលមើលឃើញពីសក្តានុពលរបស់កម្ពុជា និងបានលើកឡើងដែរថា កម្ពុជាមានបរិយាកាសវិនិយោគអំណោយផលមានភាពប្រកួតប្រជែងខ្ពស់ និងមានបណ្តាញហេដ្ឋារចនាសម្ព័ន្ធពាណិជ្ជកម្មរឹងមាំ ដែលជាលក្ខណៈពិសេសសម្រាប់ការវិនិយោគរបស់ក្រូអាស៊ី ។
ឯកឧត្តមទេសរដ្ឋមន្ត្រី លើកឡើងផងដែរថា កម្ពុជាត្រៀមខ្លួនរួចរាល់ ក្នុងកិច្ចសហការជាមួយក្រូអាស៊ី ក្នុងវិស័យសកម្មភាពមីន ហើយភាពជោគជ័យ បទពិសោធន៍ និងជំនាញរបស់កម្ពុជា នឹងធ្វើឱ្យកម្ពុជាក្លាយជាដៃគូដ៏សំខាន់របស់ក្រូអាស៊ី ក្នុងកិច្ចការសកម្មភាពមីន ទាំងក្នុងតំបន់ និងទូទាំងពិភពលោក ៕
ចែករំលែកព័តមាននេះ