ជំងឺមហារីកបំពង់អាហារគឺជាជំងឺកាចសាហាវដែលជារឿយៗមិនបង្ហាញសញ្ញាច្បាស់លាស់នៅដំណាក់កាលដំបូងឡើយ។ ប៉ុន្តែនៅពេលវាចាប់ផ្ដើមវិវត្តន៍ អ្នកនឹងសម្គាល់ឃើញរោគសញ្ញាចម្លែកៗដែលប៉ះពាល់ដល់ការទទួលទានប្រចាំថ្ងៃ។
យោងតាមការណែនាំរបស់មន្ទីរពេទ្យកាល់ម៉ែត អ្នកជំងឺដុំមហារីកបំពង់អាហារតែងតែមានរោគសញ្ញាដូចខាងក្រោម៖
១. បញ្ហាចម្បង៖ ការពិបាកលេបអាហារ
នេះជារោគសញ្ញាលេចធ្លោបំផុតដែលបង្ហាញពីការស្ទះបំពង់អាហារ៖
- អួលណែន និងពិបាកលេបអាហារចូល៖
- ដំបូងឡើយ គឺពិបាកលេបអាហាររឹង (ដូចជាសាច់)។
- បន្ទាប់មកវិវត្តន៍ដល់អាហាររាវ។
- ហើយចុងក្រោយ សូម្បីតែទឹកក៏ពិបាកលេបដែរ។
២. រោគសញ្ញាឈឺចាប់ និងមិនស្រួលក្នុងប្រព័ន្ធរំលាយអាហារ
- ឈឺចុកចាប់នៅពេលបរិភោគអាហារ៖ មានអារម្មណ៍ឈឺចាប់ពេលអាហារធ្វើដំណើរតាមបំពង់អាហារ។
- ក្អួតចង្អោរបន្ទាប់ពីបរិភោគអាហាររួច។
- ចុកណែនអួលក្នុងដើមទ្រូង៖ មានសម្ពាធ ឬអារម្មណ៍មិនស្រួលនៅតំបន់ដើមទ្រូង (ស្រដៀងនឹងក្រហាយទ្រូងរ៉ាំរ៉ៃ)។
៣. សញ្ញាណនៃការចុះខ្សោយសុខភាពរាងកាយ
- ស្រកទម្ងន់ខ្លាំងខុសពីធម្មតា៖ ជាលទ្ធផលនៃការពិបាកលេប និងការមិនចង់ទទួលទានអាហារ។
- មិនចង់ទទួលទានអាហារ និងធុំសាច់៖ បាត់បង់ចំណង់អាហារយ៉ាងខ្លាំង។
- ចុះខ្សោយ, អស់កម្លាំង, កំហែង និងល្ហិតល្ហៃ។
- ស្លេកស្លាំង និងខ្វះគ្រាប់ឈាមក្រហម៖ បណ្ដាលមកពីកង្វះអាហារូបត្ថម្ភ ឬការហូរឈាមក្នុងបំពង់អាហារ។
- ហូរធ្លាក់ឈាម៖ ពេលខ្លះដុំមហារីកអាចបណ្តាលឲ្យមានការហូរឈាម (ដែលអាចចេញតាមការក្អួត ឬលាមកខ្មៅ)។
ប្រសិនបើអ្នកមានរោគសញ្ញាពិបាកលេបអាហារយូរជាងពីរសប្ដាហ៍ ឬស្រកទម្ងន់ខ្លាំង សូមប្រញាប់ទៅជួបគ្រូពេទ្យឯកទេសដើម្បីធ្វើការពិនិត្យឆ្លុះក្រពះជាបន្ទាន់ ដើម្បីដោះស្រាយបញ្ហានេះឲ្យទាន់ពេលវេលា៕
ចែករំលែកព័តមាននេះ