ខេត្តកណ្តាល ៖ ដូចពាក្យចាស់លោកថា ល្បែងតែងតែវិនាស ។ បុរសម្នាក់គិតខ្លីចងកស្លាប់ចោលប្រពន្ធ ក្រោយលួចបាញ់លុយចេញពីកុងធនាគារប្រពន្ធ ចូលកុងរបស់ខ្លួន យកទៅលេងល្បែងតាមអនឡាញចាញ់អស់ ខឹងប្រពន្ធសុំលែងលះ…
ខេត្តកណ្តាល ៖ ដូចពាក្យចាស់លោកថា ល្បែងតែងតែវិនាស ។ បុរសម្នាក់គិតខ្លីចងកស្លាប់ចោលប្រពន្ធ ក្រោយលួចបាញ់លុយចេញពីកុងធនាគារប្រពន្ធ ចូលកុងរបស់ខ្លួន យកទៅលេងល្បែងតាមអនឡាញចាញ់អស់ ខឹងប្រពន្ធសុំលែងលះ ឆាតមកប្រពន្ធលាហើយប្រពន្ធសម្លាញ់ រួចចងកស្លាប់ក្នុងផ្ទះ ប្រពន្ធចេញពីធ្វើការរោងចក្រវិញ ក៏ឃើញប្តីស្លាប់ទៅហើយ ។
ហេតុការណ៍ដ៏គួរអោយរន្ធត់នេះ បានកើតឡើងកាលពីវេលាម៉ោង០៦ និង៥៥នាទីយប់ ថ្ងៃទី១៣ ខែតុលា ឆ្នាំ២០២៥ ស្ថិតចំណុចភូមិកប់ចន្លុះ ឃុំព្រៃពួច ស្រុកអង្គស្នួល ខេត្តកណ្ដាល ។
តាមសមត្ថកិច្ចស្រុកអង្គស្នួលបានបញ្ជាក់អោយដឹងថា សពបុរសដែលធ្វើអត្តឃាតចងកសម្លាប់ខ្លួននេះមានឈ្មោះ ប៉ែន សុខជា ភេទប្រុស អាយុ៣៦ឆ្នាំ ជនជាតិខ្មែរ មុខរបរ
ជាកសិករ មានស្រុកកំណើតនៅភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្ដាល ។
ក្រោយពីទទួលបានព័ត៌មាននេះភ្លាម តាមបទបញ្ជាលោកឧត្ដមសេនីយ៍ទោស្នងការ លោកស្នងការរងទទួលជំនាញ និងលោកអធិការស្រុកអង្គស្នួល បានបញ្ជាឲ្យកម្លាំងផ្នែកពិនិត្យវិភាគកន្លែងកើតហេតុចុះទៅដល់ទីតាំងកើតហេតុ បានសាកសួរទៅកាន់ប្រពន្ធជនរងគ្រោះមានឈ្មោះ គង់ ណម អាយុ៣១ឆ្នាំ ជាកម្មការិនីរោងចក្របានប្រាប់អោយដឹងថា ជនរងគ្រោះញៀននឹងល្បែង«អនទ្បាញ»ជាងមួយឆ្នាំកន្លងមកហើយ។ ហើយខ្លួនតែងតែហាមជនរងគ្រោះមិនអោយលេង តែជនរងគ្រោះមិនស្ដាប់ ។
លុះមកដល់ថ្ងៃទី១២ ខែតុលា ឆ្នាំ២០២៥ វេលាម៉ោង០៨ និង៤៨នាទីយប់ ជនរងគ្រោះជាប្តីបានលួចបាញ់លុយពីកុងធនាគារក្នុងទូរស័ព្ទរបស់ខ្លួនចូលទៅក្នុងកុងធនាគារក្នុងទូរស័ព្ទជនរងគ្រោះចំនួនលុយ២៣០ដុល្លាដើម្បីយកទៅលេងល្បែងតាមអនឡាញ ហើយបានចាញ់អស់ ទើបខ្លួនខឹងហើយបានឈ្លោះប្រកែកជាមួយប្តី ប្តីក៏បានជិះម៉ូតូចេញពីផ្ទះបាត់ទៅពុំឃើញចូលផ្ទះវិញទេ ។ ពេលនោះ ខ្លួនក៏បានទាក់ទងតាមរយៈទូស័ព្ទដៃទៅប្តីហើយបាននិយាយថា យើងលែងលះគ្នាទៅ តែប្តីមិនតប។
ស្រាប់តែមកដល់ថ្ងៃទី១៣ ខែតុលា ឆ្នាំ២០២៥ វេលាម៉ោង១៤ និង០០នាទីរសៀលក៏ស្រាប់តែប្តីឆាតមកប្រាប់ខ្លួនថា «លាហើយប្រពន្ធសម្លាញ់» តែខ្លួនពុំចាប់អារម្មណ៍ និងជនរងគ្រោះព្រោះខ្លួនកំពុងតែធ្វើការក្នុងរោងចក្រ ។ លុះដល់វេលាម៉ោង០៦ល្ងាចថ្ងៃ ខែ ឆ្នាំដដែលទើបខ្លួនបានចេញពីធ្វើការរោងចក្រវិញ ក៏ត្រឡប់មកដល់ផ្ទះ ឃើញទ្វារផ្ទះចាក់សោពីខាងក្នុង ពេលនោះប្រពន្ធបានស្រែកហៅជនរងគ្រោះអោយបើកទ្វារ តែគ្មានអ្នកឆ្លើយតប ទើបមានការសង្ស័យក៏បានហៅប្អូនថ្លៃមកជួយមើល និងគាស់សោរចូលទៅក្នុងផ្ទះក៏ស្រាប់តែឃើញជនរងគ្រោះបានចងក និងខ្សហ្វ្រាំងកង់ជាប់និងដែកទ្វារស្លាប់បាត់ទៅហើយ ។
បន្ទាប់មក សមត្ថកិច្ចផ្នែកពិនិត្យវិភាគកន្លែងកើតហេតុ ស្រុកអង្គស្នួលដោយមានការចូលរួមប៉ុស្តិ៍រដ្ឋបាលឃុំព្រៃពួច លោកក្រុមប្រឹក្សាឃុំ លោកគ្រូពេទ្យ មេភូមិ និងក្រុមគ្រួសារជនរងគ្រោះ បានធ្វើការពិនិត្យលើជនរងគ្រោះឃើញថា សពមានសភារឹង, សពស្លៀកខោខូវប៊យជើងវែងពណ៌ខៀវ មានពាក់ខ្សែរក្រវ៉ាត់ពណ៌ខ្មៅ និងពាក់អាវយឺតដៃបែងពណ៌ទឹកបិច , មានស្លាកស្នាមពីគុម្ពត្រចៀកឆ្វេងដល់គុម្ពត្រចៀកស្ដាំ និងពិការជើងឆ្វេង, ខ្នងនៃសពមានសភាពស្រុងឈាម, ក្រចក់ដៃនិងក្រចកជើងឡើងពណ៌ស្វាយ ក្រៅពីនោះពុំស្លាក់ស្នាមអ្វីឡើយ។
តាមការសន្និដ្ឋាន យោងតាមលោកគ្រូពេទ្យនិងជំនាញ ជនរងគ្រោះស្លាប់ដោយសារអត្តឃាតចង.ក និងប្រគល់ជូនក្រុមគ្រួសារជនរងគ្រោះយកទៅធ្វើបុណ្យតាមប្រពៃណី ៕
ចែករំលែកព័តមាននេះ